2 Samuele 14 - Mawu a Mulluku

Davide anamukhululukella Abishalomu

¹ Yowabu, mwaana a Zeruya, aadduwella wi Davide aanaganiza dda Abishalomu.

² Vano Yowabu ahaaruma athu a o etawoni ya Tekowa wi yamukusewo mutthiyana eezeru. Aamulleella mutthiyanooyo wi, “Okhalle wonanko mutthiyana ookhwelliwa, oware ddoowara dda mutthiyana ookhwelliwa. Ohiniihella makhura koma okhalle wonanko mutthiyana oyo akhanlle inllaka mallapo manchichi.

³ Weeddiiddo oye wa mwene, wallotena nndda.” Sika Yowabu aamulleella mutthiyaanooyo mawu awi aallote.

⁴ Mutthiyana a o etawoni ya Tekowoolle aphiyalle wa Davide ahiikuha apopheya ekhovaaye vatthi amullapella mwenooyo nave aallota wi, “Amwene kikavihereni,”

⁵ Mwenooyo aamukoha wi, “Enuukatamihani tti tini nyuwaano moowe?” Mutthiyanoolle aallota wi, “Mi tti naamukhwelle, mamunaka aakhwa.

⁶ Vano mi mullupa muttekwaanyu aamutthiyana kaakhalla ni anamwani aallopwana eelli, anamwanaayo yaawana omata. Khaavo awaakanullalle. Sika mmodda aamwiipha mukhwaaye.

⁷ Vano nibanja nittheene nookiwukila mi mullupa muttekwaanyu aamutthiyana. Enallota wi, ‘Oninnye mwanawo oyo amwiiphalle mwanamunne wi nimwiiphe ekaamba ya mwanamunne oyo amwiiphalleeye.’ Sika athu eneerokoonongella mwaana oyo anaahallena eyuuma. Athwaayo eneeromwiipha mwaana kihanlleemina nave nnddina na mamunaka nineerotiwalleya vawi khanikhalla ni mwaana munibanjani mwahu.”

⁸ Vano Davidoolle aamulleella mutthiyanoolle wi, “Moowe, rowani owaninyu, miyaano kineeroweeravo ello va mwaha yoolla.”

⁹ Mutthiyana a o etawoni ya Tekowoolle ahaalleella mwene wi, “Apwiyaaka mwene, nyuwaano ni nibanja nanyu nittheene mukhalle oohichimwa koma oochimwa kikhalle miyaano ni nibanja na attiitthaaka”

¹⁰ Vano mwenoolle aallota wi, “Muthu mmodda uullotellani erive ello muweena wa miyaano nave khawa uukatamihaanittho.”

¹¹ Vano mutthiyanoolle aallota wi, “Pepaani, muveke wa Apwiya Mullukwaanyu wi mbalaaka oyo anapaalla ohokollosella wiiphiwa wa mwanaka, ahimwiiphettho mwanaka ahanlloolla.” Davide aallota wi, “Kinimallupella vamiitthoni va Apwiya wi mwanawo khawa avoreyiwa naari vang'ono.”

¹² Vano mutthiyanoolle aallota wi, “Mukaakhullelle mi mullupa muttekwaanyu aamutthiyana killote mawu mamodda wa nyuwaano apwiyaaka amwene.” Mwenoolle aallota wi, “Llotani moowe.”

¹³ Mutthiyanoolle aakoha wi, “Kaambiiwa tini munaganizeenyu oweerella ddeko ddawi ddiidda athu a Mulluku? Vawi mweera ddiidda munaddiipa mullatu nyookha kaambiiwa khamumwiithanille awiikariwoolle wi ahokollweelle owaniwa.

¹⁴ Vallethi maaddi yatathiya khenawolleya. Nave attheene nineerokhwa. Mulluku khanapaalla wi okumi wa muthu otathiye koma anakhoza ettilla yawi awiikarihiwooyo ahokollowe.

¹⁵ Vano miyaano kiwiille wi killote ni nyuwaano apwiyaaka amwene apaalle ttuuweera nnddo mi mullupa muttekwaanyu aamutthiyana kinavekeemi. Kaganiza wi nyuwaano mwiiwa muneerokivullusa wa athu ayo enapaalla okoononga miyaano ni mwanaka onivenyiha mu ellapo eyo anivahille Mulluku.

¹⁶ Kaganiza wi nyuwaano mwene mwiiwa muneerokivullusa mi oorumeyellaanyu wa athu ayo enapaalla wi ekoononge miyaano ni mwanaka onivenyiha va ellapo eyo anivahille Mulluku wi ekhalle yoohallanaahu.

¹⁷ Sika mi mullupa muttekwaanyu aamutthiyana mawaanyu Apwiya eneerokivullusa vawi nyuwaano muri wonanko mungelo a Mulluku voodduwellani ddaphaama ni ddoonanara. Apwiya Mullukwaanyu akhalle ni nyuwaano.”

¹⁸ Mwene Davide ahaakhulla wi, “Muhinavittha erive ello va nnddo kinuukoheemini.” Mutthiyanoolle ahaakhulla wi, “Iyaayi, apwiyaaka amwene, kheyiivo kinaavittheemi.”

¹⁹ Vano mwenoolle aakoha wi, “Ethiyo ddenndda Yowabu khanaddidduwella?” Mutthiyanoolle ahaakhulla wi, “Voollotani ddawoona apwiyaaka amwene, khaavo muthu oyo anaalephele waakhulla erive ello eyo munaakoheenyu. Oorumeyellaanyu Yowabu sika akilleelle wi keere ddenndda. Olliyooyo sika akilleelle mi mullupa muttekwaanyu aamutthiyana mawu mattheenaalla.

²⁰ Oorumeyellaanyu Yowabu eerille ddenndda wi awooniheni embali emodda ya ddookatamihanndda. Koma nyuwaano apwiyaaka mookhalla ni ezeru wonanko mungelo a Mulluku nave munnadduwella ddeko ddittheddene dda mu ellapweella.”

²¹ Vatulli viwa mwenoolle aamulleella Yowabu wi, “Kooganiza wi keere moollikana ni malangizwaawo. Khawe wamukuse musomboolle Abishalomu.”

²² Yowabu ahiikuha apopheya ekhovaaye vatthi, amullapella, amuthokoza mwenooyo. Vano aallota wi, “Koodduwella wi nyu apwiyaaka munnakeerella echifundo kaambiiwa mohaakhullella oveka waka.”

²³ Sika Yowabu aatimulla anaya o Geshuri, amukusa Abishalomu, awaana o Yerusalemu.

²⁴ Koma mwenoolle aallota wi, “Akhalle va yeekha mu enyumba yaayeyaaye. Nginapaalla wi kimoone.” Sika Abishalomu aakhalla va yeekha mu enyumba yaayeyaaye nave khaawoonanne ni attiitthinnya.

Davide anaattana ni Abishalomu

²⁵ Mu Israele mutthemwene khamwaari muthu ooreera wonanko Abishalomu. Waambeella omanyalloni ophiyera omuruni khevaarivo vanananre.

²⁶ Orive muyakha anachema meehaaye omodda kaambiiwa yaanamullemella wunchichi. Achema meehaayo nave yaalinga vasikeloni, yaanallemella makilogaramu meelli moollikana ni oyeza wowaakhullelliwa ni omwene.

²⁷ Abishalomu aakhalla ni anamwani aallopwana araru ni mwaana aamutthiyana mmodda nnddina naye aari Tamara. Olliyoolla aari mutthiyana ooreera.

²⁸ Abishalomu aakhalla miyakha miilli ddamututha ahoonanne ni attiitthinnya.

²⁹ Nllapo nimodda Abishalomu aarumiha mawu wa Yowabu oomuveka wi amurume wa amwene. Koma Yowabu khaawiille. Abishalomu aarumiha mawu waneepiilli koma khaawiillettho.

³⁰ Vano Abishalomu ahaaruma oorumeyellaaye wi, “Emata ya Yowabu yohaatamana ni emataaka nave mookhalla mmiddo wa barele mwemmo. Khaweni mwawuhelle munllo.” Sika oorumeyella a Davidaayo yaaya yawuhella munllo.

³¹ Vano Yowabu aatimulla aya o enyumba ya Abishalomu amukoha wi, “Kaambiiwa tini oorumeyellaawo ehenlliiwa munllo emataaka ya tirigu?”

³² Abishalomu aamwaakhulla Yowabu wi, “Kookhalla kirumihaka mawu wa weyaano wi kuurume wa attiitthaaka, mwene wi waakohe ekaamba eyo kavenyelleemi o Geshuri owa wuno? Waphaama kakhallakave weewulle.” Abishalomu aavirellella ollota wi, “Kinapaalla koonanena mwenooyo. Kaarimi kiri oochimwa mwenooyo akiiphe.”

³³ Sika Yowabu aaya wa mwene akambirana ni mwenooyo ddennddo. Vano mwenooyo aamwiithaniha Abishalomu. Nave olliye aawa wa mwene akokhora vamiitthoni vaye. Nave mwenooyo aamwaakhella phaama voomukhupaarellani.