2 Samuele 13 - Mawu a Mulluku

Aminoni ni murokoriye Tamara

¹ Abishalomu aakhalla ni murokoriye ooreera, nnddina naye Tamara. Aminoni, mwaana mmodda a Davide, aanamukonda Tamara

² Ekhove kheddaawa ekaamba ya Tamara, murokoriye, ophiyera wi ahaamba omuvoriiwa. Tamara aari Namwalli oohimudduwella mullopwana. Nave waanooneya wi tti wookatamiha wi Aminoni eerena erive ello.

³ Koma Aminoni aakhalla ni mukhwaaye, nnddina naye Yonadabu, mwaana a Shimea, mwanamunne a Davide. Yonadabooyo aari muthu oochenjera wunchichi.

⁴ Nllapo nimodda aamukoha Aminoni wi, “Ethiyo weyaano mwaana a mwene kaambiiwa tini onoondeewe nllapo ni nllapo? Killeelle enuukatamiha.” Aminoni aamwaakhulla wi, “Mi kinamupaalla Tamara, murokora a Abishalomu, mwanamunnaka.”

⁵ Vano Yonadabu aamulleella wi, “Wakonaatthi vabedini vawo nave okhalle wonanko onimavoriiwa. Attiittho yaphiya wi ewoone waalleelle wi, ‘Mumulleelle Tamara murokoraka awe akikhozelle yoocha wi kiche. Akikhozelle yoocheeyo vamiitthoni vaka wi kiyoone nave kiyichelle m'mattani mwaye.’ ”

⁶ Sika Aminoni aakonaatthi anakhalla wonanko animavoriiwa. Mwenoolle awiilleeye wi amoone, Aminonooyo aamulleella wi, “Kinimuuvekani mumwaakhullelle murokoraka Tamara awe akikhozelle yoocha koonaka nave kiyichelle m'mattani mwaye.”

⁷ Davide aarumiha mawu wa Tamara wi, “Oye o enyumba ya murokoriyo Aminoni wamukhozelle yoocha.”

⁸ Tamara aaya o enyumba ya Aminoni, murokoriye, onipuroni nko akoneeye. Aakusa othu, awoottowa, oopa makeke Aminonooyo oonaka nave aawoosa makekaayo.

⁹ Vano aakusa echiwaya, awiithamo makekaayo, olliye oonaka koma Aminonooyo aakhoota ocha. Vano Aminonooyo aallota wi, “Alleelleni athu attheene evenyevo,” Sika attheene yaavenyavo.

¹⁰ Vano Aminoni aamulleella Tamara wi, “Oweena yoocheeyo muchipindani wi kayichelle m'mattani mwawo.” Tamara ahaakusa makeke awaarikalleeyaayo ayaana wa Aminoni murokoriyooyo muchipindanimmo.

¹¹ Koma aphiyallena yoocheeyo vakhuviru ni Aminoni wi ache, Aminoni aamuphara Tamara, amulleella wi, “We Tamara, waawo okone ni miyaano.”

¹² Koma Tamarooyo ahaakhulla wi, “Iyaayi, murokoraka, ohinakiwatihera. Ovenyera khalle ddennddo khaddineereyeke mu Israelemmu. Ohineera ddeko ddoonanara wonanko ddenndda.

¹³ Ethiyo mi muru khokiwullaka kaaweetaka vamiitthoni va athu? Nave weyaano onaakhalle mmodda a athu ookarangeya variyari va Aisraele. Kinimuuveka nave koophara mwetwaawo, waaveke amwene vawi khekiwatteella.”

¹⁴ Koma Aminoni khaawiiwellelle allota Tamarannddo. Nave vawi aakhalla ni masiva omukhwaranya Tamara, Aminonooyo aamuwatihera Tamara nave aamupharella.

¹⁵ Vatulli viwa Aminoni ahiitana wunchichi ni Tamara. Omwiitanko waari wuullupalli okhwaranya echikondi eyo amukondelleeye. Nave Aminonooyo aamulleella Tamara wi, “Venya, rowaka.”

¹⁶ Koma Tamarooyo aallota wi, “Iyaayi, murokoraka okiikara wawi ddiidda tti woonanara wunchichi okhwaranya nnddo okeerelleewe.” Koma Aminoni khaapanlle wiiwellella allota Tamarannddo.

¹⁷ Aminoni aamwiithana mullupa muttekwaaye oyo amurumeyella, amulleella wi, “Omukhumihe mutthiyanoolla, avenyevo vaava kihimoonettho nave owallewo ni loko omullakoninko akhuma.”

¹⁸ Enthawi yeeyo Tamara aawara yoowara mukanjo ya miwono ddoorekama moollikana ni mmo yawarella anamwalli, anamwani a mamwene, ayo ehimudduwenlle mullopwana. Vano oomurumeyella Aminonooyo aamukhumiha Tamara, awalla nchiwinno ni loko akhumalleeye.

¹⁹ Vano Tamara ahiihella ntuura omuruni aahulla yoowara eyo awarilleeye. Nave aaphara muru anarowa inllaka mookhuwa mawu musewu muttheene.

²⁰ Abishalomu, murokora a Tamarooyo, aamukoha wi, “Ethiyo tti Aminoni aweerenlle ddenndda. Maalla murokoraka, olliyoolle tti murokoriyo, ddenndda ddihiwaapheellihe muru wunchichi.” Sika Tamara akhalla wonanko naamukhwelle o enyumba ya Abishalomu murokoriye.

²¹ Davide iiwalle ddenndda, ddaamushiha murima wunchichi.

²² Koma Abishalomu khaallotille erive ello yaphaama apaalle yoonanara wa Aminoni. Vawi Abishalomu aanamwiita wunchichi ekaamba yawi aamuwatihera Tamara, murokoriye weerana ddoonanara.

Abishalomu anamwiipha Aminoni

²³ Viviralle miyakha miilli, Abishalomu aakhalla ni athwaaye omuttekoni woochema enkhosa o Baala hazori vakhuviru ni Efuremu. Vano aawiithana anamwani a amwene attheene wi yakhallewo.

²⁴ Abishalomu aaya wa amwene allota wi, “Amwene, mi oorumeyellaanyu kinaya kaphareke mutteko woochema enkhosa ni athwaaka. Keehina wakhalla wooworeya nikhalle attheene, nyu amwene ni oorumeyellaanyu.”

²⁵ Koma mwenooyo aamulleella Abishalomu wi, “Iyaayi mwanaka nihiyeewo attheene, ninaawuuhoose.” Aheeseesa mmu ni mmu omuwatihera koma Davide khaathaananillena. Koma Davide aamudalisa Abishalomooyo.

²⁶ Vano Abishalomu aallota wi, “Vawi nyuwaano khamuyaawo, mumwaakhullelle mwanamunnaka Aminoni nithaananena.” Nave mwenooyo aakoha wi, “Kaambiiwa tini onapaalleewe wi olliyooyo athaananena?”

²⁷ Koma Abishalomu aamuwatihera ophiyera Davide ahaakhullella wi Aminoni ni anamwana aallopwana attheene a mwenooyo eyeewo.

²⁸ Vano Abishalomu ahaalamula allupa muttekwaaye wi emuweheseseke Aminoni enthawi eyo anaalezeleeye ni vinyo. Kuulleellani wi, “Mwiipheni, mumwiiphe muhoove vawi tti miyaano kuulleelleni wi mweere yeeyo. Mullipe murima nave mukhalle wonanko allopwana.”

²⁹ Sika oomurumeyella Abishalomwaalle yaamweerella Aminoni moollikana ni mmo aalamulelle Abishalomu. Ddeereyille ddenndda anamwani attheene a mwenaalle yaavenya ewella enyuru* ddiwa ethawa.

³⁰ Koma athwaayo eri muttilla, Davide ahiiwa wi Abishalomu oowiipha anamwani a Davide aallopwana attheene nave khaavo naari mmodda ahanlle ni okumi.

³¹ Enthawi yeeyo mwenooyo ahaahulla ddoowara ddaye, iivokhella vatthi. Oorumeyellaaye ayo yaari vakhuviru, alliwattho yahaahulla ddoowara ddiwa.

³² Koma Yonadabu, mwaana a Shimea, mwanamunne a Davide, aamulleella wi, “Apwiya, muhinakhulupilila ddawi aniinyu attheene ahiiphiwa, Aminonive sika iiphiiwe. Nndda ddeereyille ekaamba ya onanariwa wa Abishalomu ovenyera nllapo nenne, Aminoni amuwatihereeye Tamara murokora a Abishalomu weerana ddoonanara.

³³ Ekaamba ya yeella apwiyaaka amwene muhinahoowa ni maganizo awi aniinyu aallopwana attheene ahiiphiwa. Aminonive sika iiphiwe.”

³⁴ Enthawi yeeyo Abishalomu aari athawille. Vano mmodda a alonda aawoona athu anchichi evenyeraka omusewuni wa Horanayimu, museresere mwa mwaango.

³⁵ Iiwalle ddenndda Yonadabu aamulleella mwenoolle wi, “Aniinyu enimawa moollikana ni mmo kuulleellelleemini.”

³⁶ Amallihaka wene ollota anamwani a mwenaalle yaakhumellella. Nave anamwanaayo yahaamba winlla moowelliha mawu. Vatulli viwa mwenooyo nayeenettho ahaamba winlla ni oorumeyellaaye.

³⁷ Abishalomu voothawani athawenlle wa mwene a o Geshuri, Talimai, mwaana a Amihudi. Nave Davide ahinllella malirwaayo mallapo manchichi.

³⁸ Abishalomu aakhalla o Geshuri miyakha miraru.

³⁹ Davidoolle akhurumusiwe murima va okhwa wa Aminoni, onanariwa waye waamalla nave khaapanllettho omuthwara Abishalomu.