2 Samuele 12 - Mawu a Mulluku

Othenga wa Davide ni orukunuwa murima waye

¹ Vatulli viwa Apwiya yaamuruma namallotella Natani wa Davide, aamulleella niphwanaphwaniho nawi, “M'muzindani mmodda mwaakhalla athu eelli, mmodda eeyuuma, mmodda oohoowa.

² Muthu eeyuumooyo aakhalla ni enkhosa ddinchichi ni eng'ombe ddinchichi.

³ Koma muthu oohoowoolle khaarina erive ello koma mwaanaankhosa aamutthiyana mmodda oyo amukullalleeye. Nave aanamuchiha mookaviherana ni anaaye ophiyera ahunnuwa. Mwaanaankhosooyo aanacha mwanayoocha ya muthooyo, owiryella kapu mmoddave. Mwaanaankhosooyo aanakona vakhuviru ni muthooyo nave akhalla wonanko mwanaye aamutthiyana.

⁴ Nllapo nimodda owaniwa wa muthu a eeyuumoolle waaphiya mulleto. Muthu eeyuumoolle khaapanlle okusa naari emodda mwa enkhosa ddaye naari emodda mwa eng'ombe ddaye wi amwiiphelle mulletwaayooyo. Koma akelle akusa enkhosa ya muthu oohoowoolle amwiiphella mulleto awiille owaniwoolle.”

⁵ Iiwalle dda muthooyo Davide aasha murima wunchichi. Aamulleella Natani wi, “Kinimallupella vamiitthoni va Apwiya muthu oyo eerille ddenndda anaphwanella iiphiwe.

⁶ Dda mwaanaankhosooyo ahokollose ddimodda ddisese ekaamba yaweera ddenndda. Navettho ekaamba yoohikhalla ni ethakaraka.”

⁷ Natani aallota wa Davide wi, “Muthooyothi tti nyuwaano. Apwiya Mulluku a Israele, enallota wi, ‘Miyaano kahuuzoza wi okhalle mwene a Aisraele nave kahuuvullusa m'mattani mwa Saulo.

⁸ Kahuuvaha nibanja na apwiiyo owaaka awariwa a apwiiyo wi ekhalle m'mattani mwawo nave kahuuvaha mutundu wa Aisraele ni nlloko na Yuda. Vano ddenndda dduuyevenlleke keerowoonjerera ddimodda ddinchichi.

⁹ Kaambiiwa tini ovevullalleewe mawu a Apwiya vaweerani ddoonanara vamiitthoni viwa? Woomwiipha Uriya Muhiti ni nsupada nave woomutthella mwaariye. Woomweeriha wi Aamoni emwiiphe.

¹⁰ Ekaamba ya yeella ekhoto khewa emalla vanibanjani vawo kaambiiwa wookivevulla miyaano nave woomutthella mwaara a Uriya Muhiti.

¹¹ Vano mi Apwiya kinallota wi kineerewuumorihella ddoonanara vanibanjani vawo vaavo. Kineerowaakha awariyo, weyaano woonaka, kimwinnye mukhwaawo nave aneerokona ni awariywaayo nndduwa noopaka!

¹² Weyaano weera ddenndda mwawiipittheya koma miyaano kinaaweere ddenndda otthaana, Aisraele attheene yoonaka.’ ”

¹³ Davide aallota wa Natani wi, “Kohaachimwella Apwiya.” Natani aallota wi, “Apwiya ahuukhululukellani machimwaanyu, khamukhwa.

¹⁴ Koma vawi vaweerani ddenndda mwahaavevulla Apwiya ni murima muttheene, mwaana oyo anaayariwooyo aneerokhwa.”

¹⁵ Vano Natani aarowa owaniwa. Vano Apwiya yaamullaka mwaana a Davide oyo ayariwe mwa mwaara a Uriya, wawi aavoriiwa wunchichi.

Okhwa wa mwaana a Davide

¹⁶ Sika Davide aamuvekellella mwaanooyo wa Mulluku. Aahalla ocha,* avollowa mpa, akonaatthi vatthi mahiiyu mattheene.

¹⁷ Attekweene a onyumbani waye yahiimella mukhwipi wi emuvenyihe. Koma olliye aakhoota ovenya nave athwaayo khaachillena yoocha.

¹⁸ Va nllapo naneetthanu ni piilli, mwaanooyo aakhwa. Oomurumeyella Davide yahoova omulleella wi mwaanooyo ookhwa. Yaallota wi, “Mwaanooyo aariiye mukumi, naanallotana Davide koma khaaniiwellella. Vano dda okhwa wa mwaanoolla ninaamulleelle mwawiidde? Namulleella ddawi mwaanooyo ookhwa aneerewiivoreya.”

¹⁹ Koma Davide awoonilleeye oorumeyellaaye enong'onellanaka, aadduwella wi mwaanoolle ookhwa. Sika ahaakoha oorumeyellaayaalle wi, “Ethiyo mwaanoolle ookhwa?” Oorumeyellaalle yahaakhulla wi, “Ee, ookhwa.”

²⁰ Davide aavenya vanthupini valle, ahapa, iihella makhura nave asintha ddoowara ddaye. Vano aavollowa mu enyumba ya Apwiya allapella. Vatulli viwa aaya owaniwa, iithaniha yoocha. Nave athu ewiillena yoocheelle, olliye aacha.

²¹ Vano oorumeyellaayaalle yaamukoha wi, “Nitthopoollelleni nndda mweerilleenyu tti ddawiidde? Mwaninyu aariiye mukumi nyuwaano mwaaninlla ni ohalla ocha. Koma akhwilleeye nyuwaano moovenya munacha yoocha.”

²² Davide aallota wi, “Mwanaka aariiye mukumi, kaanakhoota ocha nave kaaninlla vawi keehina, ‘Anadduwella ttaani, mwaamodda apaalle Apwiya ttuukeerella echifundo wi, mwaanooyo akhalle mukumi?’

²³ Koma vano mwaanooyo ookhwa. Yoohalleella ocha ttiivi? Ethiyo ttuuwora omuhokollosella okumi? Miyaano kineeroyaawo nko ayiilleeyewo koma olliye khawa ahokollweella wa miyaano.”

Oyariwa wa Solomoni

²⁴ Vano Davide aamukhurumusa murima mwaariyoolle Batesheba. Aakhalla ni mwaariyooyo nave aakonana. Vatulli viwa mutthiyanoolle aamuyara mwaana mullopwana nave Davide aamuvaha nnddina nawi Solomoni. Apwiya yaamukonda mwaanooyo.

²⁵ Nave yaarumiha mawu oweella mwa namallotella Natani wi mwaanooyo nnddina naye nikhalle Yedidiya kaambiiwa Apwiya yaamukonda.

Davide anaakha muzinda wa Raba

²⁶ Enthawi yeeyo Yowabu ni akhoto a Aisraele yaari ewanaka mu Raba, muzinda mwene Aamoni nave yahanlle vang'ono owaakha.

²⁷ Yowabu ahaarumiha amithenga wa Davide wi yamulleelle wi, “Kirina owana ekhoto mu muzinda wa Raba nave kohaakha ekhokwe ddiwa ddamaaddi.

²⁸ Vano nyuwaano mwaatthukumanihe akhoto oohallaayo, muwe muwaapheelle muzindoolla ni misasa dda akhoto wi muwaakhe, woova wi miyaano kaakha muzindooyo, onaaromolliweke ni nnddina naka.”

²⁹ Sika Davide ahaatthukumaniha akhotwaaye attheene, aya o Raba, yawanaka mu muzinda mmo, eneerowaakha.

³⁰ Vano Davide aarulla echipewa omuruni wa mwene a Aamoni. Echipeweeyo yallemella makilogaramu agolide ookhwaranya 30. Nave vachipewanimvo vaakhalla nlluku noowallamella mutengo. Davide aawara echipeweeyo, akusa ddawaakha okhotoni ddinchichi m'muzindanimmo.

³¹ Ahaakhumihamo athu m'muzindanimmo anaaphariha mutteko ni asaaha, mapiki ni akottokwa nave aanawoopiha enjerwa. Mmu sika eerelleeye ni mizinda ddittheddene dda Aamoni. Vatulli viwa Davide aahokollweella o Yerusalemu ni akhotwaaye.