2 Samuele 11 - Mawu a Mulluku

Ochimwa wa Davide

¹ Ephiyalle enthawi yeellimwe ya muyakha woothwarellella, enthawi eyo mamwene yayiiwa woowana ekhoto, Davide aamuruma Yowabu ni oohoollella amodda ni akhoto a Aisraele attheene. Yahaagonjiha Aamoni, yaapheella muzinda muttheene wa Raba ni misasa ddakhoto. Koma Davide aahalla o Yerusalemu.

² Nllapo nimodda misikuwa, Davide aavenya vabedini vaye, aneeta vaddullu va enyumbaaye yoomwene. Ari vaddullumvo aamoona mutthiyana ahapaka. Mutthiyanooyo aari ooreera wunchichi.

³ Sika Davide aamuruma muthu wi akohesese dda mutthiyanooyo wi ttaani. Nave muthooyo aamulleella wi, “Mutthiyanoolle tti Batesheba, mwaana a Eliyamu, mwaara a Uriya Muhiti.”

⁴ Sika Davide ahaarumiha amithenga wi yamukuse mutthiyanooyo. Yaawana wa Davide nave Davidooyo aakonana. (Enthawi yeeyo mutthiyanooyo aari amallihaka wene woona mweeri.)

⁵ Mutthiyanoolle oonille wi ookhalla ni muuthuuchi, aarumiha mawu wa Davide awi, “Mi kookhalla ni erukullu.”

⁶ Davide iiwalle ddenndda aamurumihella othenga Yowabu wi, “Omurumihe Uriya Muhiti awe wa miyaano.” Yowabu aamurumiha Uriyoolle wa Davide.

⁷ Uriya aphiyalle, Davide aamukoha mmo Yowabu aneerelleeye okhotoninko nave mmo athu enakhallelliiwa ni mmo ekhotweeyo eneetelliiwa.

⁸ Vano Davide aamulleella Uriya wi, “Khawe owaninyu wiithuuwe.” Uriya aakhuma o enyumba ya mwene nave mwenooyo aarumiha emphaso wa Uriya.

⁹ Koma Uriya akonille va mullako wa enyumba ya mwene ni allupa mutteko a apwinnya attheene. Owaniwa wulle khaayiillewo.

¹⁰ Athu yaamulleella Davide wi, “Uriyoolle owaniwa wulle khaayiillewo” Davidooyo aamukoha Uriya wi, “Ethiyo weyaano keesa onavenyera voolendoni? Kaambiiwa tini ohiyiilleewe owaninyu?”

¹¹ Uriya aamulleella Davide wi, “Nibokosi na echipangano, Aisraele ni Ayuda eri m'musasani. Nave apwiyaaka Yowabu ni akhoto a mwene enakona ohakani. Vano miyaano kiye owaani wi kache ni owirya nave kakone ni mwaaraka? Kinimallupella miyaano ngini keere ddennddo.”

¹² Vano Davide aamulleella Uriya wi, “Onaakhalle vaava ollello, osiisello kineerewaakhullella wi ohokollweellewo.” Sika Uriya aakhalla o Yerusalemu nllapo nenno ophiyera ohinase.

¹³ Davide aamwiithana Uriya wi ache ni owirya ni olliye nave aalezela. Koma misikuwa Uriya aaya akona vamodda ni allupa mutteko a mwene koma wohiyaawo owaniwa wulle.

¹⁴ Osaka wene ohinase Davide aamulembella Yowabu kalata, amwinnyera Uriya kalatooyo wi amuvelleelle.

¹⁵ Mukalatanimmo mwalembiwe wi, “Uriyooyo omuhiye vahoollo mvo vikatamihalle ekhoto nave omuhiye yeekha wi ahomiwe nave iiphiwe.”

¹⁶ Sika Yowabu aapheelleeye muzindooyo, aamuhiya Uriya vanipuroni mvo adduwenlleeye wi vookhalla akhoto amasiva.

¹⁷ Vano akhoto a m'muzindanimmo yaakhuma wi yawane ni Yowabu. Nave amodda a akhoto a Davide yahiiphiwa. Uriya Muhitoolle, nayeenettho ahiiphiwa.

¹⁸ Yowabu aamurumiha amithenga wi amulleelle Davide ddittheddene nnddo ddeereyille okhotoninko.

¹⁹ Aamulleella amithengooyo wi, “Wamalliha waalleella amwenaayo dda epilli ya ekhoto,

²⁰ nave amwenaayo yasha murima, enuukoha wi, ‘Kaambiiwa tini mwaatamenlleenyu muzinda wi mwawaneke ekhoto? Ethiyo khamwaadduwella wi eneerewuuhomani ovenyera vaddullu va mpanda?

²¹ Ethiyo Abimeleki mwaana a Yerubesheti amwiiphalle ttaani? Ethiyo amwiiphalle khahiyo mutthiyana, voomuphitteerani ni nlluku na nsillo ovenyera vaddullu va mpanda nave wi akhwenlle o Tebezi? Kaambiiwa tini mwaphiyeenyu vakhuviru ni esiri?’ Weyaano wallote wi, ‘Akhotwaanyu, Uriya Muhiti, nayeenettho ohiiphiwa.’ ”

²² Amithengoolle aayaawo, aphiya wa Davide, amulleella ddittheddene nnddo Yowabu amulleelleeye wi allote.

²³ Aamulleella Davide wi, “Adanaahu yaakhalla ni masiva manchichi onikhwaranya hiyaano yaakhuma enawana ni hiyaano otte. Koma hiyaano naawiikariha yaphiya va mullako wa mpandiiwa.

²⁴ Vano athu oovokha mipaamba yahaahoma akhotwaanyu ovenyera muddullu mwa mpanda. Nave akhoto amodda mwa akhotwaanyu yahiiphiwa. Akhotwanyoolle, Uriya Muhiti, ahiiphiwa.”

²⁵ Davide aamulleella amithengoolle wi, “Wamulleelle Yowabu wi, ‘Ddennddo ddihiwaapheellihe muru vawi anaakhwe khanadduwanyeya. Ollipihelle ollipana ni muzindooyo ophiyera owugonjihalle.’ Sika wamullipihe murima Yowabooyo.”

²⁶ Mwaara a Uriya iiwalleeye wi mamune ohiiphiwa aamwinllella.

²⁷ Mutthiyanooyo amallihalle omwinllella mamunooyo, Davide aamuruma muthu amukusa awaana o enyumba yoomwene. Nave Davide aamutthella. Mutthiyanooyo aamuyarella mwaana aamullopwana. Koma nnddo eerille Davide ddahaananara Apwiya.