2 Samuele 10 - Mawu a Mulluku

Davide anaagonjiha Aamoni ni Asiriya

¹ Vatulli viwa Nahashi, mwene a Aamoni, aakhwa nave Hanuni mwanaye aavollowa munipuroni mwaye.

² Vano Davide aallota wi, “Mi kineeromurumeyella Hanuni, mwaana a Nahashi, moororomelleya vawi attiitthinnya yaaroromelleya.” Sika Davide ahaarumiha oorumeyellaaye wi yamukhurumuse murima Hanuni ekaamba ya okhwa wa attiitthinnya. Vano oomurumeyella Davidooyo yaaphiya mu ellapo ya Aamoni.

³ Koma enduna dda Aamoni ddaallota wa Hanuni pwiyiiwooyo wi, “Ethiyo munaganiza wi Davide uurumihelleeyeni athu wi yuukhurumuseni murima vawaavahani olemu attiitthaanyu? Woohikhalla wi Davide aarumihalle oorumeyellaayaayo wa nyuwaano wi yaashaashe ni azonda muzindoolla nave vatulli viwa ewoononge?”

⁴ Sika Hanuni ahaaphara oorumeyellaayo aachema ereru ddiwa embali emoddamodda nave aaphadda variyari ddoowara ddiwa okomella muyuununi, aahokollosella owaniwa.

⁵ Davide iiwalle ddaweereyelle athwaalle, ahaaruma athu wi yakumanena vawi yaawullihiwa muru wunchichi. Vano mwene aallota wi, “Mukhalleve o Yeriko ophiyera ereru ddanyu ddimelle, vatulli viwa eweeke wuno.”

⁶ Vano Aamoni yoonilliiwa wi aamullika Davide yahaaruma athu wi yaalembe mutteko Asiriya a o Beterehobu ni a o Zoba, akhoto aweeta vatthi 20,000. Yaamulembattho mwene a o Maaka ni athwaaye 1,000 owaakattho athu a o Tobu 12,000.

⁷ Davide iiwalleeye ddenndda aamuruma Yowabu ni mulloko wa akhotwaaye amasiva attheene.

⁸ Vano Aamoni yaakhuma etthattana mizere ddakhoto voovollowellani o muzinda. Koma Asiriya a o Zoba ni a o Rehobu owaakattho athu a o Tobu ni a o Maaka yaari vaweekhiiwa o nipuro noohiipittheya.

⁹ Yowabu oonille wi akhotwaayo yaari amodda owiitthoni waye nave amodda otulli waye, ahaatthoolla akhoto amasiva variyari va Aisraele aatthattaniha moowehana ni Asiriyaayo.

¹⁰ Akhotwaaye amodda oohalla aahiyalle m'mattani mwa Abishai, mwanamunne nave ahaatthattaniha moowehana ni Aamoni.

¹¹ Vano Yowabu aallota wa Abishai wi, “Asiriya yakhalla ni masiva okikhwaranya miyaano, oneerokikavihera. Koma Aamoni yakhalla ni masiva wuukhwaranya, kineerewuukavihera.

¹² Llipa murima! Hanko nillipihelle owana ekhoto naateteze abalaahu ni mizinda dda Mullukwaahu. Nave opaalla wa Apwiya weereye.”

¹³ Sika Yowabu ni athu aariiyena yaawaatamella Asiriya wi yaambe owana. Nave Asiriyaayo yaathawa awoonaka.

¹⁴ Vano Aamoni yoonilliiwa wi Asiriya aathawa naalliwanittho yaathawa aphiyeeye Abishai. Eya yavollowa m'muzindani. Vano Yowabu aahiya owana ni Aamoni, ahokollweella o Yerusalemu.

¹⁵ Koma Asiriya yoonille wi Aisraele yohaagonjiha yahaatthukumaniha akhotwiiwa attheene.

¹⁶ Hadadezere mweniiwa ahaaruma amithenga wi yaakuse Asiriya ayo yaari vakhopella va muhinje wa Yufurate. Nave yaaphiyana o Helamu ni Shobaki, akhoto muullupalli a Hadadezere.

¹⁷ Davide iiwalle ddenndda ahaatthukhumiha akhoto attheene a Aisraele, amullapuwa Yordani yaphiya o Helamu. Sika Asiriya yaatthattana wi ewaneke ni Davide nave yaawanana.

¹⁸ Nave Asiriyaayo yahaathawa Aisraele. Davide ni akhotwaaye yaawiipha Asiriya aweetiha magareta 7,000 ni akhoto oowella va akavalo 40,000. Aamuphoriiha wunchichi Shobaki, akhoto muullupalli, wawi akhwella vaavo.

¹⁹ Vano mamwene mattheene ayo yamurumeyella Hadadezere, yoonilliiwa wi aagonjihiwa ni Aisraele, yaakeraatthiha murendelle nave yahaamba waarumeyella Aisraelaayo. Sika Asiriya yaanoova waakavihera Aamoni.