2 Samuele 1 - Mawu a Mulluku

Davide aniiwa dda okhwa wa Sauli

¹ Saulo akhwille Davide aawaawo wulle aagonjihalleeye Aamaleke nave aakhalla o Zikilagi mallapo meelli.

² Nllapo naneeraru aamoona akhoto oovenyera o mulloko wakhoto wa Sauli. Aawara matapwata nave ahiihella ethaya m'muruni mwaye wooniha omoriwa ethakaraka. Aphiyalle wa Davide aakokhora amuvaha olemu.

³ Davide aamukoha wi, “Onavenyera wuuwi?” Nave aamwaakhulla wi, “Kithawille omisasani dda akhoto dda Aisraele.”

⁴ Davide aamukohattho wi, “Ekhotweeyo eri mwawiidde wenko?” Nave akhotooyo ahaakhulla wi, “Akhotwaahu aathawa nave anchichi ahiiphiwa. Saulo ni mwanaye Yonatani alliwattho ahiiphiwa.”

⁵ Vano Davide aamukoha musombooyo wi, “Odduwenlle mwawiidde wi Saulo ni Yonatani aakhwa?”

⁶ Akhotoolle aallota wi, “Kaari vamwaangoni wa Gilibowa. Kiri vaavo kaamoona Saulo ahameelle nivaka naye. Nave adanaaye yaari emwaatamelle Saulooyo.

⁷ Vano Saulooyo arukunuwalle aakoona nave aakiithana. Kaayaawo nave kaamukoha eyo apaalleeye.

⁸ Saulo aakikoha wi, ‘Weyaano ttaani?’ Nave kahaakhulla wi, ‘Miyaano kiri Muamaleke.’

⁹ Vano aakilleella wi, ‘Kaatamelle nave kiiphe kaambiiwa kinnoona ovoreya wunchichi vawi nginakhwe.’

¹⁰ Sika kaamwatamella nave kaamwiipha vawi kaadduwella wi iikuha aneerokhwa. Vano kaamurulla omuruni echipewa yoomwenaaye owaaka ebangili m'muwononi mwaye. Nave koowaana wa nyuwaano, apwiya.”

¹¹ Enthawi yeeyo Davide aaphara ddoowara ddaye aahulla. Nave athu ayo yaari ni Davide yaheera emoddamoddave yeeyo.

¹² Vano athwaayo yahoopa ekutho, yahinlla nave yaahalla ocha* nllapo nittheene ophiyera misikuwa ekaamba ya okhwa wa Saulo ni mwanaye Yonatani. Yahinllattho ekaamba ya Aisraele, athu a Apwiya kaambiiwa yaari yiiphiwe okhotoninko.

¹³ Davide aamukoha akhotooyo wi, “Owaninyu tti wuuwi?” Olliye aallota wi, “Mi tti mwaana a mulleto, Muamaleke.”

¹⁴ Davide aamukohattho wi, “Yahiwoovihalle tti tini owiipha apwiya, oozoziwa* ni Apwiya?”

¹⁵ Enthawi yeeyo Davide aamwiithana mmodda a akhotwaaye amulleella wi, “Mukuse muthoolla wamwiiphe” Nave aamukusa amwiipha.

¹⁶ Vano Davide aallota wi, “Oddiiphihalle weekha vawi waallota wi, ‘Kaamwiipha oozoziwa a Apwiya.’ ”

Davide aniipa nchipo na maliro a Saulo ni mwanaye Yonatani

¹⁷ Davide ahiipa nchipo namaliro noomuupuwellana Saulo ni mwanaye Yonatani

¹⁸ nave aalamula wi nchipo nenna nahuddihiwe wa Ayuda attheene nave naalembiwa mu nibukhu na Yasara. Mawiine yaari awi ddiidda.

¹⁹ “We Israele, athwaawo ootitimiheya ekhwenlle vamiyaangoni, Mhu! Athu amasiva ekhwille mwawi ddiidda!

²⁰ Muhinallalleya ddenndda o Gati, muhinanivuwiha m'misewuni dda Ashikeloni wi atthiyana a Afilisti, oohiphaddiwa, ehinittheye.”

²¹ “Murimu naari nikame ddihiwe ddirupella va miyaango dda Gilibowa, emata ddittheddene dda vaava ddikhalle ddooguga. Vawi vaava adani yaavevulla yawiitetezella ya muthu amasiva, yawiitetezella ya Saulo eyo ehinapukutiweke ni makhura.”

²² “Muura wa Yonatani khonayeeke okhotoni, ohokollowa ohaaphoriihalle, ohaahomille athu amasiva, nsupada na Saulo khaninayeeke okhotoni, niwaawo nihiwiiphalle athu.”

²³ “Saulo ni Yonatani yaari ookondiwa ni oohakallalliha, okumiiwa muttheene kheyaamwallana nave yakhwiiwa yaari attheene. Yaari awaakuva okhwaranya epallame yampungu, amasiva okhwaranya mikango.”

²⁴ “Nyu atthiyana a mu Israele, mwinllelleni Saulo, kaambiiwa aheeriha wi muwareke ddoowara ddaphaama, ddoofiira, wi mureeriheke ddoowara ddanyu ni golide.

²⁵ Mhu! Athu amasiva ekhwille mwawi ddiidda! Yonatani ari llambii, akhwenlle va miyaango ddawo.

²⁶ Mukhwaaka Yonatani kinnuumoriwella ethakaraka, wookhalla ori mukhwaaka a vamurimani vaka. Echikondaawo va miyaano, yaari yoottikhiniha wunchichi, yaakhwaranya echikondi yaatthiyana.

²⁷ Mhu! Athu amasiva ekhwille mwawi ddiidda! Ezida ddiwa ddakhoto ddohoonongeya!”