2 Petro 3 - Mawu a Mulluku

Echisimikizo ya owa wa Apwiya

¹ Akhwaaka ookondiwa olla vano sika kalata aneepiilli oyo kuulembelleemini. Mu makalata meelli mattheenaalla kaheeseesa ollipiha maganizwaanyu voowuupusani dda ddeko ddenndda.

² Kinapaalla wi muupuwelle mawu yaallotiwe khalle ni anamallotella aweella navettho malamulo oovenyera wa Apwiya ni Oovullusa ayo yaavahiwe wa nyuwaano oweella mwa amurummwaanyu.

³ Yawaambeella, munaphwanella wi mwiiwesese wi mallapo oomallihellaalla athu amodda oolamuliwa ni minkhella ddiwa eneerewooneya. Eneeroweerellani epewe

⁴ nave eneerokoha wi, “Ethiyo Apwiinyu kheyaawuulonjezilleni wi eneeroowa? Eri wuuwi? Makhollwaahu aakhwa khalle nave erive ello tti wonanko mmo yaariiwa waambeella ophatusiwa wa ellapo yavatthi!”

⁵ Enatiwalla phudda ddawi khalle Mulluku mwawi malamula, aaphatusa oddullu ni ellapo yavatthi. Ellapo yavatthi yaaphatusiwa ovenyera omaaddini, mu ettilla ya maaddi,

⁶ nave ellapo yavatthi yakhalle yahoonongiwa ni maaddi yaayo, maaddi oosefukella.

⁷ Koma oddullu ni ellapo yavatthi erivweella ennasungiwa ni malamulo a Mulluku yaayo wi yoonongiwe ni munllo. Ddinnasungelliwa nllapo nno athu oohimullapella Mulluku eneeriiwa yeeruziwe ni woonongiwa.

⁸ Koma muhitiwalle ello emodda, akhwaaka ookondiwa! Khuwaavo ohiyana, wa nllapo nimodda ni miyakha 1,000 vamiitthoni va Apwiya. Wa olliye, piillinndda tti ddoophwanaphwana.

⁹ Apwiya khenaselliwa weera nnddo yalonjezilliiwa, wonanko mmo amodda enaganizeriiwa. Koma ennuuvillellani kaambiiwa khenapaalla wi arive muthu oonongiwe koma enapaalla wi attheene erukunuwe murima.

¹⁰ Koma nllapo na Apwiya nineerophiya wonanko mullupaawiiya. Va nllapo nenno oddullu oneeromalla ni okhuwa wuullupalli ni ddeko ddooddullu ddineerewoonongiwa ni munllo. Nave ellapo yavatthi ni ddeko ddittheddene dda mwemmo ddineerewooneya.

¹¹ Vawi ddeko ddittheddenenndda ddineerewoonongiwa mwawi ddiidda, munaakhalle athu a mutundu tini? Okumaanyu onaphwanella okhalle wa weella nave wawiivelleella wa Mulluku,

¹² mwaatiyeraka Nllapo na Mulluku nave mweeseeseke oneeriha wi niwe veneva. Nllapo nenna oddullu oneerewoosiwa ni woonongiwa nave ddeko ddooddullu ddineeronyeta ni oviha wa munllo.

¹³ Koma ninatiyera nnddo Apwiya yaanilonjezilliiwa, oddullu wanaanweene ni ellapo yavatthi yanaanweene, nko ori owaniwa wa echilungamo.

¹⁴ Sika vano, akhwaaka ookondiwa, mwaatiyeraka Nllapo nenno, mweeseese okhalla aweella ni oohikhalla ni yoochimwa vamiitthoni va Mulluku navettho okhalla ni murendelle ni olliyooyo.

¹⁵ Upuwellani wi ovillella wa Apwiihu wahuuvahani ekari yawi muvullusiwe wonanko mmo Paulo, mwanamunnihu ookondiwa, uulembelleeyeni voopharihani mutteko ezeru aavahiweeye ni Mulluku.

¹⁶ Ella sika analloteeye aalembaka mu makalataaye mattheene dda ddeko ddenndda. Ddookhallavo ddeko ddimodda ddookatamiha mu makalataaye nnddo ddinatthopoolliwa mwawoottha ni athu oohihuddera ni oohikeraattheya, wonanko mmo eneerelliiwa ni ddoolembiwa ddimodda mu mawu a Mulluku. Sika vaweerani ddiidda enaddoononga weekhiiwa.

¹⁷ Koma nyuwaano, ookondiwaaka, munnadduwella khalle yeella. Chenjerani, vano wi muhihollosiwe ni machimo a athu oohithwara malamulo wi muhitathille okeraattheya wanyu.

¹⁸ Koma muvirellelle wunnuwa mu echisomo ni odduwella dda Apwiya ni Oovullusa Yesu Khrisitu. Ntitimiho nikhalle ni olliye, Ollello ni enthawi yoohimalla! Amen.