2 Petro 1 - Mawu a Mulluku

¹ Ovenyera wa miyaano Simoni Petro, mullupa mutteko ni murummwa a Yesu Khrisitu. Kinalembella wa ayo evahiwe echikhulupililo yoowallamella ophwanaphwana ni yaahu oweella mu echilungamo ya Mullukwaahu ni Oovullusa Yesu Khrisitu.

² Echisomo ni murendelle ddaanjerereye wa nyuwaano oweella mu omudduwella wanyu Mulluku ni Yesu Apwiihu.

Wiithana ni otthoolla wa Mulluku

³ Masiva a Mulluku aanivaha hiyaano erive ello ninapaalleehu wi nikhalleke ni makhallello ookhulupilila oweella mu omudduwella oyo aaniithanille wi nikawanena mu ntitimiho naye nave mu ddaphaama ddaye.

⁴ Mu ettilla yeella oonivaha emphaso dduullupalli ni ddoowallamella alonjezilleeye. Ekaamba ya emphaso ddenndda muneerothawa minkhella ddoonanara ni ddawoononga dda mu ellapo yavattheella nave muneerokawanana makhallello a omulluku.

⁵ Ekaamba ya yeella llipihellani waanjerera ddaphaama va echikhulupilwaanyu, va ddaphaama ddanyu mwaanjererevo odduwella,

⁶ va odduwella wanyu mwaanjererevo wiihiiha, va wiihiiha wanyu mwaanjererevo ovillella, va ovillella wanyu mwaanjererevo makhallello ookhulupilila,

⁷ nave va makhallello ookhulupilila mwaanjererevo echifundo ya va ookhulupilila akhwiinyu nave va echifundweella mwaanjererevo echikondi.

⁸ Nave mwakhallana makhallello yaalla nave yaanjerereya mwa nyuwaano vano waadduwella wanyu Apwiya Yesu Khrisitu oneerophara mutteko nave oneerewiima ezipaso.

⁹ Koma ayo ehinna ddenndda tti oohoonesesa apaalle oohoona nave aatiwalla wi machimwiiwa akhalle aakhululukiwa.

¹⁰ Sika vano, asinnaka ni arokoraka, llipihellani wi wiithaniwa wanyu ni Mulluku ni wuutthoollani waye okhalle woohimalla. Mwavirellella weera ddiidda khamuwa mukwakwatuwa.

¹¹ Mwawi ddiidda muneerewaakhullelliwesesa ovollowa mu omwene woohimalla wa Apwiihu ni Oovullusaahu Yesu Khrisitu.

¹² Sika enthawi ddittheddene kineerekowuupusani dda ddeko ddenndda naari mudduwellaka khalle nave khamunatikheya mu yawoona mwaakhenlleenyu.

¹³ Miyaano kinnoona wi tti waphaama wi kiwuupuseni dda ddeko ddenndda enthawi kiriimi ni okumi.

¹⁴ Kinnadduwella wi kineerokhwa wonanko mmo Apwiihu Yesu Khrisitu yakilleellelliiwa moohikhuwa

¹⁵ Nave kineereweeseesa wi kiphwanye ettilla yawi naari kikhwille, muupuwelleke ddeko ddenndda enthawi ddittheddene.

Amboni antitimiho na Khrisitu

¹⁶ Hiyaano khanithwanre miyaha ddawiiwa vawuulleellani dda owa wuullupalli wa Apwiihu Yesu Khrisitu. Koma nahoona ottekweenaaye ni miitthwaahu.

¹⁷ Vawi aavahiwa ntitimiho ovenyera wa Mulluku Attiitthinnya, oyo anaromolliwa wi Ntitimiho Nuullupalli nave oyo allotille wa olliye wi, “Olla sika Mwanaka ookondiwa, mwa olliye kinnahakallalla wunchichi!”

¹⁸ Hiyaano weekhiihu naariihu ni olliye vamwaangoni waweella nahiiwa mawu yaalla ovenyera oddullu.

¹⁹ Sika ekaamba ya yeella ninnasimikiza wi othenga woollalleyiwa ni anamallotella tti wawoona. Mwathwara yoolla muneereweera phaama kaambiiwa tti wonanko enyali yoomolleella mu nipuro na epiphi ophiyera ohinase etheneeri ya thanda yawala m'mirimani mwanyu.

²⁰ Nave yoopaalleya mwa ddittheddene, upuwellani wi khaavo muthu anaawore otthopoolla yoollotelliwa mu mawu a Mulluku mwa yeekhaaye.

²¹ Vawi kheyiivo yoollotelliwa yawiille ovenyera wa ddoopaalla dda athu koma athu yahoollelliwa ni Munepa Waweella wi ellote othenga woovenyera wa Mulluku.