2 Mamwene 8 - Mawu a Mulluku

Mutthiyana o Shunemu anahokollweella owaniwa

¹ Elisha aari amulleellille mutthiyana olle amuvenyihelleeye mwanaye wi, “Timulla ni a va nibanja nawo wakhalle orive weko onaaworeewe vawi Apwiya enimawaana ettalla ya miyakha mitthanu ni miilli va ellapo.”

² Sika mutthiyanooyo aheera moollikana ni mmo muthu a Mulluku allotelleeye. Olliye ni a va nibanja naye yaaya yakhalla o ellapo ya Afilisti wa miyakha mitthanu ni miilli.

³ Vano ddimanlle miyakha mitthanu ni miillinnddo, mutthiyanooyo aawaawo o ellapo ya Afilisti wulle nave aahokollweella wa mwene a o Israele wookoha dda enyumbaaye ni emataaye.

⁴ Voophiyani aaphwanyille mwenooyo allotaka ni Gehazi oorumeyella a muthu a Mulluku, amukohaka wi, “Ngakilleelle dduullupalli nnddo Elisha enreeye.”

⁵ Mmo Oorumeyellooyo amulleelleeye mwene mmo Elisha amuvenyihelleeye muthu ookhwa, mutthiyana olle Elisha amuvenyihelleeye mwanaye aawa wi amukohe mwene dda enyumbaaye ni emataaye. Vaavo Gehazi aallota wi, “Nyu apwiyaaka amwene, mutthiyanoolle tti olla nave mwaana olle Elisha amuvenyihalleeye tti olla.”

⁶ Mwene amukohille mutthiyanooyo, olliye aamutthopoollella wi Elisha aamuvenyiha mwanaye. Sika mwenoolle aamukeraatthihella enduna ayilleella wi, “Omuhokolloselle ddittheddene nnddo ddaari ddaaye ni yoophuraaye ettheene yoovenyera mu ddoohata dda m'matani mwaye, waambeella nllapo nno avenyilleeyevo ophiyera ollello.”

Okhwa wa mwene Benihadadi

⁷ Nllapo nimodda Elisha aaya o Damasiko va enthawi eyo Benihadadi, mwene a o Siriya avoriiweeye. Mwenooyo iiwalle wi woowa muthu a Mulluku,

⁸ aamulleella Hazaele endunaaye yuullupalli wi, “Kusa emphaso oye wakumane ni muthu a Mulluku. Sika oveke ezeru wa Apwiya oyeella mwa olliye wi, ‘Ethiyo mwene aneerochira ereta yeella?’ ”

⁹ Sika Hazaele aaya akumana ni namallotella Elisha, areyille ekamira* 40 emphaso ni ddeko ddooddiva ddoohiyanahiyana dda o Damasiko. Aphiyalle, ahiimella vamiitthoni va Elisha, muthu a Mulluku, allota wi, “Mwaninyu Benihadadi, mwene a o Siriya ookiruma ni nikoho nawi ethiyo kineerochira ereteella?”

¹⁰ Nave Elisha aamwaakhulla wi, “Khawe wamulleelle wi, ‘Oneerochira.’ Koma Apwiya aakisimikizella wi aneerokhwa.”

¹¹ Eerille ddiiddo, Elisha aamuwehesesa Hazaele ophiyera aawulliwa muru. Vaavo Elisha ahaamba winlla.

¹² Vano Hazaele aamukoha wi, “Apwiyaaka, muninllella tini?” Olliye aamwaakhulla wi, “Kaambiiwa kinnadduwella ddoonanara nnddo munaweerelleenyu Aisraele. Muneerohella mipanda ddiwa ddakhoto nave muneerowiipha akhotwiiwa anchichi. Muneerewaanyingallella aniiwa nave muneerewaaphulla awariwa oorupalla.”

¹³ Vaavo Hazaele aakoha wi, “Ethiyo mi oorumeyellaanyu, oovevulliwa wonanko mwanapwa, ttuuwora mwawiidde weera ddeko dduullupalli wonanko ddenndda?” Elisha ahaakhulla wi, “Apwiya aakooniha wi we oneerokhalla mwene a Asiriya.”

¹⁴ Vaavo Hazaele aahiyana ni Elisha ahokollweella wa apwinnya ayo yaamukohille wi, “Ethiyo Elisha uulleelle ddawiidde?” Hazaele ahaakhulla wi, “Nyu muneerochira.”

¹⁵ Koma osaka wene, Hazaele aakusa nibulangete aniruweya m'maaddini amuhuruwellana mwene owiitthoni nave mwenooyo aakhwa. Sika Hazaele aavollowa omwene munipuroni mwiwa.

Yoramu mwene a o Yuda

¹⁶ Muyakha waneetthanu wa omwene wa Yoramu mwaana a Ahabu mwene a o Israele, Yehoramu mwaana a Yehoshafati mwene a o Yuda, ahaamba olamulella ellapo ya Yuda.

¹⁷ Yehoramu aari ni miyakha 32 voovollowani omwene nave aalamulella miyakha mitthanu ni miraru mu Yerusalemu.

¹⁸ Aheeta mu ettilla ddoonanara dda mamwene a o Israele wonanko mmo neerella nibanja na Ahabu vawi amutthenlle mwaana a Ahabu. Sika aaneera ddoonanara vamiitthoni va Apwiya.

¹⁹ Komave Apwiya kheyaapanlle omoononga Yuda ekaamba ya Davide oorumeyelliiwa vawi Apwiya yaalonjeza wi eneeromwinnya Davide omwene woohimalla.

²⁰ Va enthawi yeeyo athu a o Edomu yaawukila olamulello wa Yuda nave yahiitthoollella mweniiwa.

²¹ Vano Yehoramu aaya o Zairi ni magaretaaye attheene akhoto. Aatimulla mahiiyu aya aahella ekhoto Aedomu ayo yamwaaphenlle olliye vamodda ni oohoollella a magaretaaye. Akhotwaaye attheene yaathawella owaniwa.

²² Sika Aedomu tti oowukila olamulello wa Yuda ophiyera ollello. Va enthawi yeeyo muzinda wa Libina waawukilattho olamulellwaaye.

²³ Vano mitteko ddimodda dda Yehoramu ni ddittheddene addeerilleeye ddoolembiwa mu nibukhu na epilli ya mamwene a o Yuda.

²⁴ Vano Yehoramu aakhwa avitthiwa mu mahame mmo yavitthiwemo makhollwaaye mu muzinda wa Davide. Nave Ahaziya mwanaye aavollowa omwene munipuroni mwaye.

Ahaziya mwene a o Yuda

²⁵ Mu muyakha wa 12 wa omwene wa Yoramu, mwaana a Ahabu mwene a o Israele, Ahaziya mwaana a Yehoramu mwene a o Yuda ahaamba olamulella.

²⁶ Ahaziya aari ni miyakha 22 voovollowani omwene nave aalamulella muyakha mmodda o Yerusalemu. Amennya yaari Ataliya mwaana a Ahabu, edduullu ya Omuri mwene a o Israele.

²⁷ Olliye aathwara echisanzo ya nibanja na Ahabu, aneera ddoonanara vamiitthoni va Apwiya vawi aari mukamwene a mu nibanja na Ahabu.

²⁸ Mwene Ahaziya aaya ni Yoramu, mwaana a Ahabu wi amuhelle ekhoto Hazaele, mwene a o Siriya o Ramoti Giliyadi nko Asiriya yaamuphoreyihalliiwa Yoramu.

²⁹ Vano Yoramu aahokollowa aya o Yezireele wi yamuchirihe makhwataaye ayo Asiriya yaamuphoreyihalliiwa o Rama mvo awaneeye ni Hazaele mwene a o Siriya. Sika Ahaziya mwaana a Yehoramu, mwene a o Yuda aaya o Yezireele woomuzonda Yoramu mwaana a Ahabu ekaamba yawi aamavoriiwa.