2 Mamwene 7 - Mawu a Mulluku

¹ Elisha ahaakhulla wi, “Iwani mawu a Apwiya awi, ‘Osiisello enthawi wonanko yeella, makilogaramu mararu a othu waphaama eneerokullihiwa nikobiri nimodda nasiliva nave makilogaramu matthanu ni nimodda a bale eneerokullihiwattho nikobiri nimodda nasiliva va mullako wooya o Samariya.’ ”

² Vano mulangizi oororomelleya amwene aamukoha muthu a Mulluku wi, “Naari Apwiya aneena emurupihalle murimu munchichi mwawiidde, ddenndda ttuuweereya?” Nave Elisha aallota wi, “Ddawoona, oneeroddoona ddennddo ni miitthwaawo koma khoddicha.”

Athu amakate enallota dda othawa wa Asiriya

³ Enthawi yeeyo vaakhalla athu asese amakate ayo yakhalla voovollowella. Alliwaayo yahaamba okohana wi, “Kaambiiwa tini nikeraatthelleehu mva ninatiyerella okhwa?

⁴ Navollowa mu muzindammu nineerokhwa ni ettalla nakhallattho vaava, nineerokhwave. Vano hankoni niye o misasa dda Asiriya. Yaahiniipha, ddaphaamave koma yaniipha, kheviri ello.”

⁵ Sika yaatimullalle misikuwa oya o misasa dda Asiriya. Koma ephiyalle o malireni wa misasannddo, kheyamuphwannyewo naari muthu mmodda.

⁶ Apwiya yaaweeriha Asiriya wiiwa onyakulla wa magareta ni akavalo navettho mukhito wa mulloko wa akhoto variyari va akhoto a Asiriya. Sika yahaamba olleellana wi, “Ngiiwani onyakullanko, mwene a o Israele ohaalemba mamwene a Ahiti ni a Aiguputo wi enihelle ekhoto!”

⁷ Sika yaathawa misikuwa, ehiya misasa, akavalo, abulu ni katundwiiwa muttheene wonanko akhallelleeye, yaathawa wi evulluwe.

⁸ Vano allupa makataalle ephiyalle o malire wa misasannddo, yaavollowa m'musasani mmodda nave yaacha ni owirya. Yeerille ddiiddo, yaakusawo siliva, golide ni ddoowara, eya yaddivittha. Vatulli viwa, yaahokollowa eya yavollowa m'musasani mmoddattho, ekusamo ddeko, eya yaddivitthattho.

⁹ Sika yahaamba otakhellana wi, “Nineereehunndda khe ddaphaama. Ollello sika nllapo na othenga waphaama. Neera ellapo tuu ophiyera osiisello nineerollakiwa. Sika vano hankoni nalleelle enduna dda mwene.”

¹⁰ Sika yaaya o Samariya yawiithana alonda a voovollowella va muzinda yaalleella wi, “Hi nakelle o misasa dda Asiriya koma khenaamphwannyewo naari muthu mmodda. Naari wiiwa mawu kheniiwalle koma naphwanyille akavalo ni abulu eri oomaka navettho misasa ddiri monga mmo ddakhallelliiwa.”

¹¹ Vano alonda a voovollowella yaarumiha othenga o enyumba ya mwene.

¹² Vaavo mwene aavenya mahiiyu allota wa enduna ddaye wi, “Kuulleelleni nnddo Asiriya enikhozelleewa. Alliwa aadduwella wi hi nookhalla ni ettalla. Sika ekaambiiwa ekhumalliiwa m'misasani mwiwa yiipittha ohakani. Vano nakhuma m'muzindanimmu, eneeroniphara akumi ni waakha muzindoolla.”

¹³ Koma mmodda mwa enduna ddaye aallota wi, “Athu a m'muzindanimmu naanweene vaava eneerokhwattho wonanko Aisraele attheene ayo ekhwille khalle. Sika hankoni naatthoolle amodda wi ekuse akavalo atthanu oohalla, naarume wi yoone.”

¹⁴ Sika yahaatthoolla athu eelli oowella va akavalo nave mwene ahaaruma wi yathware mulloko wa akhoto wa Asiriya. Mwenooyo aallota wi, “Khaweni moone yeereyille.”

¹⁵ Athwaalle yahaathwara Asiriya ophiya o Yordani. Nave m'musewuni mutthemwene yaanaphwanyamo ddoowara ddiri millumillu ni katundu oyo Asiriya yamumorihiiwa voothawani mwawaakuva. Sika amithengaayo yaahokollowa yamulleella mwene.

¹⁶ Vano athu a o Samariya yaakhuma yaakha misasa dda Asiriya. Sika makilogaramu mararu a othu waphaama yaanakullihiwa nikobiri nimodda nasiliva nave makilogaramu matthanu ni nimodda a bale yakullihiwattho emoddamoddave moollikana ni mmo yallotelle Apwiya.

¹⁷ Ddeereyiiwa ddenndda, mwene aari amuhiyalle oorumeyellaaye wi alamulelleke voovollowella. Koma athu yaamunyingallella olliye woovollowella wulle mwawi aakhwa, monga allotelle Elisha muthu a Mulluku mwene ayiilleeye woomoona.

¹⁸ Nave ddaheereya monga allotelle Elisha ni mwene wi, “Makilogaramu matthanu ni nimodda a bale eneerewaakulliha nikobiri nimodda nasiliva nave makilogaramu mararu a othu waphaama wa tirigu eneerewaakullihattho nikobiri nimodda nasiliva osiisello enthawi wonanko yeella voovollowella o Samariya.”

¹⁹ Sika oorumeyella oororomelleya aamwaakhulla Elisha muthu a Mulluku wi, “Naari Apwiya mwaneena eniithellelle murimu awaata mwawiidde ddenndda ttuuweereya?” Mvo sika Elisha amulleellilleeye wi, “Oneerewoona ddenndda ni miitthwaawo koma khowa ocha.”

²⁰ Sika ddaamweereyella vawi athu yaamunyingallella voovollowella nave akhwenlle vaavo.