2 Mamwene 6 - Mawu a Mulluku

Elisha anampelluwiha kottokwa

¹ Nllapo nimodda athu amodda a m'mulloko wa anamallotella yaamulleella Elisha wi, “Ngoonani, nipuronna ninakumanelleehu nooniyevella wunchichi.

² Naakhulleni wi niye o Yordani nuuhe miteekho, arive muthu mmodda mmodda wi nipotokoselle nipuro nookhallamo.” Elisha ahaakhulla wi, “Vano khaweni.”

³ Vaavo mmodda a alliwa aallota wi, “Nithwareni oorumeyellaanyu.” Elisha ahaakhullella wi, “Hankoni.”

⁴ Sika Elisha aathaanana. Ephiyalle o Yordani, athwaalle yahaamba okakatha miteekho.

⁵ Nave mmodda akakathaka muteekho, kottokwaaye aakhulleya amorella m'maaddini nave ahinlla mookhuwa wi, “Kookhwa, apwiyaaka! Kottokwa yoolla tti oopolleya!”

⁶ Nave muthu a Mulluku aamukoha wi, “Ethiyo kottokooyo amorelle vaavi?” Aamutthoonyihella amorelleeyemvo nave Elisha aakakatha ekopo ayivokhella vamaaddinimvo nave kottokooyo aapelluwa.

⁷ Vano aamulleella wi, “Khawe wamukuse.” Muthoolle aattaphurusa nnatta naye amukusa.

Elisha anaweeriha akhoto a o Siriya okhalla oohoona

⁸ Enthawi emodda mwene a o Siriya awana ekhoto ni Aisraele. Nave aapangana ni alangizaaye wi yamake misasa ddiwa vaamodda viwa.

⁹ Koma Elisha aarumiha mawu wa mwene a o Israele wi, “Chenjerani, muhiyeewo o nipuro nawi yoori vawi Asiriya yiipitthalle wenko.”

¹⁰ Vano mwene a o Israele ahaarumihawo athu o nipuro nko muthu a Mulluku amulleelleeye. Mmu sika namallotella amuchenjezelleeye mwene wawi aavulluwa okavi.

¹¹ Mwene a o Siriya aanahooseya wunchichi m'murimani ekaamba ya ddenndda. Sika ahiithaniha enduna ddaye addikoha wi, “Ethiyo oohikilleella variyari vahumva muthu oyo anamukavihera mwene a o Israele?”

¹² Mmodda mwa endunannddo ahaakhulla wi, “Apwiya, khaavo naari mmodda, apwiya. Koma Elisha namallotella a o Israele sika anamulleella mwene a o Israele mawu ayo munalloteenyu okhwipi muchipindani mwanyu.”

¹³ Vano mwene aallota wi, “Khaweni moone nko anakhalleeye wi kaarumewo athu yamphare.” Athwaayo ewiillewo yaamulleella wi, “Ari o Dotani.”

¹⁴ Sika ahaarumihawo akavalo ni magareta, owaakattho mulloko muullupalli wa akhoto. Akhotwaayo yaphiyallewo mahiiyu yaapheella muzindooyo.

¹⁵ Vano oorumeyella a muthu a Mulluku avenyille ohinase akhuma vaatte, ahoona mulloko wa akhoto woowella va akavalo ni magareta, waapheelle muzinda muttheene. Sika olliye aahokollowa allota wi, “Kookhwa, apwiyaaka! Ethiyo neeredde?”

¹⁶ Elisha aallota wi, “Ohoove vawi ookhalla vamodda ni hiyaano tti anchichi okhwaranya mmo ekhallelle alliwa.”

¹⁷ Vano Elisha aavekella wi, “Nyu Apwiya, kinuuvekani wi mukhunuulle miitthwaaye, oone.” Sika Apwiya yaakhunuulla miittho a oorumeyellooyo ahoona mwaango oddanlle ni akavalo ni magareta amunllo emwaaphenlle Elisha.

¹⁸ Vano athu a o Siriya yaambeelliiwa omuhella ekhoto Elisha, olliye aavekella wa Apwiya wi, “Kinimuuvekani wi muweerihe athu yaalla wi ekhalle ohoona.” Sika Apwiya yaaweeriha akhotwaalle okhalla ohoona monga Elisha avekelleeye.

¹⁹ Nave Elisha ahaalleella akhotwaayo wi, “Ettilla khe yeella nave muzinda khe yoollattho. Kithwareni, kineerewuuphiyihani wa muthu munamwaasheenyu.” Sika Elisha ahaahoollella oya o Samariya.

²⁰ Evollowille mu muzinda wa Samariya, Elisha aavekella wi, “Nyu Apwiya, akhunuulleni miittho wi yoone.” Sika Apwiya yahaakhunuulla miittho yoona. Nave yoonille wi eri muwariwari mwa Samariya.

²¹ Vano mwene a o Israele awoonille akhotwaayo aamukoha Elisha wi, “Apwiyaaka, Ethiyo kiwiiphe? Ethiyo kiwiiphe?”

²² Elisha ahaakhulla wi, “Ohiwiiphe iyaayi. Ethiyo ttuuwiipha athu ayo waaphanreewe okaporo wawaneewena ekhoto? Iyaayi koma avaheni yoocha ni maaddi oowirya nave yavona eye wa pwiiwa.”

²³ Sika yahaakhozella machellello uullupalli. Echille ni owirya, mwene awaakhullella wi eroweke wa pwiiwa. Vatulli viwa, milloko dda akhoto a Asiriya yaahiya ohella ekhoto ellapo ya Israele.

Asiriya enaapheella muzinda wa Samariya

²⁴ Viviralle enthawi yoorekama, Benihadadi mwene a o Siriya aatthukumaniha mullokwaaye wa akhoto eya yaapheella Samariya ni misasa ddakhoto.

²⁵ Mu Samariya mwaakhalla ettalla yawoopiha ekaamba yawi Asiriya yahaapheella muzindooyo ni misasa ddakhoto, mwawi muru mmodda wa bulu wakulliwa makobiri asiliva 80. Nave manyaankhu a ekhunda oollemella magaramu 200 yakullihiwa makobiri matthanu asiliva.

²⁶ Nllapo nimodda mwene aviraka va mpanda wa muzinda, mutthiyana mmodda aamukhuwella wi, “Nyu apwiya, kikavihereni!”

²⁷ Vaavo mwenooyo aakoha wi, “Ethiyo Apwiya yaahuukavihera, vano mi kinaaddikuse wuuwi ddawuukaviherana? Ethiyo woohalla ello o nipuro nawuuputhella tirigu apaalle noovotella ezipaso ddampesa?

²⁸ Vano yuukatamihalle tti tini?” Olliye ahaakhulla wi, “Nllapo nimodda mutthiyanoolla aakilleella wi, ‘Mwiiphe mwanawo wi nimuche ollello, aaka nimuche osiisello.’

²⁹ Sika naamwaapeya mwanakooyo nimucha. Vano osaka wene kaamulleella wi, ‘Mwiiphettho mwanawo wi nimuche.’ Koma olliye aamuvittha.”

³⁰ Mwene iiwalle mawu a mutthiyanooyo, ahaahulla ddoowara ddaye.

³¹ Nave aallota wi, “Mulluku akiiphe ollello kaahiphadda muru wa Elisha mwaana a Shafati.”

³² Enthaweeyo Elisha aari mpa mwaye nave aari nimodda ni attekweene. Vano mwene aamuruma amithenga wi amukuse Elisha. Koma oorumiwooyo ahinaphiye, Elisha ahaalleella attekweenaalle wi, “Haa! Oowiipha atthoolle oomuruma muthu wi akiphadde muru. Aphiya amithengooyo, nyu muwalle nchiwi nave muniphare moollipiha wi ahivollowe. Ethiyo mukhito oniiweya vatulli vaye khohiyo wa pwinnya?”

³³ Elisha Olliye allotaka ni attekweenaayo, mwene aaphiya allota wi, “Yookatamiha yeella enavenyera wa Apwiya. Ethiyo yowaatiyerellattho Apwiya tti tini?”