2 Mamwene 5 - Mawu a Mulluku

Ochirihiwa wa Naamani

¹ Naamani aari akhoto muullupalli a mulloko wa mwene a o Siriya. Olliye aari muthu oororomelleya wunchichi ni ookondiwa ni apwinnya ekaamba yawi akhotwaaye yaanaagonjiha akhwiiwa vawi Apwiya yaanamuhoollella. Naamani aari muthu amasiva ni oollipa murima koma aari amakate.

² Enthawi emodda, athu a o Siriya yaamuphara namwalli a o Israele nko yahenlliiwawo ekhoto emutthattusa kaporo a mwaara Naamani.

³ Vano namwallooyo aamulleella mwaara Namaani wi, “Apwiyaaka yaariki wa namallotella a o Samariya eerewaachiriha makatiiwa.”

⁴ Naamani aaya wa pwinnya amulleella ddallotille namwalli a o Israele.

⁵ Sika mwene aallota wi, “Ee, khawe, mi kineeromulembella kalata mwene a o Israele.” Nave Naamani aatimulla oya o Samariya akusalle makobiri asiliva 30,000, agolide 6,000 ni ddoowara khumi ddoosintha.

⁶ Aphiyalle wa mwene a o Israele aamuvelleella kalata awi, “Mwaakhelleni kalatoolla. Vano oyo kuurumihelleeminooyo tti Naamani oorumeyellaaka nave kinapaalla wi mumuchirihe makataaye.”

⁷ Nave mwene a o Israele amweelengilleeye kalatooyo, ahaahulla ddoowara ddaye ekaamba ya ethakaraka allota wi, “Ethiyo mi tti Mulluku awiipha ni ohokollosella okumi wi muthu yoolla akilembelle mawu awi kichirihe makate a muthu? Tti yoodduwanyeya wi olliye anamwaasha namullota wi aambane ni mi.”

⁸ Koma namallotella Elisha iiwalleeye wi mwene a o Israele ahaahulla ddoowara ddaye, arumiha mawu wa mwenooyo wi, “Ethiyo mwaahullelle tini ddoowara ddanyu? Mulletooyo awe veneva wa mi aneerodduwella wi o Israele wookhalla namallotella.”

⁹ Sika Naamani aawa ni akavalwaaye ni magaretaaye iimella va mullako wa enyumba ya Elisha.

¹⁰ Elisha aamurumihella amithenga oyo amulleelle wi, “Khawe wahape m'muhinjeni wa Yordani otthanu ni opiilli nave muneerochira ni weellihiwa.”

¹¹ Koma Naamani aasha murima avenyavo aallota wi, “Ngoonani, mi kaganiza wi aneerokhuma, iimelle mvo nave avekelle mu nnddina na Apwiya Mullukwaaye, aneerotukhullellavo nnatta naye ni ochiriha makataayo.

¹² Ethiyo Abana ni Faripara mihinje dda o Damasiko, kheddinakhwaranya maaddi mattheene a o Israele? Yoohihapella tti tini wenko ni ochirihiwa?” Sika aarukunuwa avenyavo moonanariwa.

¹³ Koma oorumeyellaaye yaasusera vakhuviru emukoha wi, “Pepaani apwiya, ethiyo namallotella uulamulellekeni ello yuullupalli khamweere? Ethiyo tti yookatamiha ohapa wonanko mmo allotelleeye?”

¹⁴ Sika Naamani aakitthella o Yordani akhumbudda m'maaddinimmo otthanu ni opiilli monga namallotella alamulelleeye. Vaavo aachira nave mwiillaaye waakhalla wonanko wa mwaana, sika aachirihiwa.

¹⁵ Vatulli viwa Naamani ni athu attheene oomuvelleella, yaahokollweella wa namallotella a Mulluku. Aaphiya vamiitthoni va Elisha amulleella wi, “Ngoonani, mi vano koodduwella wi va ellapo ettheene khaawo Mulluku mmodda koma a o Israele. Vano akhellani emphasweella ovenyera wa mi kaporwaanyu.”

¹⁶ Koma Elisha aallota wi, “Kinimallupella vamiitthoni va Mulluku Ookumi oyo kinamurumeyelleemi, mi ngaakhella ddenndda.” Naamani aamuwatihera Elisha wi aakhelle emphasweeyo koma olliye aakhoota.

¹⁷ Vano Naamani aallota wi, “Mwaakhoota, mukaakhullelle mi kaporwaanyu wi kikusewo ethaya yookwakhwana otukhulliwa ni abulu eelli kirowekena. Vawi waambeella ollello mi ngiwa kivelleellakattho mukutho wooshellelliha apaalle orive mukutho wa mulluku mmodda koma wa Apwiya.

¹⁸ Apwiya ekikhululukelle va yeellave yawi apwiyaaka amwene yaayaaka woollapella o enyumba ya mullukwiiwa Rimoni, miyaano kinnathaanana nave kinnakokhora mu enyumba ya Rimoni. Apwiya ekikhululukelle mi oorumeyellaanyu.”

¹⁹ Elisha aamulleella wi, “Khawe waphiye phaama.”

Gehazi anallakiwa ni makate

²⁰ Koma Naamani eetille vang'ono, Gehazi oorumeyella a Elisha namallotella a Mulluku, aallota ni murima wi, “Apwiyaakaalla yoomuhiyerera Naamani Musiriya, voohaakhellani nnddo awiilleeyena wi avelleelle. Ngoonani, kinimallupella vamiitthoni va Mulluku, miyaano kineeromuthamakella wi kaakhellewo ello.”

²¹ Sika Gehazi aamuthamakella Naamani. Naamani oonilleeye wi muthu animamuthamakella, aakittha va nigareta naye wi amuchingamelle. Vano aamukoha wi, “Ethiyo tti waphaama?”

²² Gehazi aallota wi, “Ee, tti waphaama. Apwiyaaka aakiruma ekaamba yawi wookhumellella athu eelli a m'mulloko wa anamallotella ovenyera o ellapo yamiyaango ya Efuremu. Vano enuuvekani wi mwaakawellewo makobiri asiliva ookwakhwana 3,000 ni ddoowara piilli ddoosintha.”

²³ Vaavo Naamani aallota wi, “Kusa naari makobiri 6,000 asiliva.” Sika aamuwatihera, ahella m'mathumbani vamodda ni ddoowara ddoosintha piilli aareya oorumeyellaaye eelli. Nave yaahoolla etukhullalle, Gehazi anaathwara mutulli.

²⁴ Vano Gehazi aphiyalle omwaangoni nko waari enyumba ya Elisha, aawaakha oorumeyellaalle aahiya makobiraalle mpa mwaye. Nave ahaalleella wi eroweke.

²⁵ Vatulli viwa Gehazi aaya wa apwinnya. Elisha aamukoha wi, “Ethiyo Gehazi waari wuuwi?” Olliye ahaakhulla wi, “Oorumeyellaanyu khayiille orive weko.”

²⁶ Koma Elisha aamukohattho wi, “Ethiyo munepaaka khawaawuuvelleelle valle muthoolle akittheeye va nigareta wi uuchingamelle? Ethiyo yeella yaari enthawi yawaakhella makobiri ni ddoowara, emata dda olivi ni dda mmiddo wa mpesa, apaalle eziweto, akaporo aallopwana apaalle aatthiyana?

²⁷ Sika vano makate a Naamani eneerewuwanddeellella ni edduullu ddawo wa enthawi yoohimalla.” Sika Gehazi aakhuma mpammo ari ni makate awi puu wonanko ntuura.