2 Mamwene 3 - Mawu a Mulluku

Yoramu mwene a o Israele

¹ Muyakha wa 18 wa omwene wa Yehoshafati mu ellapo ya Yuda, Yoramu mwaana a Ahabu aavollowa omwene wa o Israele o Samariya nave aalamulella miyakha khumi ni miilli.

² Yoramu aheera ddoonanara vamiitthoni va Apwiya koma ochimwa waye khawaaphwanaphwanne ni wa attiitthinnya ni amennya Yezebele. Olliye aakumulla nifano na Baala nno attiitthinnya yamakilliiwa.

³ Komave aawanddeellella weera ddoochimwa nnddo eera Yerobowamu, mwaana a Nebati nnddo aachimwihalleeyena Aisraele ohipaalla oddihiya naari vang'ono.

⁴ Khalle Mesha, mwene a o Mowabu aanaweta enkhosa. Nave orive muyakha aanakhoma musonkho wa mwene a o Israele voovelleellani asaanaankhosa 100,000 ni mapururu a anankhoro ankhosa 100,000.

⁵ Mwene Ahabu a Israele akhwille, Amowabu yahaawukila Aisraele.

⁶ Sika mwawaakuva mwene Yoramu aavenyawo o Samariya, aatthukumaniha akhoto attheene a Aisraele.

⁷ Sika olliye aarumiha mawu wa Yehoshafati mwene a o Yuda wi, “Mwene a o Mowabu ookiwukila. Ethiyo khokithwara okhotoni wi nawane ni Amowabu?” Vano Yehoshafati ahaakhulla wi, “Kineeroyaawo. Mi ni weyaano niri amodda, athwaaka tti aawottho, akavalwaaka tti aawottho.”

⁸ Vano aakoha wi, “Ethiyo niweelle ettilla eevi vooyaani okhotoninko?” Yoramu ahaakhulla wi, “Niweelle o echipululu ya Edomu.”

⁹ Sika mwene a o Israele ni mwene a o Yuda owaakattho mwene a o Edomu attheenaayo yaayaawo nimodda. Nave yeetille mwawaapheella mu echipululu mallapo matthanu ni meelli, maaddi awi akhoto ni enama ddiwa ddiwirye kheyaariwo.

¹⁰ Vano mwene Yoramu aakhuwa wi, “Otulli! Apwiya aaniithana hiyaano mamwene mararu wi enivelleelle m'mattani mwa Amowabu.”

¹¹ Vaavo mwene Yehoshafati aakoha wi, “Ethiyo wuno khaawo namallotella wi anikavihere oveka ezeru wa Apwiya?” Muthu mmodda mwa oohoollella mulloko wakhoto wa mwene Yoramu ahaakhulla wi, “Okhallawo, Elisha, mwaana a Shafati oyo aari oomukavihera Eliya.”

¹² Vaavo Yehoshafati ahaakhulla wi, “Elisha sika namallotella awoona a Apwiya.” Sika mamwenaalle yaaya wa namallotella Elisha.

¹³ Vano Elisha aamukoha Yoramu wi, “Munaashawo tini owanihu wuno? Khaweni wa anamallotella a attiitthaanyu ni a ameenyu yavekiiwawo ezeru.” Koma Yoramu aallota wi, “Iyaayi vawi Apwiya sika eniithanille hiyaano wuno wi enivelleelle m'mattani mwa Amowabu.”

¹⁴ Elisha aallota wi, “Kinimallupella vamiitthoni va Apwiya Amasiva Mattheene wi ahaariki Yehoshafati, mwene a o Yuda oyo kinamuvaheseemi olemu, ngaawuupwatheni naari vang'ono.

¹⁵ Koma vano mukiithanelle muthu oodduwella wiipa phaama zeze.” Awiipa zeze awiille, ahiipa nave masiva a Apwiya yaawa va Elisha.

¹⁶ Vano aallota wi, “Apwiya enallota wi, ‘Katani malliti m'muhinjeni woowelleelloolla.

¹⁷ Khamuwa moona ephevo apaalle murimu komave muhinjoolla oneeroddalla ni maaddi nave muneerowirya nyu ni eziweto ddanyu.’

¹⁸ Nave ella tti yooyeva vamiitthoni va Apwiya. Alliwa eneerewaavelleellattho Amowabu m'mattani mwanyu.

¹⁹ Muneerogonjiha mizinda ddiwa ddittheddene ddamipanda ni ddaphaama. Muneerophadda miteekho ddaphaama ddittheddene waatiyella aneetuutu attheene nave muneerewoononga emata ddiwa ddittheddene dda ethaya yaphaama voovokhellamoni malluku.”

²⁰ Osaka wene, enthawi yoovelleella mukutho yaatamenlle, yahoona maaddi ekhumaka ovenyera o Edomu ophiyera nipuronno naaddalla ni maaddi.

²¹ Vano Amowabu yiiwalle wi mamwene mararu yaawa wi ewane ekhoto, yaawiithana athu attheene oowora owana ekhoto waambeella mung'onong'ono ophiyera muullupalli nave attheene yaatthattana m'malireni.

²² Amowabu evenyille ohinase nndduwa noopelliiwa vamaaddini yahoona maaddi efiiralle wonanko nikhame vahoollo viwa.

²³ Vano yaallota wi, “Ngoonani nikhame! Mamwenaalle aawana anayaayove nave akhotwiiwa ahiiphanana. Hankoni nakumulle misasa ddiwa.”

²⁴ Koma Amowabu yaphiyalliiwa omisasani dda Aisraele, Aisraelaayo yahaahella ekhoto nave yahaamba othawa. Koma Aisraele yaanawiipha Amowabwaayo voowiikarihani.

²⁵ Vano Aisraele yaakumulla mizinda ddiwa nave va erive emata ya ethaya yaphaama, arive muthu aanavokhellavo nlluku, ophiyera emata ddittheddene ddaaddalla ni malluku. Yahaatiyella aneetuutu attheene nave yahuuha miteekho ddittheddene ddaphaama. Wahanlle tti muzinda wa Kiri Haresefi koma vatulli viwa, akhoto oovokha malluku yaawaapheella ewugonjiha.

²⁶ Mwene a Amowabu oonilleeye wi ekhoto yohaananarella, ahaakusa athu 700 amasupada wi ethawe voovirani variyari va akhoto oya wa mwene a o Edomu koma yaalephela.

²⁷ Sika aamuphara mwanaye awaamba oyo aphwanenlle ovollowa omwene munipuroni mwaye amuvelleella mukutho wooshellelliha wa mulluku a Amowabu va mpanda wa muzinda. Ddenndda ddaawiiha owalli wuullupalli va Aisraele mwawi alliwa yaamuthawa mwenooyo ehokollweella o ellapo yoowaniwa.