2 Mamwene 25 - Mawu a Mulluku

Woonongiwa wa Yerusalemu

¹ Va muyakha waneetthanu ni sese wa omwene wa Zedekiya, nllapo naneekhumi na mweeri, Nebukadinezara mwene a o Babiloni aawa ni akhotwaaye attheene wi ehelle ekhoto muzinda wa Yerusalemu. Nave yaawaapheella virive veko ni misasa owaaka mikhuttu ddakhoto.

² Sika muzindooyo wahaapheelliwa muyakha waneekhumi ni mmodda wa omwene wa Zedekiya.

³ Vano va nllapo naneetthanu ni sese mweeri waneesese wa muyakha yooyo, ettalla yunnuwalliiwa wunchichi m'muzindanimmo ophiyera wi athu kheyaarina yoocha,

⁴ mpanda wa muzindooyo waaphovolliwa. Naari Ababiloni yawaapheelle muzindooyo komave akhoto attheene yaathawamo mahiiyu vookhumellani va mullako wa variyari va esiri piilli, vakhuviru ni emata ya mwene. Nave yaathawella o Araba.

⁵ Koma akhoto a Ababiloni yaamuthwara Zedekiya ophiyera yaamphara o matapo a Yeriko. Nave akhotwaaye yaapallalleya emuhiya.

⁶ Empharille, yaamuyaana wa Nebukadinezara mwene a o Babiloni, o Ribula nko akamunlleeye mullatwaaye.

⁷ Yaawiipha anaaye attheene a Zedekiya olliye oonaka nave yaamukhumihamo miittho, emmaka ni onyolo emuyaana o Babiloni.

Woonongiwa wa enyumba ya Apwiya

⁸ Nllapo naneetthanu ni piilli, mweeri waneetthanu, muyakha wa 19 wa omwene wa Nebukadinezara a o Babiloni, Nebuzaradani, muullupalli a alonda akhoto aawa o Yerusalemu.

⁹ Nave ahoosa enyumba ya Apwiya, enyumba yoomwene ni enyumba ddimodda ddittheddene dda o Yerusalemu, erive enyumba yuullupalli aayoosa.

¹⁰ Olliye ni akhotwaaye attheene a o Babiloni yaakumulla esiri ddittheddene dda Yerusalemu.

¹¹ Voomallihella Nebuzaradani, oohoollella a alonda akhoto ahaapharella wuukaporoni o Babiloni athu oohalla m'muzindani ni ayo yiivelleelle wa olliye.

¹² Koma ahaahiya athu amodda oohoowesesa a mwiillaponimmo wi ellimeke emata ddampesa ni emata ddimodda.

¹³ Ababiloni yahinttaka mu enyumba ya Apwiya apoto, nibeseni namukuwa ni meto ddiwa ewukusella mukuwa muttheene o Babiloni.

¹⁴ Yaakusattho embale moomorellamo ntuura, mafosholo ddoothimihera enyali, embale ddawoosellamo lubani,* makapu ni ddeko ddittheddene ddamukuwa nnddo ddapharihiwa mutteko o enyumba ya Apwiya.

¹⁵ Muullupalli a alonda akhotoolle aakusattho eziwaya ddoovallella munllo, embale ddoomiddella ni ddeko ddimodda ddittheddene ddagolide ni ddasiliva.

¹⁶ Apoto eelli, nibeseni ni meto ddiwa nnddo Solomoni apangelleeye mu enyumba ya Apwiya ddaari ddoollemella wunchichi.

¹⁷ Arive opoto arekamme mamita matthanu ni mararu nave awaapheella mamita matthanu ni hafu. Aakhalla ni mulliha muwari, ahiitivalla eyaalla ddisese. Aakhalla ni muru wamukuwa woorekama mamita meelli, wawaapheelliwa ni ddooreeriha dda ezipaso ddamakangaza.

Athu a o Yuda enapharelliiwa o Babiloni

¹⁸ Sika Nebuzaradani muullupalli a alonda aamuphara Seraya muullupalli a allupa mukutho, Zefaniya, aneepiilli wa muullupalli a mullupa mukutho ni alonda araru a va mullako wa enyumba ya Apwiya.

¹⁹ M'muzindanimmo aampharamo akhoto muullupalli ni athu atthanu ayo yaari alangizi a mwene. Aampharattho namalembella a akhoto muullupalli oyo aalemba athu mwiillaponimmo navettho attekweene amodda 60 ayo yaari m'muzindammo.

²⁰ Nebuzaradani, muullupalli a alonda akhoto ahaakusella attheene wa mwene a o Babiloni o Ribula.

²¹ Nave mwene a o Babiloni aalamula wi ewuukuthe ni owiiphella o Ribula mu echigawo ya Hamati. Sika athu a o Yuda yaaphariwa okaporo waavenyiha mwiillaponi mwiwa.

Gedaliya kazembe a o Yuda

²² Nebukadinezara mwene a o Babiloni aamutthoolla Gedaliya, mwaana a Ahikamu, mwaana a Shafani, wi akhalle oolamulella a athu oohalla ayo olliye aahiyalleeye o Yuda.

²³ Sika akhoto uullupalli a Ayuda ni akhotwiiwa attheene yathawille yiiwalle wi mwene a o Babiloni oomukeraatthiha Gedaliya wi akhalle oolamulella, yaawa wa Gedaliya o Mizipa. Alla yaari Ishmaele mwaana a Netaniya, Yohanani mwaana a Kareya, Seraya mwaana a Tanihumeti a o Netofa ni Yazaniya mwaana a Maakati.

²⁴ Gedaliya ahaallupellella alliwa ni athwiiwa wi, “Muhoove ekaamba ya oohoollella a Ababiloni. Khallani mwiillaponimmu, mumurumeyelleke mwene a o Babiloni nave ddeko ddittheddene ddineerekoweetellani phaama.”

²⁵ Koma va mweeri waneetthanu ni piilli Ishmaele mwaana a Netaniya, mwaana a Elishama, a o nibanja noomwene aawa ni athu khumi. Nave yaamuhella ekhoto Gedaliya, emwiipha owaakattho Ayuda ni athu a o Babiloni ayo aariiyena o Mizipa.

²⁶ Vaavo Aisraele attheene eeyuuma ni oohoowa vamodda ni akhoto uullupalli yaaya o Iguputo vawi yaanawoova Ababiloni.

Okhululukelliwa wa mwene Yehoyakini

²⁷ Va nllapo na 27 na mweeri waneekhumi ni piilli m'muyakha wa 37 wa okaporo wa Yehoyakini mwene a o Yuda, Evili Merodaki mwene a o Babiloni avollowille wene omwene, aamweerella echifundo Yehoyakini voomukhumihani mundende.

²⁸ Aallotana mweechifundo, amuvaha nipuro noolemu waakhwaranya mamwene mamodda mattheene aariiyena o Babiloni.

²⁹ Sika Yehoyakini aarulla ddoowara ddaye ddoondende nave nllapo ni nllapo aanacha ni mwene va okumaaye muttheene.

³⁰ Nllapo ni nllapo mwene a o Babiloni aanamuvaha Yehoyakini erive ello apaalleeye ophiyera okhwa waye.