2 Mamwene 24 - Mawu a Mulluku

¹ Mu enthawi ya Yehoyakimu, Nebukadinezara mwene a o Babiloni aahella ekhoto ellapo ya Yuda nave Yehoyakimu aawatiheriwa omurumeyella wa miyakha miraru. Koma vatulli viwa aamuwukila Nebukadinezara.

² Sika Apwiya yaarumiha milloko ddakhoto dda Ababiloni, dda Asiriya, dda Amowabu ni dda Aamoni wi yamuhelle ekhoto Yuda ophiyera woononga ellapweeyo moollikana ni mmo Apwiya yallotilliiwa oweella mwa oorumeyelliiwa anamallotella.

³ Ddawoona, ddenndda ddaheereya o Yuda moollikana ni mmo Apwiya yalamulelliiwa. Yahaavenyiha Ayudaayo vamiitthoni viwa, ekaamba ya machimo ayo mwene Manase eerilleeye

⁴ navettho ekaamba ya nikhame na athu oohichimwa ayo awiiphalleeye. Olliye aaddalliha Yerusalemu ni nikhame na athu oohichimwa nave Apwiya kheyaamukhululukelle.

⁵ Vano mitteko ddimodda dda Yehoyakimu ni ddittheddene eerilleeye ddoolembiwa mu nibukhu na epilli ya mamwene a o Yuda.

⁶ Sika Yehoyakimu aakhwa, avitthiwa mu mahame a makhollwaaye. Nave Yehoyakini mwanaye sika avollowille omwene munipuroni mwaye.

⁷ Enthawi yeeyo mwene a o Iguputo khaakhumallettho mwiillaponi mwaye vawi mwene a o Babiloni aari aakhille ellapo ddittheddene dda mwene a o Iguputo ovenyera o muhinje wa o Iguputo ophiya o muhinje wa Yufurate.

Yehoyakini mwene a o Yuda

⁸ Yehoyakini aari ni miyakha 18 avolloweeye omwene nave aalamulella miyeri miraru o Yerusalemu. Amennya yaari Nehushita, mwaana a Elinatani a o Yerusalemu.

⁹ Yehoyakini aheera ddoonanara vamiitthoni va Apwiya voothwarani ddittheddene nnddo yeera attiitthinnya.

¹⁰ Enthawi yeeyo akhoto a Nebukadinezara mwene a o Babiloni yaawa o Yerusalemu ewaapheella muzindooyo ni misasa ddakhoto.

¹¹ Nave Nebukadinezara mwene a o Babiloni aaphiya o muzindanko enthawi eyo akhotwaaye yawaapheelliiwa.

¹² Sika Yehoyakini mwene a o Yuda ni amennya, alangizaaye, enduna ddaye ni attekweene a o enyumbaaye yahiivelleella wa mwene a o Babiloni. Mwene a o Babiloni aamuphara Yehoyakini okaporo m'muyakha waneetthanu ni raru wa omwenaaye.

¹³ Ahaakha eyuuma ettheene ya o enyumba ya Apwiya ni ya o enyumba yoomwene Ahoononga eziwiya ddittheddene ddagolide dda o enyumba ya Apwiya nnddo Solomoni mwene a o Israele addipangilleeye.

¹⁴ Ahaaphara athu attheene a o Yerusalemu monga enduna ddittheddene ni athu attheene amasiva ookwakhwana 10,000. Ahaapharattho athu attheene eeruso ni oohana mikoko. Khaahanllevo naari mmodda waapatula athu oohoowave a mwiillaponimmo.

¹⁵ Nebukadinezara aamuphara okaporo Yehoyakini o Yerusalemu amuyaana o Babiloni vamodda ni amennya, awariye, enduna ddaye ni athu oovuwa a mwiillaponimmo.

¹⁶ Sika mwene a o Babiloni ahaaphara okaporo athu attheene amasiva 7,000, eeruso ni oohana mikoko 1,000. Attheenaayo yaari allopwana amasiva, oodduwella owana akhoto.

¹⁷ Nave mwene a o Babiloni aamuzoza omwene Mataniya, apwinnya Yehoyakini, munipuroni mwaye nave aasintha nnddina naye wi akhalle Zedekiya.

Zedekiya mwene a o Yuda

¹⁸ Zedekiya avollowille omwene ari ni miyakha 21 nave alamulelle miyakha khumi ni mmodda o Yerusalemu. Amennya yaari Hamutala, mwaana a Yeremiya a o Libina.

¹⁹ Zedekiya aheera ddoonanara vamiitthoni va Apwiya wonanko Yehoyakimu.

²⁰ Ekaamba ya ddittheddene ddeereyille o Yerusalemu ni o Yuda, Apwiya yaasha murima wunchichi ophiyera owiikariha athwaayo vamiitthoni viwa. Vano Zedekiya aamuwukila mwene a o Babiloni.