2 Mamwene 23 - Mawu a Mulluku

Yosiya anahokollosella mallapello a Apwiya

¹ Vano mwene Yosiya ahaatthukumaniha attekweene attheene a o Yuda ni a o Yerusalemu.

² Nave mwenooyo aaya o enyumba ya Apwiya ni athu attheene a o Yuda ni a mu Yerusalemu, allupa mukutho ni anamallotella navettho athu attheene uullupupalli ni ang'onong'ono. Vano olliye aheerenga vamiitthoni viwa mawu mattheene a mu nibukhu na echipangano naphwanyeye mu enyumba ya Apwiya.

³ Vano mwenooyo ahiimella va opoto woomwene nave aakeraatthiha echipangano vamiitthoni va Apwiya wi aneerothwara ettilla dda Apwiya nave wi aneerewiiwellella malamulwiiwa ni malangizwiiwa ni murimaaye muttheene navettho ni okumaaye mutthewene nave wi aneereweera mawu a mu echipangano ayo elembiwe munibukhuninna. Sika athu attheene yahaakhullella othwara echipanganweeyo.

⁴ Sika mwene Yosiya aamulamula Hilikiya mullupa mukutho muullupalli navettho allupa mukutho aneepiilli wa olliye ni alonda a va mullako wi evenyihemo mu enyumba ya Mulluku ddeko ddittheddene ddoollapellana mafano a Baala, a Asherimu ni a etheneeri. Ddittheddenennddo aaddoosella otte wa Yerusalemu, o emata dda o Kidroni nave ntuura niwa yaayaana o Betele.

⁵ Yosiya ahaakhumiha allupa mukutho a mafano ayo mamwene a o Yuda yaatthoollilliiwa wi eheraatthiki mikutho o mapuro oollapellamo mafano o mizinda dda mu ellapo ya Yuda ni mizi ddawaapheella Yerusalemu. Ahaakhumihattho ayo yaheraatthi mikutho wa Baala, nndduwa, mweeri, etheneeri ni ddeko ddittheddene dda oddullu.

⁶ Aavenyiha nifano na Asherimu mu enyumba ya Apwiya, ayaana otte wa Yerusalemu o muhinje wa Kidroni. Aanoosella wenko, anisillasilla ni otathilla ntuura niwa va mahame a athu shisha.

⁷ Aakumulla enyumba dda allopwana ooraruwa voollapellani nnddo ddaari mu enyumba ya Apwiya, o nipuro nko atthiyana yasowiiwawo mikanjo ddoowara athu oomullapella Asherimu.

⁸ Yosiya aawaana allupa mukutho o Yerusalemu ovenyera o mizinda dda Yuda, ahoononga mapuro oollapellamo mafano nko allupa mukuthwaalle yaheraatthiiwawo mikutho, ovenyera o Geba ophiya o Beeresheba. Aakumulla mapuro mattheene oollapellamo mafano ayo yaari voovollowella va mullako wa Yoswa, enduna ya muzindooyo. Nipuronna naari wuunyotthoni wa mullako wa muzindooyo.

⁹ Allupa mukutho a o mapurwaayo kheyaakhullelliwe wi ephiye o nikuwa na Apwiya o Yerusalemu komave yaanachana buledi oohikhalla ni yisiti ni allupa mukutho akhwiiwa.

¹⁰ Mwene Yosiya ahoonongattho nipuro namukutho na Tofeti eyo yaari mu ntapo na anamwani a Hinomu wi arive muthu ahimuvelleelle mwanaye aamullopwana apaalle aamutthiyana wi okhalle mukutho wa Moleki.

¹¹ Ahaavenyihattho akavalo ayo mamwene a o Yuda yaavelleelliiwa wa nndduwa. Akavalo yaayo yasungiwa va nthato ni na enyumba ya Apwiya vakhuviru ni voovollowella mu enyumba navettho echipinda ya Natani Meleki, muttekweene oororomelleya a mwene oowehera enyumbeeyo. Navettho aawoosa magareta oollapellana nndduwa.

¹² Vatulli viwa mwene aakumulla makuwa a vaddullu va echipinda yavaddullu ya Ahazi ayo yamakiwe ni mamwene a o Yuda navettho makuwa ayo Manase aamakilleeye va mathato meelli a enyumba ya Apwiya. Nave aatathilla nthupi niwa m'muhinjeni wa Kidroni.

¹³ Vatulli viwa mwenooyo ahoonongattho mapuro oollapellamo mafano ayo yaari wookhumella nndduwa wa Yerusalemu, omwera wa mwaango wa Woonongeya. Makuwaayo Solomoni, mwene a o Israele ahaamakella nifano noonanara na Asidoni nooromolliwa Ashitoreti ni na Amowabu nooromolliwa Kemoshi navettho na Aamoni nooromolliwa Milikomu.

¹⁴ Aakumullattho apoto oopatuleya ni mafano a Asherimu mattheene nave va mapuro viwa aamwaravo makhuva a athu ookhwa.

¹⁵ Yosiya aakumullattho nikuwa na o Betele nno Yerobowamu mwaana a Nebati, amakilleeye va nipuro noollapellamo mafano. Yerobowamooyo ahaachimwiha Aisraele ni nikuwa nenno. Yosiya aanikumulla apwesattho mallukwiiwa ni waasilla ophiyera ahaatthattusa nthupi nave ahoosattho mafano a Asherimu.

¹⁶ Eerille ddiiddo, Yosiya aarukunuwa nave ahoona mahame vamwaangonimvo. Sika ahaaruma athu wi yakuse makhuva mu mahamemmo nave aawoosella vanikuwanimvo. Sika aaninanariha nikuwanno monga yallotelle Apwiya oweella mwa namallotelliiwa oyo allotenlle ddenndda khalle.

¹⁷ Vaavo Yosiya aakoha wi, “Ethiyo mahame mamodda kinawooneemi mvaalla tti awani?” Athu a m'muzindammo yaamulleella wi, “Yaayo tti mahame a muthu a Mulluku a o Yuda oyo allotenlle khalle dda nnddo mweerilleenyu ni nikuwa na o Betele.”

¹⁸ Yosiya aallota wi, “Muhiyeni. Ahikhallevo muthu oovenyiha makhuvaaye.” Sika makhuvaayo yahaahiya ni makhuva a namallotella a o Samariya.

¹⁹ Mwene Yosiya ahoonongattho mapuro mattheene oollapellamo mafano alle yaari m'mizindani dda o Samariya. Mamwene a o Israele sika yamakille ddenndda, ettatthamulla osha murima wa Apwiya. Nave aheera emoddamoddave yeeyo wonanko mmo eerilleeye o Betele.

²⁰ Awiipha allupa mukutho attheene yarumeyella wenko vamakuwani nave oosella makhuviiwa vaavo. Vatulli viwa aahokollweella o Yerusalemu.

Yosiya aneera Ehakallallo ya Paska

²¹ Sika mwene Yosiya ahaalamula athu attheene wi, “Mweere Ehakallallo ya Paska vawaatitimiha Apwiya Mullukwaanyu moollikana ni mmo mulembelliwe mu nibukhu na echipangano.”

²² Paska aari ahineereyeke ovenyera mu enthawi ya oweeruza ayo yaahoollella Aisraele, apaalle enthawi ya mamwene o Israele, apaallettho enthawi ya mamwene a o Yuda.

²³ Koma mu muyakha wa 18 wa omwene wa Yosiya, Paska yoolla eerelliwe o Yerusalemu.

Yosiya aneera osintha waamodda

²⁴ Mallapo yaayo Yosiya ahaavenyihamottho athu a makhanga, amasenga, terafimu navettho mafano mamodda mattheene, owaakattho ddoonanara ddittheddene nnddo ddaari o ellapo ya Yuda ni o Yerusalemu. Eerille ddenndda wi asunge malamulo ayo yalembiwe mu nibukhu nno mullupa mukutho Hilikiya aniphwanyilleeye mu enyumba ya Apwiya.

²⁵ Yosiya ahinavollowe omwene, khaarivottho mwene mmodda oophwanaphwanana oyo arukunuwelle wa Apwiya ni murimaaye muttheene, okumaaye muttheene ni masivaaya mattheene, voothwarani malamulo a Mose. Nave olliye akhwille, khaarivottho mmodda oophwanaphwanana.

²⁶ Komave Apwiya kheyaahiyalle osha murima nko wakhalla va Yuda vawi Manase ahaattatthamulla Apwiya.

²⁷ Sika Apwiya yaallota wi, “Kineerewaavenyiha athu a o Yuda vamiitthoni vaka wonanko kaavenyihelleemi Aisraele attheene. Kineerowoononga muzinda wa Yerusalemu oyo kawutthoonlleemi ni enyumba eyo kallotilleemi wi, ‘Nnddina naka ninaakhalle mwemmo.’ ”

Omalla wa omwene wa Yosiya

²⁸ Vano mitteko ddimodda dda Yosiya ni ddittheddene eerilleeye ddoolembiwa mu nibukhu na epilli ya mamwene a o Yuda.

²⁹ Mu enthawi ya omwenaaye, Neko mwene a o Iguputo aaya woomukavihera mwene a o Asiriya o muhinje wa Yufurate. Mwene Yosiya aaya woowanana ekhoto koma Neko aamwiipha Yosiya o Megido va ekhotweeyo.

³⁰ Sika enduna ddaye ddaamutukhulla va nigareta ovenyera o Megido emuyaana o Yerusalemu nave ddaamuvittha mu mahame aayeaaye. Sika athu a o Yuda yaamuzoza omwene Yehowahazi mwaana a Yosiya avollowa munipuroni mwa attiitthinnya.

Yehowahazi mwene a o Yuda

³¹ Yehowahazi aari ni miyakha 23 avolloweeye omwene nave aalamulella miyeri miraru o Yerusalemu. Amennya yaari Hemutala, mwaana a Yeremiya a o Libina.

³² Aheera ddoonanara vamiitthoni va Apwiya voothwarani ddittheddene makhollwaaye mamodda yeeriiwa.

³³ Sika mwene Neko a o Iguputo aamuhiya Yehowahazi mundende o Ribula mu ellapo ya Hamati wi ahilamulellettho o Yerusalemu. Vatulli viwa ahaakhomiha musonkho wa siliva oollemella makilogramu 3,400 ni golide makilogramu 34.

³⁴ Sika Neko aamuvollochiha omwene Eliyakimu, mwaana a Yosiya, munipuroni mwa attiitthinnya nave aasintha nnddina naye akhalla Yehoyakimu. Olliye aamukusella Yehowahazi o Iguputo nave akhwenlle wenko.

Yehoyakimu mwene a o Yuda

³⁵ Vano Yehoyakimu aanavelleella siliva ni golide wa Neko. Komattho aanakhomiha musonkho mwiillaponi mwayemmo wi avelleelle makobiraayo wa mwene moollikana ni mmo amulamulelleeye. Aanamukusa siliva ni golide nnddo athu a mwiillaponimmo yaphwanelliiwa ovelleella moollikana ni eyuuma ya arive muthu nave yaddivelleella wa mwene Neko.

³⁶ Yehoyakimu aari ni miyakha 25 avolloweeye omwene nave aalamulella miyakha khumi ni mmodda o Yerusalemu. Amennya yaari Zebida, mwaana a Pedaya a o Ruma.

³⁷ Yehoyakimu aheera ddoonanara vamiitthoni va Apwiya voothwarani ddittheddene nnddo makhollwaaye mamodda yeeriiwa.