2 Mamwene 22 - Mawu a Mulluku

Yosiya mwene a o Yuda

¹ Yosiya aari ni miyakha mitthanu ni miraru avolloweeye omwene nave aalamulella miyakha 31 o Yerusalemu. Amennya yaari Yedida, mwaana a Adaya a o Bozikati.

² Olliye aheera ddoolungama vamiitthoni va Apwiya, aanathwara echisanzo ya Davide nikhollo naye mu ddittheddene, oohirukunuwella onnattanatta apaalle wuunyotthoni.

Nibukhu na malamulo

³ M'muyakha wa 18 wa omwenaaye, Yosiya aamuruma Shafani mwaana a Azaliya mwaana a Meshulamu, namalembella a o enyumba ya Apwiya, allota wi,

⁴ “Khawe wa Hilikiya, mullupa mukutho muullupalli, wamulleelle wi eerenge makobiri ayo athu ewiilliiwana o enyumba ya Apwiya, ayo alonda a va mullako yatthukumanihiiwa wa athu.

⁵ Makobiri yaayo awinnye akapitawo oopotokosiha enyumba ya Apwiya wi yaallivelle oopotokosa enyumbeeyo.

⁶ Sika yaallivelle eeruso ya matabwa, yoomaka enyumba, yoomaka ni malluku navettho ekullelle miteekho ni malluku oosema ddoopotokosella enyumbeeyo.

⁷ Koma muheerengelle makobiri oovelleelliwa m'mattani mwa akapitawo vawi tti oororomelleya.”

⁸ Sika Hilikiya mullupa mukutho muullupalli aamulleella Shafani namalembella wi, “Kooniphwanya nibukhu na malamulo mu enyumba ya Apwiya.” Nave Hilikiya aanivelleella nibukhunno wa Shafani wi aneerenge.

⁹ Vano namalembella Shafani aaya wa mwene, amulleella wi, “Allupa muttekwaanyu yahaakusamo makobiri alle yaari mu enyumba ewinnya akapitawo oopotokosiha enyumba ya Apwiya.”

¹⁰ Sika olliye aamulleella mwene wi, “Mullupa mukutho Hilikiya ookinnyera nibukhu.” Nave Shafani aaneerenga nibukhunno vamiitthoni va amwene.

Hulida namallotella aamutthiyana

¹¹ Mwene iiwalle mawu a mu nibukhu na malamulo, ahaahulla ddoowara ddaye mweethakaraka.

¹² Vano aamulamula mullupa mukutho Hilikiya, Ahikamu mwaana a Shafani, namalembella, Akibori mwaana a Mikaya ni Asaiya oorumeyella a mwene wi,

¹³ “Khaweni mwaakohe Apwiya munipuroni mwaka ni mwa athu a mu ellapo ettheene ya Yuda dda mawu a mu nibukhunna. Vawi osha murima wuullupalli wa Apwiya wookharihiwa va hiyaano ekaamba yawi makhollwaahu kheyaawiiwellelle mawu a mu nibukhunna nave kheyaathwanre ddittheddene nnddo ddalembiwe mwemmo.”

¹⁴ Sika mullupa mukutho Hilikiya, Ahikamu, Akibori, Shafani ni Asaiya yaaya wa namallotella aamutthiyana nnddina naye Hulida, mwaara Shalumu. Shalumu aari oosunga ddoowara ddoomwene nave aari mwaana a Tikiwa, mwaana a Harihashi. Hulida akhalla o Yerusalemu mu echigawo yanaanweene ya muzindooyo. Sika athwaalle ellotillena,

¹⁵ olliye ahaalleella wi, “Apwiya Mulluku a Israele enallota wi mwamulleelle mwene oyo uurumalleni wa miyaano wi,

¹⁶ ‘Mi Apwiya kinallota wi kineeromoriha yoonanara va muzindoolla ni va athu attheene a mwemmo monga mwa mawu mattheene a mu nibukhu nno mwene a o Yuda aneerengilleeye.

¹⁷ Athwaayo aakihiya, enavelleella mikutho wa milluku ddimodda ni okichimwella ni mafanwiiwa, mitteko ddittheddene dda mattiiwa. Sika osha murima waka wookharella muzindoolla nave khowa othiima.

¹⁸ Koma mwene a o Yuda oyo uurumalleni wi mwaakohe Apwiya, mwamulleelle wi mi Apwiya Mulluku a Israele kinallota wi wiiwalleewe,

¹⁹ waalapa ni wiiyeviha vamiitthoni va mi Apwiya. Kahuulleella wi kineerollaka muzindoolla ni athu attheene a mwemmo nave wi oneerotthattuwa nipuro nawoopiha ni nootulli. Vawi wohaahulla ddoowara ddawo winllaka vamiitthoni vaka, miyaanottho kohiiwa nivekello nawo. Mi Apwiya koollota.

²⁰ Sika kineerowaakhullella wi okhwe mwamurendelle ni ovitthiwa vamodda ni makhollwaawo. Mwawi miitthwaawo khewa yoonaka ddoonanara nnddo kinaaweemina va muzindoolla.’ ” Sika athwaalle yaahokollowa eya yallota mawu yaayo wa mwene.