2 Mamwene 21 - Mawu a Mulluku

Manase mwene a o Yuda

¹ Manase aari ni miyakha khumi ni miilli avolloweeye omwene nave aalamulella miyakha 55 o Yerusalemu. Amennya yaari Hepeziba.

² Olliye aheera ddoonanara vamiitthoni va Apwiya voothwarani mitteko ddoonanara dda athu a mitundu ddimodda ayo Apwiya yawiikarilliiwa ehinaphiye Aisraele.

³ Manase aamakattho mapuro oollapellamo mafano, ayo attiitthinnya Hezekiya yawoonongelliiwa. Aammakella Baala makuwa, aapanga mafano a Asherimu wonanko eerelle Ahabu mwene a Aisraele. Nave aanallapella ni orumeyella etheneeri.

⁴ Aamaka makuwa mu enyumba ya Apwiya eyo alliwa yallotilleewe wi, “Nnddina naka nineerokhalla mu Yerusalemu.”

⁵ Nave aamaka makuwa oollapellavo ddeko ddamuddullu m'mathatoni meelli a enyumba ya Apwiya.

⁶ Vatulli viwa aamuvelleella mwanaye aamullopwana monga mukutho. Aanoombesa makhanga ni weera dda masenga ni okhwiri. Aheera ddoonanara ddinchichi vamiitthoni va Apwiya nnddo aashihalleeyena murima.

⁷ Aahiya mu enyumba ya Apwiya nifano noosema na Asherimu. Enyumba eyo Apwiya yamulleelliiwa Davide ni mwanaye Solomoni wi, “Mu enyumba yeella ni mu Yerusalemu sika kitthoonlleemi variyari va malloko mattheene a Israele wi ekillapellekemo wa enthawi yoohimalla.

⁸ Sika ngaakhullellattho wi Aisraele evenyihiwemo mu ellapo eyo kaavahilleemi makhollwiiwa alliwa yaawiiwellellaka moororomelleya ddittheddene kaalamulalleemi navettho yaathwaraka malamulo ayo Mose oorumeyellaaka aalamulalleeye.”

⁹ Koma athwaayo kheyaawiiwalle ddennddo nave Manase ahaahollosa ni oweeriha ddoonanara ddinchichi waakhwaranya athu a mitundu ddimodda ayo Apwiya yawiikarihalliiwa Aisraele ehinaphiye.

¹⁰ Sika Apwiya yaallota oweella mwa oorumeyelliiwa anamallotella wi,

¹¹ “Manase mwene a o Yuda oheera ddoonanara ddinchichi, oochimwa waakhwaranya Aamori ayo yaariwo olliye ahinayariwe nave ohaachimwiha athu a o Yuda ni mafanwaaye.

¹² Sika mi Apwiya Mulluku a Israele kinallota wi, ‘Ngoonani, kineeromorihella otulli va Yerusalemu ni va Yuda wawi arive muthu aniiwe, aneerokhwa mullakallaka.

¹³ Kineeromullaka Yerusalemu wonanko mmo kamweerelleemi Samariya ni Ahabu ni nibanja naye. Sika kineeromweelliha Yerusalemu vawaavenyihamoni athwaaye wonanko mmo muthu aneerelleeye ni embale, annayihuwa ayigudumeya.

¹⁴ Sika oohalla a athwaaka kineerewaavenyiha mu ellapo ni waavelleella m'mattani mwa adaniiwa. Nave adaniiwa eneerowiipha ni owaakha ddittheddene.

¹⁵ Ddinaakhalle ddiiddo vawi aheera ddoonanara vamiitthoni vaka nave yookishiha murima ovenyera nllapo nno makhollwiiwa yakhumalliiwa o Iguputo ophiyera ollello.’ ”

¹⁶ Navettho Manase aawiipha athu oohichimwa anchichi ophiyera nikhame na athwaayo naheetellella embali ddittheddene dda misewu dda mu Yerusalemu. Nndda ddahoonjerera va machimo ayo aachimwihalleeyena Ayuda vooweerihani ddoonanara vamiitthoni va Apwiya.

¹⁷ Vano mitteko ddimodda dda Manase ni ddittheddene eerilleeye ni machimo ayo aweerilleeye, ddittheddenennddo ddoolembiwa mu nibukhu na epilli ya mamwene a o Yuda.

¹⁸ Manase aakhwa, avitthiwa mu mahame mu emata ya o enyumbaaye, m'matani mwa Uza. Sika Amoni mwanaye aavollowa omwene munipuroni mwaye.

Amoni mwene a o Yuda

¹⁹ Amoni aari ni miyakha 22 mvo avolloweeye omwene nave aalamulella miyakha miilli o Yerusalemu. Amennya yaari Meshulemeti, mwaana a Haruzi a o Yotiba.

²⁰ Olliye aheera ddoonanara vamiitthoni va Apwiya wonanko mmo Manase attiitthinnya yeerelliiwa.

²¹ Aathwara echisanzo yoonanara ya attiitthinnya mu ddittheddene, aanarumeyella mafano ayo attiitthinnya yaarumeyelliiwa ni waallapella.

²² Ahaakhoota Apwiya Mulluku a makhollwaaye nave khiiwellelle malamulwiiwa.

²³ Sika allupa muttekwaaye yaamweerella echiwembu, emwiipha mu enyumbaaye.

²⁴ Koma athu amwiillaponimmo yaawiipha attheene yamweerelle echiwembu mwene Amoni nave yaamuvollochiha mwanaye Yosiya omwene munipuroni mwaye.

²⁵ Vano mitteko ddittheddene nnddo eerille Amoni ddoolembiwa mu nibukhu na epilli ya mamwene a o Yuda.

²⁶ Aakhwa aavitthiwa mu mahame mu emata ya Uza nave mwanaye Yosiya aavollowa omwene munipuroni mwaye.