2 Mamwene 20 - Mawu a Mulluku

Ovoriiwa ni ochirihiwa wa Hezekiya

¹ Enthawi yeeyo Hezekiya aavoriiwa nave aari vakhuviru okhwa. Namallotella Yesaya mwaana a Amozi aaya wi amoone nave aamulleella wi Apwiya enallota wi, “Opotokose ddeko ddawo ddittheddene phaama vawi onimakhwa, khochira.”

² Vano Hezekiya aarukunuwella osirini nave aavekella wa Apwiya wi,

³ “Nyu Apwiya, upuwellani wi kaanuurumeyellani moororomelleya ni mwawiivelleella nave kaaneera ddawuuddivellani.” Eerille ddiiddo ahaamba winlla moovoreyiwa murima.

⁴ Vano Yesaya ahinakhume mu nthato na variyari, mawu a Apwiya yaawa wa olliye wi,

⁵ “Hokollowa, wamulleelle Hezekiya, mwene a athwaaka wi, ‘Mi Apwiya Mulluku a nikhollo nawo Davide kohiiwa ovekella wawo nave kooddoona miitthori ddawo. Vano kineerewuuchiriha. Oneerowora ollapella o enyumba ya Apwiya omuroto vano.

⁶ Nave kineerowaanjerera miyakha khumi ni mitthanu mu okumaawo. Kineerowaakihera weyaano ni muzinda yoolla wa mwene a o Asiriya. Muzindoolla kineerewuuteteza ekaamba ya mi ni Davide oorumeyellaaka.’ ”

⁷ Sika Yesaya aallota wi, “Athu emukuse namukuyu, emmare va yawiipa nave mwene Hezekiya aneerochira.”

⁸ Hezekiya aamukoha Yesaya wi, “Ethiyo echizindikirweene ttiivi yoosimikizella wi kineeroyattho o enyumba ya Apwiya omuroto?”

⁹ Yesaya ahaakhulla wi, “Apwiya eneerowinnya echizindikiro yawi eneereweera nnddo yalonjezilliiwa. Ethiyo onapaalla wi muuthuuchi oye vahoollo apaalle ohokollweelle mutulli masitepe khumi?”

¹⁰ Hezekiya ahaakhulla wi, “Tti woohikatamiha wi muuthuuchi oye vahoollo masitepe khumi ohiri ohokollweelle mutulli masitepe khumi.”

¹¹ Vaavo namallotella Yesaya ahaatitimiha Apwiya mookhuwa. Nave Apwiya yaahokollosella muuthuuchooyo mutulli masitepe khumi va masitepe ayo mwene Ahazi aamakilleeye.

Hezekiya anawaakhella amithenga oovenyera o Babiloni

¹² Enthawi yeeyo Merodaki Baladani mwaana a Baladani mwene a o Babiloni ahaarumiha amithenga awinnyera makalata ni emphaso wi yavelleelle wa Hezekiya vawi ahiiwa wi aamavoriiwa.

¹³ Hezekiya aawaakhella athwaayo nave aawooniha enyumba yoosungellamo ddeko ddaye monga siliva, golide, makhura awunkhella oowallamella mutengo, makhura aphaama, ezida ddittheddene ddakhoto ni ddittheddene addisungeeye. Khamwaahanlle ello munyumbanimmo ni mu omwenaaye muttheene eyo ahiwoonihalleeye.

¹⁴ Vano namallotella Yesaya aaya wa mwene Hezekiya amukoha wi, “Ethiyo athwaalle yuulleelleni ddawiidde nave yavenyenre wuuwi?” Hezekiya ahaakhulla wi, “Yavenyenre o ellapo yawoorekama, o Babiloni.”

¹⁵ Yesaya aakohattho wi, “Ethiyo mu enyumba mwanyummo yoonilleemo tini?” Hezekiya ahaakhulla wi, “Ahoona ddittheddene dda mu enyumba mwaka. Kheyiivo naari emodda eyo kihiwoonihalleemi mu enyumba ddaka ddoosungellamo eyuuma.”

¹⁶ Vaavo Yesaya aamulleella Hezekiya wi, “Apwiya Mulluku enallota wi,

¹⁷ ‘Enthawi eneerophiya mvo ddittheddene dda mu enyumba mwanyu ni ddittheddene nnddo makhollwaanyu yadditthukumanihalliiwa ophiyera ollello eneerowaakhani oyaana o Babiloni. Khavikhallattho ello naari emodda.

¹⁸ Ddimodda mwa edduullu ddanyu ddineneerophariwa nave ddineerotthattusiwa allupa mutteko oohulliwa* wi yarumeyelleke o enyumba yoomwene o Babiloni.’ ”

¹⁹ Sika Hezekiya aamulleella Yesaya wi, “Mawu a Apwiya ollotilleewaalla tti aphaama.” Voollotani ddenndda aallota m'murimani mwaye wi, “Vineerokhalla murendelle ni omaalleya mallapo mattheene a okumaaka.”

Omalla wa omwene wa Hezekiya

²⁰ Vano mitteko ddittheddene dda Hezekiya ni masivaaye mattheene ni mmottho akatelleeye nthiya ni engalande ddoovollochiha maaddi m'muzindanimmo, ddoolembiwa mu nibukhu na epilli ya mamwene a o Yuda.

²¹ Nave Hezekiya aakhwa avitthiwa mu mahame a makhollwaaye. Sika Manase mwanaye aavollowa omwene munipuroni mwaye.