2 Mamwene 2 - Mawu a Mulluku

Eliya anawellihiwa oddullu

¹ Yaaphiya enthawi eyo Apwiya yapaalliiwa omukusa Eliya mu namangalle oya oddullu. Nllapo nenno Eliya ni Elisha yaari voolendoni ovenyera o Giligala.

² Eliya aamulleella Elisha wi, “We Elisha, pepaani khalla vaava vawi Apwiya aakiruma o Betele.” Koma Elisha aallota wi, “Kinimallupella vamiitthoni va Apwiya wi nguuhiyani.” Sika eellaayo yaaya o Betele.

³ Vano a m'mulloko wa anamallotella a o Betele yaakumana ni Elisha emukoha wi, “Ethiyo munnadduwella wi Apwiya eneerewaakusa apwiinyu?” Elisha ahaakhulla wi, “Ee, kinnadduwella, khurumuwani.”

⁴ Nllapo nenno Eliya aamulleella Elisha wi, “We Elisha, pepaani khalla vaava vawi Apwiya aakiruma o Yeriko.” Koma Elisha aallota wi, “Kinimallupella vamiitthoni va Apwiya ni va nyuwaano wi nguuhiyani.” Sika athu eellaayo yaaya o Yeriko.

⁵ Nave a m'mulloko wa anamallotella a o Yeriko yaakumana ni Elisha emukoha wi, “Ethiyo munnadduwella wi ollello Apwiya eneerewaakusa apwiinyu?” Elisha ahaakhulla wi, “Ee, kinnadduwella, khurumuwani.”

⁶ Vatulli viwa Eliya aallota wa Elisha wi, “Pepaani khalla vaava vawi Apwiya aakiruma wi kiye o Yordani.” Koma Elisha aamulleella Eliyooyo wi, “Kinimallupella vamiitthoni va Apwiya ni va nyuwaano wi nguuhiyani Ata.” Sika athu eellaayo yaavirellella olendwiiwa.

⁷ Athu 50 a m'mulloko wa anamallotellaalle yahaathwara nave yahiimella voorekamella vang'ono, Eliya ni Elisha yiimenlle mukhwipi mwa Yordani.

⁸ Vano Eliya aakusa mukanjwaaye awupinda aawashullana maaddi. Vaavo maaddaayo yaakawaneya, nngu ni nngu, ophiyera anamallotella eellaayo yaallapuwa vawumma.

⁹ Ellapuwalle, Eliya aamulleella Elisha wi, “Okiveke yawi kiweerelle kihinavenyihiwe va weyaano.” Elisha ahaakhulla wi, “Kinimuuvekani wi kaakhelle magawo meelli a munepaanyu.”

¹⁰ “Eliya aamulleella Elisha wi, ‘Wooveka ello yookatamiha komave wakiweha kaavenyihiwaka va weyaano, ddineeroweereyella koma waahikiweha, kheddeereya.’ ”

¹¹ Vano alliwa yeetaka ni ollota, moorurumusa nigareta namunllo ni akavalo amunllo ddahaahiyaniha eellaayo. Nave Eliya aawella oddullu mu namangalle.

¹² Elisha ahoona ddenndda akhuwa wi, “Attiitthaaka, attiitthaaka! Nigareta na Israele ni athwiiwa oowella va akavalo!” Nave khaamoonillettho Eliya. Vano Elisha aaphara ddoowara ddaye addaahulla veelli.

¹³ Vano aakusa mukanjo wa Eliya oyo wamonre, ahokollowa iimella mukhwipi mwa Yordani.

¹⁴ Aakusa mukanjo wa Eliya awashullana maaddi, allota wi, “Eri wuuwi Apwiya, Mulluku a Eliya?” Awashullalle maaddaayo, yaakawaneya nngu ni nngu nave Elisha aallapuwa.

¹⁵ Mulloko wa anamallotella a o Yeriko yamoonilliiwa Elisha allapuwaka yaallota wi, “Munepa wa Eliya ori mwa Elisha.” Vano yaawa ekumanana ekokhora vamiitthoni vaye.

¹⁶ Nave alliwa yaamulleella wi, “Vano ngoonani, oorumeyellaanyu nookhalla ni athu 50 amasiva. Pepaani, akhullellani wi etimulle yamwaashaashe pwiinyu Eliya. Apaalle munepa a Apwiya oomukusa amuvokhella omwaangoni waamodda apaalle o ntapo.” Elisha ahaakhulla wi, “Iyaayi muhaarume.”

¹⁷ Koma yaamuwatihera ophiyera Elisha moowulliwa muru aawaakhullella wi, “Arumeni.” Sika alliwa yahaaruma athu 50. Nave athwaayo yaamwaashaasha Eliya mallapo mararu koma oohimuphwanya.

¹⁸ Vano yaahokollweella wa olliye mvo atiyereeye o Yeriko nave ahaalleella wi, “Ethiyo ngaallotille wi muhiyeewo?”

Ddoottikhiniha dda Elisha

¹⁹ Nllapo nimodda athu a mu m'muzinda yaamulleella Elisha wi, “Ngoonani, muzindoolla tti waphaama monga munoonelleenyummu koma maaddi tti onanara nave ethayiiwa khe yoopatelliha.”

²⁰ Vaavo Elisha aallota wi, “Kinnyeni embale yanaanweene nave muhellemo mwiinyu.” Nave yaawana mwiinyu mumbaleni.

²¹ Vano Elisha aaya o neetuutu, ahellawo mwiinyu oneetuutuninko voollotani wi, “Apwiya eni, ‘Maaddi yaalla kohaachiriha. Waambeella ollello oya muhoollo m'maaddini yaalla khamuwa mukhalla yawiipha apaalle yoolepheliha ethaya wimmiha mmiddo.’ ”

²² Sika maaddaayo tti aweella ophiyera ollello moollikana ni mawu allotille Elisha.

²³ Ovenyera wenko Elisha aaya o Betele. Nave ari muttilla, asombwe amodda a m'muzindanimmo yaakhumellella yaamba omuttheya wi, “Venyavo mva, nanttari! Venyavo mva, nanttari!”

²⁴ Vano Elisha aarukunuwa nave awoonille asombwaayo, ahaatembelela mu nnddina na Apwiya. Nave vaakhumellella ezimbalangondo piilli ddeetthiyana ovenyera ohakani ddiwiipha asombwe 42.

²⁵ Avenyille wenko, Elisha aavirellella oya o mwaango wa Karimele nave vatulli viwa aahokollweella o Samariya.