2 Mamwene 17 - Mawu a Mulluku

Hoseya mwene a o Israele

¹ M'muyakha waneekhumi ni piilli wa omwene wa Ahazi mwene a o Yuda, Hoseya mwaana a Ela aavollowa omwene wa o Israele o Samariya. Nave aalamulella miyakha mitthanu ni misese.

² Sika aheera ddoonanara vamiitthoni va Apwiya komave oohillikana ni mamwene a o Israele ayo yalamulella olliye ahinavollowe omwene.

³ Shalimanazere mwene a o Asiriya aamuhella ekhoto nave Hoseya aagonja, anakhoma musonkho wa olliye orive muyakha.

⁴ Koma nllapo nimodda mwene a o Asiriya ahoona wi Hoseya aakhoza echiwembu. Hoseya aari aarumalle amithenga wooveka nikavihero wa So, mwene a o Iguputo, navettho aahiya okhoma musonkho wa mwene a o Asiriya monga eerelleeye orive muyakha. Ekaamba ya yeella mwene a Asiriya aamumaka Hoseya amuhiya mu ndende.

Omora wa Samariya

⁵ Enthawi yeeyo Salimanezere, mwene a o Asiriya, aahella ekhoto mu ellapo ya Israele, aya aphiya o Samariya, awaapheella muzindooyo ni ezida ddakhoto miyakha miraru.

⁶ M'muyakha waneetthanu ni sese wa omwene wa Hoseya, mwene a o Asiriya aamugonjiha Samariya nave ahaaphara Aisraele aayaana wuukaporoni o Asiriya. Ahaahiya athu amodda mu muzinda wa Hala, amodda vakhuviru ni muhinje wa Habori mu echigawo ya Gozani nave amoddattho mu mizindani dda Amedi.

⁷ Nndda ddaheereya ekaamba yawi Aisraele yahaachimwella Apwiya Mullukwiiwa ayo yaakhumihalle mu Iguputo, waavenyiha m'mattani mwa mwene Farao. Aisraelaayo yaanallapella milluku ddimodda

⁸ nave yaaneeta moothwara ehuddiho dda athu a mitundu ddimodda ayo Apwiya yawiikanriiwa mvo Aisraele yaphiyiiwa. Yaanathwarattho ehuddiho ddeelleto nnddo mamwene mamodda a Israele yaambihalliiwa.

⁹ Nave Aisraele yaaneera ddoonanara mwawiipittheya enaachimwella Apwiya Mullukwiiwa. Yahiimakella mapuro oollapellamo mafano m'mizi ddiwa ddittheddene ni m'mizindani.

¹⁰ Yaamaka apoto oopatuleya ni mafano a Asherimu va orive mwaango woorekama ni va orive muteekho woorapa.

¹¹ Nave athwaayo yoosa lubani* o mapuro mattheene oollapellawo mafano omwaangoni wonanko yeerella athu a mitundu ddimodda ayo Apwiya yawiikanriiwa mwiillaponimmo mvo Aisraelaayo yaphiyiiwa.

¹² Sika yaallapella mafano waachimwella Apwiya ayo yaalleellille khalle wi, “Muhiwa mweera ddenndda.”

¹³ Mutthemwenemmo Apwiya yaamuchenjeza Israele ni Yuda wi oyeella mwa oollohella ni anamallotelliiwa wi, “Hiyani makhallellwaanyu oochimwa nave iwellellani malamulwaaka ayo kaavelleelleemi wa makhollwaanyu oweella mwa anamallotella, oorumeyellaaka.”

¹⁴ Koma kheyiiwellelle, yaari eetiyamaaru wonanko makhollwiiwa yakhallelliiwa ayo yahaaroromelle Apwiya Mullukwiiwa.

¹⁵ Kheyaapwatha malamulo a Apwiya ni echipangano ya Apwiya eyo yeerilliiwa ni makhollwiiwa. Kheyaapwathillettho ddoochenjeza dda Apwiya. Yaanathwara milluku ddoohikhalla ni mutteko, alliwa yaatthattuwa oohikhalla ni mutteko. Yaathwara ezisanzo dda athu a mitundu ddimodda awaatamanana naari Apwiya yaalamulalle wi eheereke moophwanaphwana ni mitundu ddennddo.

¹⁶ Yaatathilla malamulo mattheene a Apwiya Mullukwiiwa, yiipangella mafano meelli, asaana amukoko eeng'ombe eelli. Yaapangattho mafano mamodda a Asherimu enallapella ddeko ddamuddullu owaakattho Baala.

¹⁷ Yaanaavelleella mukutho aniiwa aallopwana ni aatthiyana nave yaanoombesa makhanga, yaaneerattho ddookhwiri. Yahiivelleella weera ddoonanara vamiitthoni va Apwiya ni waashiha murima.

¹⁸ Sika Apwiya yahaashella murima Aisraele nave yaawiikara ohipaalla owoonattho. Khaarivo naari mmodda ahanlle opatula nlloko na Yuda.

¹⁹ Athu a o Yuda kheyaasungallettho malamulo a Apwiya Mullukwiiwa koma yaaneeta moothwara mitetho nnddo Aisraele yaambihalliiwa.

²⁰ Sika Apwiya yaaddikhoota edduullu ddittheddene dda Aisraele, eddihoosa, eddivelleella m'mattani mwa athu awaakha ophiyera yahaatathilla vamiitthoni viwa.

²¹ Apwiya yaahiyanihalle Aisraele, waavenyiha va nibanja na Davide, alliwa yaamutthoolla Yerobowamu mwaana a Nebati wi akhalle mwene variyari wiwa. Olliye ahaahiiha Aisraele wi ehaathwareke Apwiya nave ahaachimwiha wunchichi.

²² Aisraele yaanachimwa wonanko mmo achimwella Yerobowamu mweniiwa. Kheyaaddihiyalle

²³ ophiyera Apwiya yahaavenyiha Aisraele moollikana ni mmo yallotelliiwa oyeella mwa oorumeyelliiwa attheene, anamallotella. Sika Aisraele yaaphariwa okaporo evenya mwiillaponi yoowaniwa eya o Asiriya nave eri wenko ophiyera ollello.

Aasiriya enakeraattheya mu Israele

²⁴ Vatulli viwa, mwene a o Asiriya aawa ni athu ovenyera o mizinda dda Babiloni, Ava, Hamati ni Sefaravaimu aahiya mu mizinda dda Samariya munipuroni mwa Aisraele ayo yaphariwe okaporo. Vano athwaayo yaavollowa mu mizindannddo ddikhalla ddayiwaddayiwa.

²⁵ Koma vawaamba yakhalliiwa wenko, kheyaallapella Apwiya. Sika ekaambiiwa Apwiya yarumihalliiwa mikango variyari viwa ddiwiipha amodda mwa alliwa.

²⁶ Mwene a o Asiriya ahiiwa wi, “Athu a mitundu ddimodda alle mwaahiyalleenyu mu mizinda dda o Samariya khenadduwella omullapella Mulluku a ellapweeyo. Sika ekaambiiwa Mulluku arumihalleeye mikango variyari viwa ddiwiipha kaambiiwa khenadduwella malamulwaaye.”

²⁷ Sika mwene a o Asiriya aalamula wi, “Murumiheni mmodda mwa allupa mukutho ayo mwaapharilleenyu wenko wi aahuddihe malamulo a Mulluku a ellapweeyo.”

²⁸ Sika mmodda mwa allupa mukutho ayo yaaphanriiwa o Samariya aawa o Betele aamba waahuddiha athu waallapella Apwiya.

²⁹ Koma orive mutundu wa athwaayo waavirellella opanga mafano a milluku ddiwa nave yaanaddihiya mu mapuro oollapellamo ayo Asamariya yaddimakilliiwa. Orive mutundu wa athwaayo waakhalla ni enyumba dda mullukwiiwa mu orive muzinda mmo yakhalliiwa.

³⁰ Athu a o Babiloni yaapanga nifano na Sukoti Benoti, a o Kuta yaapanga nifano na Neregali, a o Hamati yaapanga nifano na Ashima,

³¹ Aavi yaapanga nifano na Nibihazi ni Taritaki. Asefaravaimu yaanaavelleella aniiwa monga mukutho wooshellelliha wa milluku ddiwa Adrameleki ni Anameleki.

³² Athu yaayo yaanaallapellattho Apwiya. Komattho yahaatthoolla athu shisha variyari viwa wi ekhalle allupa mukutho oorumeyella mapuro oollapellamo ni oheraatthi mikutho.

³³ Sika yaanaallapella Apwiya erumeyellakattho milluku ddiwa voothwarani mutetho wa mitundu dda athu a nko yaaphanriiwa.

³⁴ Enimeerave mitetho ddiwa ophiyera ollellova. Alliwa khenawoova Apwiya wiilliwiilli nave khenathwara malangizo naari malamulo ayo Apwiya yaddilamulaliiwa edduullu dda Yakobo oyo yamuvahilliiwa nnddina nawi Israele.

³⁵ Apwiya yaakeraatthiha echipangano ni Aisraele yaalamula wi, “Muhillapelleke milluku ddimodda apaalle oddirumeyella apaalle ovelleella mukutho wa ddenndda.

³⁶ Koma mukillapelleke mi Apwiya oyo kuukhumihalleni o Iguputo ni masivaaka muullupalli ni muwonwaaka wamasiva. Mukooveke mi Apwiya nave muvelleelleke mukutho wa meeneve.

³⁷ Mupwatheke malamulo ni ehuddiho, malangizo ni malamulo ayo mi Apwiya kawinnyalleemini. Muhillapelleke milluku ddimodda

³⁸ nave muhitiwalle echipangano eyo kakeraatthihalleemi ni nyuwaano. Muhillapelleke milluku ddimodda,

³⁹ koma mukillapelleke mi Apwiya Mullukwaanyu nave kineerewuuvullusani wa adanaanyu.”

⁴⁰ Komave alliwa kheyiiwellelle, yaanavirellella weera mitetho ddiwa.

⁴¹ Sika mitundu ddenndda dda athu ddaanawoova Apwiya koma ellapellaka milluku ddiwa. Aniiwa ni edduullu ddiwa ddinneera ddimoddamoddave nnddo yeera makhollwiiwa ophiyera ollello.