2 Mamwene 16 - Mawu a Mulluku

Ahazi mwene a o Yuda

¹ M'muyakha wa 17 wa omwene wa Peka mwaana a Remaliya, Ahazi mwaana a Yotamu mwene a o Yuda, aavollowa omwene.

² Ahazi aari ni miyakha 20 avollowaaye omwene nave aalamulella o Yerusalemu miyakha 16. Olliye kheerille ddoolungama vamiitthoni va Apwiya Mullukwaaye wonanko eerella Davide nikhollo naye.

³ Koma athwarille ezisanzo ddoonanara dda mamwene a o Israele. Aamuvelleella mwanaye aamullopwana wonanko mukutho wooshellelliha voothwarani mitetho ddoonanara dda athu a mitundu ddimodda nnddo Apwiya yaddiikarihalliiwa mwiillaponimmo Aisraele yaphiyiiwa.

⁴ Nave aavelleella mikutho ni woosa lubani* mapuro oollapellamo mafano omiyaangoni ni vatthi va orive muteekho woorapa.

⁵ Sika Rezini mwene a o Siriya ni Peka mwaana a Remaliya mwene a o Israele yaahella ekhoto mu Yerusalemu emwaapheella Ahazi ni ezida ddakhoto koma kheyaaworille omugonjiha.

⁶ Enthawi yeeyo mwene a o Edomu ahaathamakiha Ayuda a o Elati, aakha muzindooyo ni owuhokollosella wa Aedomu nave alliwa aakeraattheya wenko ophiyera ollello.

⁷ Vaavo Ahazi ahaarumiha amithenga wa Tigilati Pilesere mwene a o Asiriya wi allote wi, “Mi tti mwaninyu navettho oorumeyellaanyu. Waani mukaakihe wa mwene a o Siriya ni wa mwene a o Israele ayo enakillika.”

⁸ Nave Ahazi aakusa siliva ni golide addiphwanyilleeye mu enyumba ya Apwiya ni moosungella eyuuma ya o enyumba yoomwene addirumiha wa mwene a o Asiriya monga emphaso.

⁹ Sika mwene a o Asiriya aamwiiwellella Ahazi nave aahella ekhoto o Damasiko aakha muzindooyo emwiipha Rezini. Nave ahaaphara athu a muzinda aayaana o Kiri wuukaporoni.

¹⁰ Mwene Ahazi ayiille o Damasiko wi akumane ni Tigilati Pilesere mwene a o Asiriya ahoonawo nikuwa. Sika aamurumihella Uriya mullupa mukutho echisanzo ya nikuwanno ni mooneyellwiiwa, ohihiyavo naari ello emodda eng'onong'ono.

¹¹ Sika Uriya mullupa mukutho aamaka nikuwanno, mwene Ahazi ahinaphiye ovenyera o Damasiko. Animakille moothwarihella echisanzo eyo Ahazi arumihalleeye ovenyera o Damasiko.

¹² Mwene awiille ovenyera o Damasiko ni woona nikuwanno aasusella vakhuviru ni nikuwanno, aawella va nikuwamvo.

¹³ Vano aavelleella mikutho ddooshellelliha, dda yoocha dda ddoowirya ni nikhame na mukutho wamurendelle va nikuwamvo.

¹⁴ Sika mwene Ahazi aavenyiha nikuwa na mukuwa nno naari vamiitthoni va Apwiya, variyari va nikuwa naye ni enyumba ya Apwiya nave aanisusa aya animaka ompoto wa nikuwa nayenno.

¹⁵ Vano mwene aamulamula mullupa mukutho wi, “Va nikuwa nuullupallinno ovelleellevo mikutho ddooshellelliha dda ohinase navettho yoovelleella ya misikuwa ya yoocha. Ovelleellekettho mikutho ddooshellelliha ni mikutho dda othu dda mwene navettho dda athu attheene a mwiillaponi mutthemwenemmo ni ddoovelleella dda yoowirya. Nave va mikuthomvo ohellevo nikhame nittheene na mikutho ddooshellelliha ni mikutho ddittheddene. Koma nikuwa namukuwanno kineeronipharihella mutteko vawoombesani.”

¹⁶ Sika Uriya mullupa mukutho aheera ddittheddenennddo moollikana ni mmo alamulalle Ahazi.

¹⁷ Vatulli viwa mwene Ahazi aattaphulla voohiyavo mabeseni, avenyihavo nibeseni. Nave nibeseni nuullupalli nno naari vamutthanani va eng'ombe ddamukuwa yaanikitthihavo enihiya va matthipello a malluku.

¹⁸ Nave ekaamba yoopaalla omuhakallalliha mwene a o Asiriya, aavenyihavo yavaddullu ya mpando woomwene eyo yamakellelliwe muwari mwa enyumba ya Apwiya navettho aawalla mullako wa otte mvo mwene avollowelleeye mu enyumbeeyo.

¹⁹ Vano mitteko ddimodda dda Ahazi ni ddittheddene eerilleeye ddoolembiwa mu nibukhu na epilli ya mamwene a o Yuda.

²⁰ Ahazi aakhwa nave aavitthiwa mu muzinda wa Davide. Nave Hezekiya mwanaye aavollowa omwene munipuroni mwaye.