2 Mamwene 15 - Mawu a Mulluku

Azariya mwene a o Yuda

¹ Muyakha wa 27 wa omwene wa Yerobowamu mwene a o Israele, Azariya mwaana a Amaziya mwene a o Yuda aavollowa omwene.

² Olliye aari ni miyakha 16 avolloweeye omwene nave aalamulella miyakha 52 o Yerusalemu. Amennya yaari Yekoliya a o Yerusalemu.

³ Azariya aheera ddoolungama vamiitthoni va Apwiya wonanko mmo yeerella attiitthinnya Amaziya.

⁴ Komave mapuro oollapellamo mafano kheyaawoonongille. Athu yaanavelleellave mikutho ni woosa lubani va mapuro yaayo.

⁵ Vano Apwiya yaamullaka mwenooyo ni ereta ya makate ophiyera okhwa waye nave akhalla mu enyumba ya vayeekha. Mwanaye Yotamu sika awehera nibanja na mwene ni waalamulella athu mwiillaponimmo munipuroni mwaye.

⁶ Vano mitteko ddimodda dda Azariya ni ddittheddene eerilleeye ddoolembiwa mu nibukhu na epilli ya mamwene a o Yuda.

⁷ Nave aakhwa avitthiwa mu mahame a makhollwaaye mu muzinda wa Davide. Sika Yotamu mwanaye aavollowa omwene munipuroni mwaye.

Zekariya mwene a o Israele

⁸ Mu muyakha wa 38 wa omwene wa Azariya, mwene a o Yuda, Zekariya mwaana a Yerobowamu, aavollowa omwene wa Israele o Samariya wa miyeri mitthanu ni mmodda.

⁹ Olliye aheera ddoonanara vamiitthoni va Apwiya wonanko yeerella makhollwaaye. Khawaahiyalle machimo ayo Yerobowamu mwaana a Nebati, aachimwihalleeyena Aisraele.

¹⁰ Vano Shalumu mwaana a Yabeshi aamweerella Zekariya echiwembu nave aamwiiphella o Ibleamu. Sika aavollowa omwene munipuroni mwaye.

¹¹ Sika mitteko ddittheddene eerille Zekariya ddoolembiwa mu nibukhu na epilli ya mamwene a o Israele.

¹² Nndda sika Apwiya yamulonjezilliiwa Yehu wi, “Edduullu ddawo ddineerewaalamulella Aisraele ophiyera mbado waneesese.” Nave ddaheereya mwawi ddiiddo.

Shalumu mwene a o Israele

¹³ Shalumu mwaana a Yabeshi aavollowa omwene mu muyakha wa 39 wa omwene wa Uziya mwene a o Yuda. Nave aalamulella mweeri mmodda o Samariya.

¹⁴ Vano Menahemu mwaana a Gadi aavenya o Tiriza aya o Samariya. Aamwiipha Shalumu mwaana a Yabeshi o Samariyanko, avollowa omwene munipuroni mwaye.

¹⁵ Vano mitteko ddimodda dda Shalumu ni echiwembu eyo eerilleeye ddoolembiwa mu nibukhu na epilli ya mamwene a o Israele.

¹⁶ Menahemu voolendwaaye ovenyera o Tiriza ahoononga muzinda wa Tapuwa ni athu attheene yaari mwemmo woonjereravo ellapo ettheene yawaapheella vawi alliwa kheyaamugonjenlle. Aawiiphattho ni waaphulla atthiyana eerukullu a m'muzindanimmo.

Menahemu mwene a o Israele

¹⁷ M'muyakha wa 39 wa omwene wa Azariya mwene a o Yuda, Menahemu mwaana a Gadi aavollowa omwene wa o Israele. Nave aalamulella o Samariya miyakha khumi.

¹⁸ Menahemu aaneera ddoonanara vamiitthoni va Apwiya. Mallapo mattheene a okumaaye khaahiyalle weera machimo mattheene a Yerobowamu mwaana a Nebati ayo aachimwihalleeyena Aisraele.

¹⁹ Vatulli viwa Pulo mwene a o Asiriya aahella ekhoto ellapo ya Israele. Nave Menahemu aavelleella siliva oollemella makilogaramu 34,000 wa Pulo wi olliye amukavihere okeraatthiha omwenaaye.

²⁰ Menahemu aaphwanyille makobiraayo ovenyera o musonkho oyo Aisraele yakhomiiwa. Arive muthu eeyuuma aanakhoma musonkho wa makobiri masiliva makhumi matthanu. Sika mwene a o Asiriya aahokollowa nave khaakhanlle mwiillaponimmo.

²¹ Vano mitteko ddimodda dda Menahemu ni ddittheddene eerilleeye ddoolembiwa mu nibukhu na epilli ya mamwene a o Israele.

²² Nave Menahemu aakhwa avitthiwa mu mahame a makhollwaaye. Sika Pekahiya mwanaye aavollowa omwene munipuroni mwaye.

Pekahiya mwene a o Israele

²³ M'muyakha wa 50 wa omwene wa Azariya mwene a o Yuda, Pekahiya mwaana a Menahemu aavollowa omwene wa o Israele o Samariya. Nave aalamulella miyakha miilli.

²⁴ Pekahiya aheera ddoonanara vamiitthoni va Apwiya. Khaahiyalle weera machimo a Yerobowamu mwaana a Nebati ayo aachimwihalleeyena Aisraele.

²⁵ Vano Peka mwaana a Remaliya endunaaye ni athu 50 a o Giliyadi yaheera echiwembu emwiipha Pekahiya o Samariya mu echipinda yooteteza enyumba yoomwene. Vatulli viwa olliye aavollowa omwene munipuroni mwaye.

²⁶ Vano mitteko ddimodda dda Pekahiya ni ddittheddene eerilleeye ddoolembiwa mu nibukhu na epilli ya mamwene a o Israele.

Peka mwene a o Israele

²⁷ M'muyakha wa 52 wa omwene wa Azariya mwene a o Yuda, Peka mwaana a Remaliya aavollowa omwene wa o Israele o Samariya nave aalamulella miyakha 20.

²⁸ Koma aheera ddoonanara vamiitthoni va Apwiya. Khaahiyalle weera machimo a Yerobowamu mwaana a Nebati aachimwihalleeyena Aisraele.

²⁹ Enthawi ya Peka mwene a o Israele, Tigilati Pilesere mwene a o Asiriya aagonjiha mizinda dda Iyoni, Abele Beti Maaka, Yanowa, Kedeshi, ni Hazori navettho ellapo dda Giliyadi, Galileya ni ellapo ettheene ya Nafutali. Nave ahaaphara athu attheene aayaana o Asiriya wuukaporoni.

³⁰ Enthawi yeeyo Hoseya mwaana a Ela aamweerella echiwembu Peka, amwiipha. Nave olliye aavollowa omwene munipuroni mwaye mu muyakha wa 20 wa omwene wa Yotamu mwaana a Uziya mwene a o Yuda.

³¹ Vano mitteko ddimodda dda mwene Peka ni ddittheddene eerilleeye ddoolembiwa mu nibukhu na epilli ya mamwene a o Israele.

Yotamu mwene a o Yuda

³² M'muyakha waneepiilli wa omwene wa Peka mwaana a Remaliya, mwene a o Israele, Yotamu mwaana a Uziya mwene a o Yuda aavollowa omwene.

³³ Avollowille omwene ari ni miyakha 25 nave aalamulella miyakha 16 o Yerusalemu. Amennya yaari Yerusha mwaana a Zadoki.

³⁴ Yotamu aheera ddoolungama vamiitthoni va Apwiya moollikana ni mmo eerella Uziya attiitthinnya.

³⁵ Komave khaawoonongille mapuro oollapellamo mafano. Athu yaanavelleellave mikutho ni woosa lubani va mapuro yaayo. Yotamu sika amakille mullako wa Omwaako wa enyumba ya Apwiya.

³⁶ Vano mitteko ddimodda dda Yotamu eerilleeye ddoolembiwa mu nibukhu na epilli ya mamwene a o Yuda.

³⁷ Mallapo yaayo Apwiya yaamurumiha Rezini mwene a o Siriya ni Peka mwaana a mwene a o Israele wi yamuhelle ekhoto Yuda.

³⁸ Yotamu aakhwa nave aavitthiwa ni makhollwaaye mu muzinda wa Davide nikhollo naye. Nave Ahazi mwanaye aavollowa omwene munipuroni mwaye.