2 Mamwene 14 - Mawu a Mulluku

Amaziya mwene a o Yuda

¹ Muyakha waneepiilli wa omwene wa Yowashi mwaana a Yehowahazi mwene a o Israele, Amaziya mwaana a Yowashi mwene a o Yuda aavollowa omwene.

² Olliye aari ni miyakha 25 avolloweeye omwene nave aalamulella miyakha 29 o Yerusalemu. Amennya yaari Yehowahadani a o Yerusalemu.

³ Vano Amaziya aheera ddoolungama vamiitthoni va Apwiya komave ohiri enthawi ddittheddene monga Davide nikhollo naye. Aaneera ddittheddene wonanko Yowashi attiitthinnya.

⁴ Koma khoonongille mapuro oollapellamo mafano. Athu yaavirellellave ovelleella mikutho ni woosa lubani* va mapuro yaayo.

⁵ Aakhenlle masiva mattheene oomwene m'mattani mwaye, Amaziya aawiipha allupa muttekwaaye alle yawiiphalle amwene, attiitthinnya.

⁶ Koma khaawiiphalle anamwani a athwaayo moollikana ni nnddo ddalembiwe mu nibukhu na malamulo a Mose mmo Apwiya yalamunliwa wi, “Makhollo ehiiphiweke ekaamba ya aniiwa, emoddamoddave anamwani ehiiphiweke ekaamba ya makhollwiiwa koma arive muthu iiphiweke ekaamba ya nichimo naye.”

⁷ Vano Amaziya aawiiphattho Aedomu 10,000 o ntapo na Mwiinyu, aakha muzinda wa Shela nave aawuromolla nnddina nawi Yokitele nave nnddina niwa tti nenno ophiyera ollello.

⁸ Enthawi emodda Amaziya ahaaruma amithenga wa Yowashi mwaana a Yehowahazi, mwaana a Yehu, mwene a o Israele yallota moomullika wi, “Owe noonane vamiitthoni ni vamiitthoni.”

⁹ Yowashi mwene a o Israele aahokollosa mawu wa Amaziya mwene a o Yuda wi, “Vaakhalla muteekho wamiiwa wa o Lebanoni oyo warumihalle mawu wa mukunguza wa o Lebanoni wi, ‘Mwaakhullelle mwanawo aamutthiyana wi atthelliwe ni mwanaka.’ Koma enama yawoopiha ya o Lebanoni yaavira vaavo ewunyingallella muteekho wamiiwooyo.

¹⁰ Ddawoona, we woomugonjiha Edomu nave vano onimiitukhulla. Itthamalleke ni opambana wawonko koma vano okhalle owaninyu wenko. Kaambiiwa tini onapaalleewe ottatthamulla ddookatamiha mwaphudda? Phaamathi oneeromora we ni athu a o Yuda.”

¹¹ Koma Amaziya khaaddipwathille ddenndda. Sika Yowashi mwene a o Israele, aaya awanana ni Amaziya, mwene a o Yuda, o Beteshemeshi o Yuda.

¹² Yuda aagonjihiwa ni Israele nave arive akhoto aathawella owaniwa.

¹³ Vano Yowashi mwene a o Israele aamuphara Amaziya mwene a o Yuda mwaana a Yowashi mwaana a Ahaziya o Beteshemeshi amuyaana o Yerusalemu. Nave Yowashi aakumulla mpanda wa Yerusalemu mamita 200 ovenyera va mullako wa Efuremu ophiyera va mullako wa Vakona.

¹⁴ Aamwaakha golide ni siliva muttheene ni eziwiya ddittheddene addiphwanyilleeye mu enyumba ya Apwiya ni mu enyumba yoosungellamo eyuuma ya mwene. Ahaapharattho athu amodda wonanko echikole ahokollweella o Samariya.

¹⁵ Mitteko ddimodda dda Yowashi dda masivaaye ni dda mmo awanilleeye ekhoto ni Amaziya mwene a o Yuda ddoolembiwa mu nibukhu na epilli ya mamwene a o Israele.

¹⁶ Nave Yowashi aakhwa avitthiwa mu mahame a makhollwaaye, mamwene a o Israele o Samariya. Sika Yerobowamu mwanaye aavollowa omwene munipuroni mwaye.

Okhwa wa Amaziya mwene a o Yuda

¹⁷ Amaziya mwaana a Yowashi, mwene a o Yuda aakhalla ni okumi miyakha khumi ni mitthanu akhwille Yowashi mwaana a Yehowahazi, mwene a o Israele.

¹⁸ Vano mitteko ddimodda eerille Amaziya ddoolembiwa mu nibukhu na epilli ya mamwene a o Yuda.

¹⁹ Athu amodda yahiiwanana ddoomweerella echiwembu Amaziya o Yerusalemu sika aathawella o Lakishi. Koma adanaaye yahaaruma athu ayo yamwiiphenlle wenko.

²⁰ Vano yaamutukhulla va akavalo eya yamuvittha o Yerusalemu mu mahame a makhollwaaye mu muzinda wa Davide.

²¹ Sika athu attheene a o Yuda yaamukusa Azariya mwanaye emuvollochiha omwene munipuroni mwa Amaziya attiitthinnya. Azariya aari ni miyakha 16 avolloweeye omwene.

²² Azariya ahaakha ni omakattho muzinda wa Elati awuhokollosella o Yuda attiitthinnya ekhwille.

Yerobowamu Aneepiilli mwene a o Israele

²³ Muyakha waneekhumi ni tthanu wa omwene wa Amaziya mwaana a Yowashi mwene a o Yuda, Yerobowamu mwaana a Yowashi mwene a o Israele aavollowa omwene wa o Samariya nave aalamulella miyakha 42.

²⁴ Olliye aheera ddoonanara vamiitthoni va Apwiya. Khaahiyalle weera machimo mattheene eera Yerobowamu mwaana a Nebati ayo aachimwihalleeyena Aisraele.

²⁵ Yerobowamu ahaakhattho mapuro mamodda ayo khalle yaari a Israele, ovenyera va mullako wa Hamati echigawo ya ompoto ophiyera ohito wa enyanja ya Araba. Sika ddaheereya nnddo Apwiya Mulluku a Israele yallotilliiwa oweella mwa oorumeyelliiwa Yona mwaana a Amitai, namallotella a o Gatihefere.

²⁶ Apwiya yahoona wi ddookatamiha dda Aisraele ddaari ddawoopiha. Khaavo naari mmodda ahanlle kaporo apaalle oottaphulliwa, awi ttuuwakavihera.

²⁷ Koma Apwiya kheyaallotille wi eneerewoononga omwene wa Israele va ellapo yavatthi. Sika yahaavullusa Aisraele oyeella mwa Yerobowamu mwaana a Yowashi.

²⁸ Vano mitteko ddimodda dda Yerobowamu ni ddittheddene enreeye dda masivaaye mmo awanelleeye ekhoto navettho mmo agonjihelleeye mizinda dda Damasiko ni Hamati aahokollosella Aisraele, ddittheddenennddo ddoolembiwa mu nibukhu na epilli ya mamwene a o Israele.

²⁹ Nave Yerobowamu aakhwa avitthiwa mu mahame a makhollwaaye, mamwene a o Israele. Vano Zekariya mwanaye aavollowa omwene munipuroni mwaye.