2 Mamwene 13 - Mawu a Mulluku

Yehowahazi mwene a o Israele

¹ Muyakha wa 23 wa omwene wa Yowashi mwaana a Ahaziya mwene a o Yuda, Yehowahazi mwaana a Yehu ahaamba olamulella Israele o Samariya nave aakhalla mwene miyakha 17.

² Olliye aheera ddoonanara vamiitthoni va Apwiya. Machimo ayo Yerobowamu mwaana a Nebati aachimwihalleeyena Aisraele khaawaahiyalle.

³ Sika Apwiya yahaashella murima Aisraele nave wiilliwiilli yahaakhullella wi Hazaele mwene a o Siriya ni Benihadadi mwaana a Hazaele yaagonjihe.

⁴ Vano Yehowahazi aavekella wa Apwiya nave yaamwiiwella vawi yahoona ohoosiwa wa Aisraele nko mwene a o Siriya aweerelleeye.

⁵ Sika ekaambiiwa Apwiya yamutthoollilliiwa oohoollella wi aavulluse Aisraele m'mattani mwa Asiriya. Sika Aisraele yaakhalla mwamurendelle mwiillaponi mwiwa wonanko yakhallelliiwa khalle.

⁶ Komave kheyaahiyalle weera machimo ayo yeera athu a va nibanja na Yerobowamu ayo aachimwihalleeyena Aisraele. Yaaneerave machimwaayo nave nifano na Asherimu naari nillapelliwakave o Samariya.

⁷ Enthawi yeeyo Yehowahazi khaarina mulloko wakhoto muullupalli. Aari ni akhoto 50 oowella va akavalo, magareta khumi ni akhoto 10,000 aweeta vatthi vawi mwene a o Siriya aari awoonongille khalle akhoto anchichi ni waatthattusa nthupi.

⁸ Vano mitteko ddimodda dda Yehowahazi ni nnddo eerilleeye ddoolembiwa mu nibukhu na epilli ya mamwene a o Israele.

⁹ Sika Yehowahazi aakhwa, avitthiwa mu mahame a makhollwaaye o Samariya. Vano Yowashi mwanaye aavollowa omwene munipuroni mwaye.

Yowashi mwene a o Israele

¹⁰ Muyakha wa 37 wa omwene wa Yowashi mwene a o Yuda, Yowashi mwaana a Yehowahazi ahaamba olamulella Israele mu Samariya nave aalamulella miyakha 16.

¹¹ Olliye aheera machimo vamiitthoni va Apwiya, oohihiya machimo mattheene eera Yerobowamu mwaana a Nebati ayo aachimwihalleeyena Aisraele.

¹² Vano mitteko ddimodda dda Yowashi ni ddittheddene nnddo eerilleeye owaakattho ddamasiva nnddo oonihalleeye voowanani ekhoto ni Amaziya mwene a o Yuda, ddoolembiwa mu nibukhu na epilli ya mamwene a o Israele.

¹³ Sika Yowashi aakhwa, avitthiwa o Samariya ni mamwene a o Israele. Vano Yerobowamu mwanaye aavollowa omwene munipuroni mwaye.

Okhwa wa namallotella Elisha

¹⁴ Mallapo yaayo Elisha aavoriiwa ereta yoohichirana nave Yowashi mwene a o Israele aaya amuzonda. Ahinlla miitthori vamiitthoni vaye wi, “Attiitthi, attiitthi! Magareta a Israele ni oowellavwiiwa!”

¹⁵ Vano Elisha aamulleella Yowashi wi, “Kusani muura ni mipaamba.” Sika aakusa muura ni mipaamba.

¹⁶ Vano Elisha aamulleella Yowashi mwene a o Israele wi, “Kokani muura.” Olliye aakoka. Vaavo Elisha aahiya mattaaye va matta a mwene

¹⁷ nave aallota wi, “Hullani niwindo na embali ya wookhuma nndduwa.” Nave aanihulla. Vano Elisha aallota wi, “Vokhani.” Yowashi aavokha. Vaavo Elisha aallota wi, “Nyu tti mpaamba wa Apwiya woogonjihellana ekhoto, woogonjihellana Asiriya. Vawi muneerowanana ekhoto Asiriya o Afeki ophiyera waatthollosa.”

¹⁸ Nave aallota wi, “Kusani mipaamba ddimodda.” Yowashi ahaakusa. Vano Elisha aamulleella mwene a o Israele wi, “Homani vatthi ni mipaambannddo.” Nave olliye aahoma vatthi oraru, ahiya.

¹⁹ Vano Elisha muthu a Mulluku aamushella murima allota wi, “Mwahomilleke otthanu apaalle otthanu ni omodda, mweerewaatthollosa Aasiriya. Koma vano munaagonjihe oraruve.”

²⁰ Vatulli viwa Elisha aakhwa nave aavitthiwa. Enthawi yeeyo milloko ddakhoto dda Amowabu ddaanahella ekhoto mwiillaponimmo orive muyakha.

²¹ Nllapo nimodda Aisraele amodda emuvitthaka mukhwiiwa yahoona mulloko wakhoto wa Amowabu. Sika yaavokhella mutembooyo mu mahame a Elisha ethawa. Muthu ookhooyo attannyilleeye makhuva a Elisha aahihimuwa nave ahiimella.

Israele anamugonjiha Siriya

²² Hazaele mwene a o Siriya aanaahoosa Aisraele mallapo mattheene a Yehowahazi.

²³ Koma Apwiya yahaareerella murima ni oweerella echifundo Aisraele. Yahaakhurumuwella murima ekaamba ya echipangano eyo yakeraatthihalliiwa ni Abrahamu, Isaki ni Yakobo. Kheyaapanlle wi ewoononge apaalle waatiwalla athwiiwa ophiyera ollello.

²⁴ Hazaele mwene a o Siriya akhwille, Benihadadi mwanaye aavollowa omwene munipuroni mwaye.

²⁵ Enthawi yeeyo Yowashi mwaana a Yehowahazi, ahaakhattho ovenyera wa Benihadadi, mwaana a Hazaele, mizinda nnddo Benihadadi aakhilleeye voowanani ekhoto ni Yehowahazi attiitthinnya a Yowashi. Yowashi aamugonjiha Benihadadi oraru, aakhattho mizinda ddittheddene dda Israele.