2 Mamwene 12 - Mawu a Mulluku

Yowashi mwene a o Yuda

¹ Muyakha waneetthanu ni piilli wa omwene wa Yehu, Yowashi aavollowa omwene nave aalamulella miyakha 40 o Yerusalemu. Amennya yaari Zibiya a o Beeresheba.

² Vano Yowashi aheera ddoolungama vamiitthoni va Apwiya mallapo mattheene a okumaaye ekaamba yawi Yehoyada, mullupa mukutho aanamulangiza.

³ Komave mapuro oollapellamo mafano kheyaawoonongille. Athu yaavirellellave ovelleella mikutho ni woosa lubani* va mapuro yaayo.

⁴ Enthawi emodda, mwene Yowashi allupa mukutho wi, “Musunge phaama ddene makobiri mattheene ayo enavelleelliiwa wonanko ddoovelleella ddoopatuleya o enyumba ya Apwiya, sika wi makobiri a musonkho wa arive muthu komattho makobiri ayo muthu anavelleelleeye moopaalla mwaye o enyumba ya Apwiya.

⁵ Arive mullupa mukutho awehereke makobiri oovelleelliwa ni athu anaarumeyelleeye nave aphariheke mutteko voopotokosani enyumba virive veko mvo vinapaalleya opotokosa.”

⁶ Koma voophiyani muyakha wa 23 wa omwene wa Yowashi, allupa mukuthwaayo yaari ehinapotokoseve enyumbeeyo.

⁷ Sika ekaambiiwa mwene Yowashi amwiithanilleeye mullupa mukutho Yehoyada ni allupa mukutho amodda ni waakoha wi, “Ethiyo kaambiiwa tini muhinapotokoseenyu enyumbeella? Waambeella ollello, muhisungekemottho makobiri a athu ayo munaarumeyelleenyu koma mwaavelleelle makobiraayo wi athu epotokoselle enyumbeella.”

⁸ Allupa mukuthwaayo yahaakhullella wi khewa ekusattho makobiri ovenyera wa athu nave wi khe alliwa enaapotokose enyumbeeyo koma athu amodda.

⁹ Vano Yehoyada mullupa mukutho aakusa nibokosi, aphovolla va yookhuneelliiwa, anihiya vakhwipi va nikuwa onnattanatta wa arive muthu oovollowa mu enyumba ya Apwiya. Allupa mukutho ayo yaari va mullako yaanavokhellamo makobiri mattheene ayo athu yawaneewana o enyumba ya Apwiya.

¹⁰ Enthawi ddittheddene yoona wi mu nibokosimmo mookhalla makobiri manchichi, namalembella a mwene ni muullupalli a allupa mukutho aanaweerengella ni waamaka m'mathumbani makobiri ayo yaari mu enyumba ya Apwiya.

¹¹ Vano yaalinga makobiraayo, yaanaavelleella wa akapitawo oomakiha enyumba ya Apwiya. Alliwa yaanaallivella oopala matabwa ni oomaka enyumba, ayo yaphara mutteko woopotokosa enyumba ya Apwiyaayo.

¹² Yaanaallivellattho oomaka ni malluku ni oosema malluku navettho yaanakulla miteekho ni malluku oovuhulliwa oopotokosella enyumba ya Apwiya owaakattho ddeko ddoopaalleya voopotokosani.

¹³ Koma mabeseni asiliva a o enyumba ya Apwiya, apaalle ddoopanella ddeko, embale, mapallapata, ddeko ddoopharihella mutteko okichini dda golide ni dda siliva, kheyaaddikullalle ni makobiri ayo yavelleelliiwa o enyumba ya Apwiya,

¹⁴ vawi yaayo yaallivella allupa mutteko oopotokosa enyumba ya Apwiya.

¹⁵ Athu ayo yinnyiwa makobiri oollivella allupa mutteko oopotokosa enyumbeeyo kheyaakoha wi etthopoolle dda mmo yeetihelliiwa vawi yaari oororomelleya.

¹⁶ Makobiri oollivella mukutho wa mullatu navettho makobiri oollivella mikutho ddoopepesella machimo kheyaavokha mu nibokosi na mu enyumba ya Apwiya koma yaari a allupa mukutho.

¹⁷ Enthawi yeeyo Hazaele mwene a o Siriya aahella ekhoto ni waakha muzinda wa Gati nave aapaalla wi ahellettho ekhoto o Yerusalemu.

¹⁸ Koma Yowashi mwene a o Yuda aakusa ddoovelleella ddittheddene ddoopatuleya nnddo Yehoshafati, Yehoramu ni Ahaziya, makhollwaaye, mamwene a o Yuda yaddivelleelliiwa wa Mulluku ni emphaso ddaayeddaaye ddoopatuleya owaakattho golide muttheene oyo amuphwanyilleeye mu enyumba ddoosungellamo eyuuma ya o enyumba ya Apwiya ni ya o enyumba ya mwene. Ddittheddenennddo addirumihalle monga emphaso ddoomupepesella Hazaele mwene a o Siriya. Vano Hazaele aaddaakhella avenyawo o Yerusalemu.

¹⁹ Vano mitteko ddimodda dda Yowashi ni ddittheddene nnddo eerilleeye ddoolembiwa mu nibukhu na epilli ya mamwene a o Yuda.

²⁰ Enduna ddaye ddaamweerella echiwembu nave ddaamwiipha ompandani wa enyumba ya Milo eyo eri va ettilla yookitthella o Sila.

²¹ Yosakara mwaana a Shimeati ni Yozabadi mwaana a Shomere sika yeerille ddenndda. Nave yaamuvittha mu mahame a makhollwaaye mu muzinda wa Davide. Vano Amaziya mwanaye aavollowa omwene munipuroni mwaye.