2 Mamwene 11 - Mawu a Mulluku

Ataliya mwene eetthiyana a o Yuda

¹ Ataliya amennya a Ahaziya oonille wi mwanaye ookhwa, aatimulla awoononga athu attheene a va nibanja noomwene.

² Koma Yehosheba mwaana aamutthiyana a mwene Yehoramu, murokoriye a Ahaziya aamukusa Yowashi mwaana a Ahaziya. Aamwiiya variyari va anamwani aallopwana a mwene ayo yaari vakhuviru wiiphiwa. Aamuhiya mu echipinda emodda yookona ya mu enyumba ya Apwiya ni oomullellaaye. Sika aamusunga mwaanooyo, omooviha Ataliya wawi khaawiiphiwe.

³ Mwaanooyo aakhalla ni oomullellaaye wa miyakha mitthanu ni mmodda iipitthaka mu enyumba ya Apwiya mvo Ataliya alamulelleeye ellapo.

⁴ Koma muyakha waneetthanu ni piilli, mullupa mukutho nnddina naye Yehoyada aawiithaniha oohoollella a akhoto oomuwehera mwene ni a alonda a o enyumba yoomwene. Nave Yehoyada aakumana mu enyumba ya Apwiya. Vano aakeraatthiha echipangano, ahaallupelliha mu enyumba ya Apwiya. Sika aawooniha mwaana a mwene.

⁵ Nave ahaalamula wi, “Nyu a mu echigawo yawaamba, oorumeyella va nllapo na Sabata mukawaneye vararu, mulloko wawaamba owehereke o enyumba yoomwene,

⁶ mulloko waneepiilli owehereke va mullako wa Suri nave mulloko waneeraru owehereke mullako wa otulli wa akhoto ewehereke o enyumba ya Apwiya.

⁷ Amodda a mu ezigawo piillinnddo ooworowa omuttekoni va nllapo na Sabata ewehereke o enyumba ya Apwiya wi emutetezeke mwene.

⁸ Mumwaapheelleke mwene, arive muthu akusalle ezida m'mattani. Arive muthu anaatamelleke vakhuviru, iiphiweke. Mukhalleke ni mwene orive weko anayeeye.”

⁹ Oohoollellaayo yaheera ddittheddene moollikana ni mmo mullupa mukutho Yehoyada aalamulelleeye. Arive muthu aawaana athwaaye ayo yaamba muttekwiiwa va nllapo na Sabata vamoddattho ni ayo yaworowa o muttekwiiwa woolonda va nllapo na Sabata. Attheene yaaphiya wa Yehoyada mullupa mukutho.

¹⁰ Olliye aawinnya oohoollellaayo mavaka ni ddootetezella nnddo ddaari dda mwene Davide. Ddenndda ddasungiwa mu enyumba ya Apwiya.

¹¹ Vano ahaatthattaniha akhoto wi emutetezeke mwene, arive muthu ari ni ezida m'mattani mwaye ovenyera omwera ophiyera ompoto wa enyumba waapheella nikuwa ni enyumba ya Apwiya.

¹² Sika ahaakhumihella mwaana a mwene, amuwariha enduwira yoomwene, amwinnya nibukhu na malamulo nave amuzoza amuvollochiha omwene. Athu yaamoopella m'mattani ellota mookhuwa wi, “Mwene akhalle ni okumi woorekama.”

¹³ Vano Ataliya iiwalleeye okhuwa wa akhoto ni wa athu, aaya o enyumba ya Apwiya.

¹⁴ Awehille, aamoona mwene iimenlle vanttatthani naye moothwara mutetho wa omwene, oohoollella ni athu awiipa mapallapata emwaaphenlle. Athu attheene a mu echigawommo yaanahakallalla yiipaka mapallapata. Sika Ataliya ahaahulla ddoowara ddaye nave mookhuwa ni moosha murima aallota wi, “Owukila! Owukila!”

¹⁵ Vano mullupa mukutho Yehoyada ahaalamula oohoollella a akhoto wi, “Mukhumiheni yoolla m'mizereni mmo mutthattanneenyu. Nave arive muthu anaamuthware mmwiiphe ni nsupada!” Mullupa mukuthooyo aalamula mwawi ddiidda wi ehimwiiphelle mu enyumba ya Apwiya.

¹⁶ Nave yaamphara Ataliya emuyaana o enyumba yoomwene va mullako wa Akavalo emwiiphella vaavo.

Yehoyada anakeraatthiha mallapello

¹⁷ Yehoyada aakeraatthiha echipangano variyari va Apwiya ni mwene ni athu wi alliwa ekhalle athu a Apwiya. Aakeraatthihattho echipangano variyari va athu ni mwene.

¹⁸ Sika athu attheene a mu ellapweeyo yaaya o enyumba ya Baala eyikumulla. Yaakumulla makuwaaye ni mafanwaaye. Vatulli viwa yaamwiipha Matani mullupa mukutho a Baala vahoollo va makuwa. Vano mullupa mukutho Yehoyada ahaahiya alonda o enyumba ya Apwiya.

¹⁹ Vatulli viwa olliye ahaatthattaniha oohoollella a akhoto, akhoto oomuwehera mwene ni athu attheene a mwiillaponimmo. Attheene yaamuvelleella mwene ovenyera o enyumba ya Apwiya oyeella o mullako wa Alonda ophiya o enyumba yoomwene. Sika Yowashi aakeraatthi va mpando woomwene.

²⁰ Sika athu a mwiillaponimmo yaahakallalla nave m'muzindanimmo mwaamaalleya Ataliya iiphiweeye o enyumba yoomwene.

²¹ Yowashi aari ni miyakha mitthanu ni miilli mvo avollochihiweeye omwene.