2 Mamwene 10 - Mawu a Mulluku

Wiiphiwa wa edduullu dda Ahabu

¹ Mwene Ahabu o Samariya aari ni edduullu ddeellopwana 70. Vano Yehu aalemba makalata aarumiha o Samariya wa oolamulella muzindooyo, attekweene ni athu ayo yallella edduullu dda Ahabu wi,

² “Nyu munallella ni owehera edduullu dda pwiinyu Ahabu nave mookhalla ni magareta, ezida dda akhoto ni mizinda ddamipanda. Sika mwamwaakhella kalatoolla,

³ mwa edduullu dda pwiinyu mumutthoolle mmodda awooneya phaama nave oophwanelliwa, mumuvollochihe omwene wa attiitthaaye. Sika mukhozekelle ekhoto owanella nibanja na pwiinyu.”

⁴ Koma athwaayo yahoova wunchichi nave yaallota wi, “Haa! Mamwene eellaalle kheyaawonre ollipana ni Yehu, vano hi ttuuwora?”

⁵ Sika muthu oowehera enyumba yoomwene, oowehera muzinda, attekweene, ni awaallella anamwani yaarumiha mawu wa Yehu wi, “Hi tti athwaanyu nave nineereweera ddittheddene munaanilleelleenyu. Khaniwa nimuvollochiha omwene arive muthu. Erani erive ello enuuddivelleni.”

⁶ Yehu ahaalembellattho kalata aneepiilli wi, “Mwaarimi muri vatulli vaka nave ookhozeka okiiwellella, muphadde miru dda anamwani a apwiinyu muweena wa miyaano o Yezireele osiisello enthawi wonanko yeella.” Sika wi edduullu 70 ddamwene nndde ddallelliwa ni attekweene a mu muzindaalle.

⁷ Sika attekweenaayo emwaakhenlle kalatooyo, yaaphara edduullu 70 ddittheddene dda mwene, eddiipha, ehiya miru ddiwa m'mitaangani eddirumiha wa Yehu o Yezireele.

⁸ Vano amithenga aaphiya amulleella Yehu wi, “Aawaana miru dda edduullu dda mwene.” Vaavo olliye aallota wi, “Khaweni mwadduukelle m'mapuroni meelli voovollowella nave ddikhalle vaavo ophiyera ohinase.”

⁹ Osaka wene akhumalle, Yehu aayaawo aalleella athu attheene wi, “Nyu khamuchimwalle. Oochimwa tti mi vawi kaamweerella echiwembu pwiyaaka, kaamwiipha. Koma ttaani awiiphalle athu attheenaalla?

¹⁰ Vano dduwellani wi mawu a Apwiya ayo yallotilliiwa dda nibanja na Ahabu eneerokwakhwanihelliwa. Nave Apwiya aheera nnddo yallotilliiwa oyeella mwa Eliya oorumeyelliiwa.”

¹¹ Vatulli viwa Yehu aawiipha athu attheene oohalla a nibanja na Ahabu o Yezireele, attekweenaaye attheene, akhwaaye attheene ni allupa mukuthwaaye. Khaamuhiyallevo naari mmodda.

Wiiphiwa wa abale a mwene Ahaziya

¹² Vatulli viwa Yehu aatimulla aya o Samariya. Aphiyalle va nipuro nooromolliwa “Vookona Abusa,”

¹³ aakumana ni abale a Ahaziya mwene a o Yuda. Ahaakoha wi, “Ethiyo nyu ttaani?” Alliwa yahaakhulla wi, “Hi tti abale a Ahaziya nave noowa wi naarere ni anamwani a mwene Ahabu owaakattho anamwani a mwene aamutthiyana Yezebele.”

¹⁴ Vano Yehu aallota wi, “Akuseni eri akumi.” Nave yahaakusa akumi, aya awiiphella munllitini va nipuro nawiiphellavo athu nave athu 42 yahiiphiwa, oohimuhiyavo naari mmodda.

Wiiphiwa wa abale oohalla a Ahabu

¹⁵ Yehu avenyillewo, aakumana ni Yehonadabu mwaana a Rekabu oomuchingamella. Vano aamullochella amukoha wi, “Ethiyo maganizwaawo enniiwanana ni miyaano monga ekhallelle aaka ni aawo?” Yonadabu ahaakhulla wi, “Ee, ddaahu tti ddimodda.” Yehu aallota wi, “Ddaari ddiri ddiiddo, kiphare nnatta.” Yehonadabu aavelleella nnatta naye, Yehu aniphara, amuwelliha va nigareta.

¹⁶ Nave aamulleella wi, “Hanko woone mmo kiniivelleelleemi wa Apwiya.” Sika aheetana mu nigareta naye.

¹⁷ Aphiyalle o Samariya, Yehu aawiipha oohalla attheene a nibanja na Ahabu, ahaatthollosa attheene moollikana ni mawu ayo Apwiya yallotilliiwa wa Eliya.

Wiiphiwa wa athu oollapella Baala

¹⁸ Vatulli viwa Yehu ahaatthukumaniha athu attheene a muzinda wa Samariya aalleella wi, “Ahabu aamurumeyella Baala vang'ono koma Yehu aneeromurumeyella wunchichi.

¹⁹ Sika kiithanelleni anamallotella attheene a Baala vamodda ni oorumeyellaaye ni anamallotellaaye attheene. Vihirame naari mmodda vawi kookhalla ni mukutho muullupalli wawi kiwuvelleelle wa Baala. Oyo anaaramevo, aneerewiiphiwa.” Koma Yehu aheera ddenndda moolleka wi awoononge attheene oomullapella Baala.

²⁰ Vano Yehu aalamula wi: “Mullalleye wi wookhalla mutthukumano woomuriiha ni omuvaha olemu Baala.” Sika athu yaallalleya dda mutthukumanooyo.

²¹ Yehu aarumiha mawu o ellapo ettheene ya Israele nave attheene oomullapella Baala yaawa wawi khaahanllevo naari mmodda. Attheenaayo yaavollowa mu enyumba ya Baala mwawi yaaddallamo.

²² Vano Yehu aamulleella muthu oosunga ddoowara wi, “Owe ni ddoowara ddoopatuleya ddookwakhwanella athu attheene oomullapella Baala.” Muthooyo ahaakusella ddoowarannddo.

²³ Yehu aavollowa mu enyumba ya Baala ni Yonadabu mwaana a Rekabu. Nave ahaalleella athu oomullapella Baala wi, “Wehesesani phaama nave onesesani wi vihikhalle oorumeyella a Apwiya variyari vanyu koma yaayove oomullapella Baala.” Vano Yehu aavollowa mu enyumba ya Baala avelleella mikutho ddooshellelliha.

²⁴ Koma Yehu aari aahiyalle vaatte athu 80 aalleella wi, “Aneerewiiphiwa oyo anaamuthawihe arive muthu mwa ayo kinaawinnyeemi wi muwiiphe.”

²⁵ Vano Yehu amallihalle ovelleella mukutho wooshellelliha ahaalleella akhoto ni akapitawo wi, “Vollowani muwiiphe! Ahithawe naari mmodda.” Alliwa yaavollowa, ewiipha attheene ayo yaari mwemmo, etathillella mitembo ddiwa vaatte. Yaavollowattho mu echipinda yamuwari ya enyumbeeyo.

²⁶ Nave yaakhumihamo opoto woopatuleya oyo aari mu enyumba ya Baala ewoosa.

²⁷ Sika yaakumulla nifano na Baala ni enyumbaaye eyitthattusa nddalla ophiyera ollello.

²⁸ Sika Yehu ahoononga ellapello ya Baala mu Israele.

²⁹ Koma khaahiyallesese ddoonanara nnddo eera Yerobowamu mwaana a Nebati nnddo aachimwihalleeyena Aisraele. Khaahiyalle ollapella mafano agolide a asaanaang'ombe ayo yaari o Betele ni o Dani.

³⁰ Nave Apwiya yaamulleella Yehu wi, “Ekaamba yawi woheera ddookiddivella, vawoonongani nibanja na Ahabu moollikana ni mmo kapaallelleemi, edduullu ddawo ddineerewaalamulella Aisraele ophiyera mbado waneesese.”

³¹ Koma Yehu khiiwellella malamulo a Apwiya Mulluku a Israele ni murimaaye muttheene. Aavirellellave weera ddoonanara nnddo Yerobowamu aachimwihalleeyena Aisraele.

Okhwa wa Yehu

³² Mallapo yaayo Apwiya yahaamba oyeviha ellapo ya Israele. Mwene Hazaele a o Siriya aagonjiha echigawo ya Israele.

³³ Aambeelle o Yordani wookhuma nndduwa, aphiya o Aroere vakhuviru ni ntapo na Arinoni. Ellapo yeella yattakanyihera ezigawo ddittheddene dda Giliyadi ni Bashani nko wakhalla edduullu dda Gadi, Rubeni ni Manase.

³⁴ Vano mitteko ddimodda dda Yehu ni ddittheddene eerilleeye ddoolembiwa mu nibukhu na epilli ya mamwene a o Israele.

³⁵ Yehu aakhwa, avitthiwa mu mahame mu muzinda wa Samariya. Nave Yohowahazi mwanaye aavollowa omwene o Israele munipuroni mwaye.

³⁶ Yehu aalamulella Israele o Samariya miyakha 28.