2 Mamwene 1 - Mawu a Mulluku

Ahaziya ni Eliya

¹ Mwene Ahabu a o Israele akhwille, Amowabu yahaawukila Aisraele.

² Nllapo nimodda mwene Ahaziya aamora ovenyera va nikhote na echipindaaye yamuddullu aphoreya wunchichi. Sika ahaaruma amithenga wi, “Khaweni mwakohe wa Baala Zebubi, mulluku a athu a o Ekeroni keeki kichire.”

³ Koma mungelo a Apwiya aamulleella Eliya Mutishibe wi, “Timulla, khawe wakumane ni amithenga a mwene a o Samariya, waakohe wi, ‘Ethiyo o Israele khori Mulluku mvo munayeenyu wooveka ezeru wa Baala Zebubi, mulluku a athu a o Ekeroni?’

⁴ Sika Apwiya enallota wi, ‘We khovenya vabedini okonaatthilleewemvo, ddawoona, oneerokhwa.’ ” Vano Eliya aarowa.

⁵ Amithengaayo yaahokollweella wa mwene. Vano olliye ahaakoha wi, “Kaambiiwa tini muhokollowilleenyu?”

⁶ Amithengaayo yahaakhulla wi, “Waawa muthu, akumana ni hiyaano nave aanilleella wi nihokollweelle wa mwene oyo anirumalle wi namulleelle mawu a Apwiya awi, ‘Ethiyo o Israele khori Mulluku mvo munayeenyu wooveka ezeru wa Baala Zebubi, mulluku a athu a o Ekeroni?’ We khovenya vabedini okonaatthilleewemvo, ddawoona, oneerokhwa.”

⁷ Mwene ahaakoha amithengaayo wi, “Ethiyo muthu oyo uulleelleni ddenndda ooneya mwawiidde?”

⁸ Alliwa yahaakhulla wi, “Muthooyo awanre ddoowara dda mapururu ni laamba anttapara muyuununi.” Sika mwenooyo aallota wi, “Yooyo tti Eliya Mutishibe.”

⁹ Vaavo mwene aamuruma akhoto muullupalli mmodda ni athwaaye 50 wa Eliya. Olliye aaya wa Eliya, amuphwanya akeraatthille vamwaangoni. Aamulleella wi, “Nyu muthu a Mulluku, mwene anuulamulani wi mukitthe.”

¹⁰ Koma Eliya aamulleella akhoto muullupallooyo wi, “Kaarimi kiri muthu a Mulluku, munllo okitthe ovenyera oddullu wuushellellihe we ni athwaawo 50. Vaavo munllo waakittha ovenyera oddullu, omushellelliha akhoto muullupallooyo ni athwaaye.”

¹¹ Vano mwene aamuruma akhoto muullupalli mmodda ni akhotwaaye 50. Olliye ni athwaaye yaamulleella Eliya wi, “Nyu muthu a Mulluku, mwene anuulamulani wi mukitthe mwawaakuva.”

¹² Koma Eliya aamwaakhulla wi, “Kaarimi kiri muthu a Mulluku, munllo okitthe ovenyera oddullu wuushellellihe we ni athwaawo 50. Vaavo munllo waakittha ovenyera oddullu, omushellelliha akhoto muullupallooyo ni athwaaye.”

¹³ Mwene aamurumattho akhoto muullupalli mmodda aneeraru ni akhotwaaye 50. Koma olliye aaya akokhora vamiitthoni va Eliya amuveka wi, “Nyu muthu a Mulluku, pepaani, kinimuuvekani wi mukeerelle echifundo, mi ni athwaaka muhinoononge.

¹⁴ Ngoonani, munllo waakittha ovenyera oddullu waashellelliha oohoollella eellaalle vamodda ni athwiiwa. Pepaani, nivulluseni muhinoononge.”

¹⁵ Vaavo mungelo a Apwiya aamulleella Eliya wi, “Khawe ni akhoto muullupalloolla, ohimoove.” Vano Eliya aatimulla, akittha ni akhoto muullupalli oya wa mwene.

¹⁶ Nave Eliya aamulleella mwene wi, “Ethiyo o Israele khori Apwiya wi wohaaruma amithenga wi yaveke ezeru wa Baala Zebubi, mulluku a athu a o Ekeroni? We khovenya vabedini okonaatthilleewemvo, ddawoona, oneerokhwa.”

¹⁷ Sika Ahaziya aakhwa moollikana ni mmo yallotelle Apwiya oweella mwa Eliya. Nave vawi Ahaziya khaarina mwaana aamullopwana, Yoramu mwanamunne aavollowa omwene munipuroni mwaye va muyakha waneepiilli wa omwene wa Yehoramu mwaana a Yehoshafati mwene a o Yuda.

¹⁸ Vano mitteko ddimodda dda Ahaziya ni ddittheddene eerilleeye ddoolembiwa mu nibukhu na epilli ya mamwene o a Israele.