2 Epilli 9 - Mawu a Mulluku

Mwene aamutthiyana a o Sheba enamweetella Solomoni

¹ Mwene aamutthiyana a o ellapo ya Sheba iiwalleeye dda ovuwa wa Solomoni aaya wa Solomoni wi amukohe makoho ookatamiha. Ayiille o Yerusalemunko ni mulloko muullupalli wa oomurumeyellaaye ni ekamira* nnddo ddatukhunlle makhura awunkhella, golide munchichi ni malluku oowallamella mutengo. Aphiyalleeye wa Solomoni aamukoha makoho mattheene aariiyena.

² Vano Solomoni aamwaakhulla makohwaaye mattheene. Kheyaarivo yoomukatamiha yawi khaaworille omutthopoollella.

³ Nave adduwenlleeye wi Solomoni aakhalla ni ezeru ni woona enyumba aamakilleeye,

⁴ ddoocha ddaye, mmo enduna ddaye ddakhallelliiwa, miimellello ni mawarello a oorumeyellaaye, oorumeyellaaye oovelleella ddoowirya ni mikutho ddaye ddooshellelliha avelleelleeye mu enyumba ya Apwiya, khaarittho ni yoollota.

⁵ Vano aamulleella mwenoolle wi, “Tti ddawoona nnddo kiiwalleemi kiri mu ellapwaaka dda mmo munakhallelleenyu ni dda ezeru ddanyu.

⁶ Koma ddenndda ngaaddikhulupilinlle ophiyera kiwiilleemimva nave kohoona ni miitthwaaka. Athu yakilleelle ddooyevave koma kohoona wi ezeru ddanyu ni ddeko ddanyu tti ddinchichi okhwaranya nnddo kiiwalleemi.

⁷ Oodalisiwa tti athwaanyu! Oodalisiwa tti oorumeyellaanyu ayo eniimella vamiitthoni vanyu eniiwellella ezeru ddanyu.

⁸ Oodalisiwa tti Apwiya Mulluku ayo ehakallanlle ekaamba ya nyuwaano ni wuukeraatthihani va mpando woomwene vamiitthoni viwa. Ennamukonda Israele nave annapaalla omukeraatthiha wa enthawi yoohimalla sika aaweerani wi mukhalle mwene wi mwalamulelle mwa echiweruzo ni mwa echilungamo.”

⁹ Vano aamuvaha mwenoolle golide makilogaramu 4,000, makhura awunkhella manchichi ni malluku manchichi oowallamella mutengo. Mwene Solomoni aari ahinavahiweke makhura awunkhella manchichi mwawi ddiidda nnddo mwene aamutthiyana a o Sheba aamuvahilleeye.

¹⁰ Oorumeyella a Huramu, ayo yawiillena golide ovenyera o Ofiri, yaawaanattho miteekho ddampawa ddinchichi ni malluku oowallamella mutengo.

¹¹ Nave mwenooyo aapangella miteekho ddampawannddo apoto a enyumba ya Apwiya ni enyumba ya mwenooyo. Miteekhonnddo aapangellattho ezida dduullupalli ni dding'onong'ono. Ddawi ddiidda kheddiniiweyeke apaalle wooneya ovenyera khalle mu ellapo ya Yuda.

¹² Nave Solomoni aamuvaha mwene aamutthiyana a o Sheba ddittheddene apaalleeye ni erive ello aavekilleeye oheerengella nnddo avahiweeye khalle moowaakakhana ni emphaso nnddo awiilleeyena wa mwene Solomoni. Vatulli viwa mwene aamutthiyana ni oomurumeyellaaye yaahokollweella o ellapo yoowaniwa.

Eyuuma ya mwene Solomoni

¹³ Muyakha ni muyakha Solomoni aanamwaakhella golide oollemella makilogaramu 23,000,

¹⁴ oohimweerengella oyo avenyera wa allupa malonda. Nave mamwene mattheene a o Arabiya ni enduna dda mwiillaponimmo yaanawa wa Solomoni ni golide ni siliva.

¹⁵ Mwene Solomoni aapanga ddawiitetezella vakhotoni dduullupalli 200 ddagolide oohana. Erive yawiitetezella yaapangiwa ni golide oollemella makilogaramu matthanu ni nimodda.

¹⁶ Aapangattho ddawiitetezella ddagolide oohana 300. Erive yawiitetezella eng'onong'ono yaapangiwa ni golide oollemella makilogaramu mararu nave mwenooyo aahiya ddenndda mu Enyumba ya Otthako wa Lebanoni.

¹⁷ Mwenooyo aapangattho mpando woomwene muullupalli wa manyaka a ethepo nave aawuumara golide aphaama wunchichi.

¹⁸ Mpando woomwenoolla waakhalla ni masitepe matthanu ni emodda ophiya vookeraatthella ni voonyingalla nave embali piilli ddittheddene ddaakhalla ni voohameellihavo miwono ni ddoosema dda mikango ddiimesiwe embali piillinnddo.

¹⁹ Ddoosemiwa khumi ni piilli dda mikango ddahiimesiwattho emodda nngu ni nngu va erive esitepe va masitepe matthanu ni emoddaayo. Khawaarivo omwene waari ni mpando woopangiwa mwawi ddiidda.

²⁰ Eziwiya ddittheddene ddoowiryella dda Solomoni ddaari ddagolide nave eziwiya dda mu enyumba ya Otthako wa Lebanoni ddaari ddagolide aphaama ni malluku mamodda. Eziwiya ddasiliva kheddaarivo kaambiiwa siliva kheesiwa ello mu enthawi ya Solomoni.

²¹ Mwenoolle aanaakhella esitima ddoovenyera o Tarishishi. Esitima ddoovenyera o Tarishishi ddaanawaana allupa mutteko a Huramu, malluku agolide, malluku asiliva, manyaka eethepo, akholle ni anachama.

²² Sika Solomoni ahaakhwaranya mamwene mattheene a va ellapo yavatthi vookhallani ni eyuuma ni ezeru.

²³ Mamwene mattheene a mu ellapo yavatthi yaanapaalla omoona Solomoni wi yiiwe ezeru ddaye, nnddo Mulluku aamuvahilleeye.

²⁴ Arive mwene aanawaana emphaso ddaye ddinchichi, ddeko ddoopangiwa ni siliva ni golide, ddoowara, mure,* makhura awunkhella, akavalo ni enyuru*. Nndda ddaaneereya orive muyakha.

²⁵ Solomoni aakhalla ni makholla 4,000 oosungellamo akavalo ni magaretaaye navettho aakhalla ni athu aweetiha akavalo 12,000. Ahaahiya amodda o mizinda nko wakhalla akhoto ni amoddattho vakhuviru ni mwene a o Yerusalemu.

²⁶ Vano aalamulella mamwene mattheene waambeella o Yufurate ophiya o ellapo ya Afilisti ni omalireni a Iguputo.

²⁷ Vano Solomoni aheeriha wi mu Yerusalemu mukhalle siliva awaata wonanko malluku. Aheerihattho wi mukunguza waate wonanko namukuyu a mutapo muhito mwa miyaango dda Yuda.

²⁸ Nave yaamukullella Solomoni akavalo ovenyera o Iguputo ni o ellapo ddimodda.

Okhwa wa Solomoni

²⁹ Ethiyo vano mitteko ddimodda ddittheddene dda Solomoni ovenyera vawaamba ophiyera omakuthullello, kheddilembiwe mu epilli ya namallotella Natani ni mu nibukhu na oollohella Ahiya Mushiloni navettho mu nibukhu ninallota nnddo oollohella Ido addoonilleeye masomphenya dda Yerobowamu mwaana a Nebati?

³⁰ Solomoni o Yerusalemu ahaalamulella Aisraele attheene wa miyakha 40.

³¹ Vano Solomoni aakhwa avitthiwa mu muzinda wa Davide, attiitthinnya. Nave Rehobowamu, mwanaye, aavollowa omwenaaye.