2 Epilli 8 - Mawu a Mulluku

Mitteko ddimodda dda Solomoni

¹ Mutteko woomaka enyumba ya Apwiya ni enyumba yoomwene yamukuselle miyakha makhumi meelli.

² Vatulli viwa Solomoni aamakattho mizinda nnddo Huramu aamuvahilleeye wi Aisraele ekhallekemo.

³ Nave Solomoni aaya wa Hamatizoba aakha muzindooyo.

⁴ Aamaka Tadimori ochipululuni navettho mizinda ddittheddene ddoosungellamo eyuuma o Hamati.

⁵ Aamakattho Betehoroni A omwaako ni Betehoroni Oohito, mizinda dda mipanda ddookhalla ni esiri, millako ni mikoko ddoollipa.

⁶ Nave aamakattho Baalati ni mizinda ddittheddene ddoosungellamo eyuumaaye ni magaretaaye, mizinda dda athu aweetiha magareta ni ddeko ddittheddene apanlleeye wi amake mu Yerusalemu ni mu Lebanoni navettho orive weko mu omwenaaye.

⁷ Athu a mitundu ddimodda ayo yahiri Aisraeli yahanlle yaari Aamori, Ahiti, Aperezi, Ahivi ni Ayebusi.

⁸ Alla yaari edduullu ddoohalla mu ellapweeyo ayo Aisraele yahaatthollosilliiwa. Mwene Solomoni aanaaphariha mutteko wathangata nave athu yaalla ennapharave ophiyera ollellova.

⁹ Koma Aisraele attheene, Solomoni khaapharihalle mutteko wa okaporo. Yaalla yaari akhoto, enduna ddaye, akhoto uullupalli, oolamulella ekhoto, oolamulella magareta ni oowella va akavalo.

¹⁰ Nave enduna dda mwene Solomoni ddaarivo 250 nnddo ddaalamulella athu.

¹¹ Solomoni aamukusa mwaana aamutthiyana a Farao ovenyera o muzinda wa Davide awaana onyumbani eyo ammakelleeye mutthiyanooyo vawi aallota wi, “Mwaaraka ahikhalleke mu enyumba ya Davide, mwene a Israele ekaamba yawi nipuro nno naatamenlle nibokosi na echipangano na Apwiya tti naweella.”

¹² Vano Solomoni aavelleella mikutho ddooshellelliha wa Apwiya vanikuwani nno amakilleeye vahoollo va enyumba

¹³ monga mikutho dda nllapo ni nllapo navettho mikutho ddimodda moollikana ni malamulo a Mose monga dda masabata, dda Ehakallallo ya Wooneya wa Mweeri, dda mallapo mararu a ehakallallo a muyakha ni muyakha, dda Ehakallallo ya Buledi Oohikhalla ni Yisiti, dda Ehakallallo ya Milungu ni dda Ehakallallo ya Misasa.

¹⁴ Moollikana ni malangizo a Davide attiitthinnya, ahaakawa allupa mukutho mu milloko milloko aavaha mitteko ddiwa. Nave aakeraatthihattho milloko dda Alevi ni mitteko ddiwa dda nllapo ni nllapo ddookavihera allupa mukutho ollapella. Aatthoollattho milloko dda oowehera vamillakoni ddoohiyanahiyana vawi Davide muthu a Mulluku aalamulalle mwawi ddiiddo.

¹⁵ Nave athwaayo yahiiwellella malangizo ayo mwene alamulalleeye ootthopoolla dda erive ello ya allupa mukutho, Alevi ni moosungellamo eyuuma.

¹⁶ Va enthawi yeella mutteko muttheene wa Solomoni waari omallihiwe waambeella matthipello a musasa wa Apwiya ophiyera mamallihellwiiwa. Sika enyumba ya Apwiya yaamallihiwa.

¹⁷ Vano Solomoni aaya o Eziyoni Gebere o Elati mukhwipi mwa enyanja, mu ellapo ya Edomu.

¹⁸ Mwene Huramu aarumiha esitima ddaye ni allupa muttekwaaye oodduwella dda mu enyanja wi yaphare mutteko nimodda ni oorumeyella a Solomoni. Vano yaaya o Ofiri nave yaamukusella Solomoni golide makilogaramu 18,000.