2 Epilli 7 - Mawu a Mulluku

Ovelleelliwa wa enyumba ya Apwiya

¹ Solomoni amallihalle ovekella, munllo waakittha ovenyera oddullu woosa mukutho wooshellelliha ni mikutho ddimodda. Nave ntitimiho na Apwiya naaddalla mu enyumba Ya Apwiya.

² Nave allupa mukutho kheyaawonre ovollowa mu enyumba ya Apwiya ekaamba yawi ntitimiho na Apwiya naaddallamo.

³ Nave Aisraele attheene yoonille munllooyo okitthaka ni ntitimiho na Apwiya va enyumbeeyo yaawarama epopheya ekhove ddiwa waallapella Apwiya ellota wi, “Ddawoona, Apwiya tti aphaama, echikondiiwa yoohisintheya tti yoohimalla.”

⁴ Vano mwene ni athu attheene yaavelleella mikutho vamiitthoni va Apwiya.

⁵ Mwene Solomoni avelleella mikutho dda eng'ombe 22,000 ni enkhosa 120,000. Mwawi ddiidda mwene ni athu attheene yaayivelleella enyumba ya Mulluku.

⁶ Allupa mukutho yahiimella m'mapuroni mwiwa mvo Alevi yiipiiwa machipo waatitimiha Apwiya voopharihani mutteko ezida ddiwa. Ezidanndda ddapangiwe ni Davide nave ddapharihiwa mutteko vawiipani nchipo na echikondi yoohisintheya ni yoohimalla ya Apwiya. Moowehana ni alliwaayo allupa mukutho yaaniipa mapallapata nave Aisraele attheene yaaniimella.

⁷ Nllapo nenno mwene aapatulattho nipuro na variyari va nthato namillatu nno naari vahoollo va enyumba ya Apwiya. Vawi tti wenko avelleelleeyewo mukutho wooshellelliha ni mukutho wa othu navettho makhura a mikutho ddeeyaattano. Aheera ddiidda kaambiiwa nikuwa na mukutho namukuwa nno naari va nipuro noopatuleya na Apwiya naayeva sika mikutho dda ddeko ddittheddenenndda kheddaakwakhwanella ovelleellavo.

⁸ Sika enthawi yeeyo Solomoni aakeraatthiha ehakallallo vamodda ni Aisraele attheene. Waari mutthukumano muullupalli ovenyera woovollowella wa Hamati ophiya o ntapo na Iguputo.

⁹ Nave va nllapo na neetthanu ni raru yaakhalla ni mutthukumano vawi yaheera ehakallallo ya opatuliwa wa nikuwa wa mallapo matthanu ni piilli navettho machellello wa mallapo matthanu ni piilli.

¹⁰ Va nllapo na 23 na mweeri waneetthanu ni piilli Solomoni ahaarumiha athwaayo owaniwa eri oohakallalla m'murimani mwiwa ekaamba ya ddaphaama ddittheddene nnddo Apwiya yamweerelliiwa Davide oorumeyelliiwa ni athwiiwa Aisraele.

Mulluku anamooneyellattho Solomoni

¹¹ Vano Solomoni aamalliha omaka enyumba ya Apwiya ni enyumba yoomwene. Nave ddittheddene nnddo aganizalleeye wi eere mu enyumba ya Apwiya ni mu enyumbaaye aakwakhwanihella phaama.

¹² Vano Apwiya yaamooneyellattho Solomoni mahiiyu nave ellota wi, “Kohiiwa nivekello nawo nave kootthoolla nipuronna okhalla enyumbaaka ya mukutho.

¹³ Katiyella oddullu ni ommaka murimu wi ahirupe apaalle karumiha nazombe wi oononge mmiddo wa va ellapo yavatthi apaallettho karumiha mullilli variyari va athwaaka

¹⁴ ayo enaromolliwa mu nnddina naka yiiyeviha evekella waasha ekhovaaka, ni ohiya machimwiiwa kineerowiiwa oddullu nave kineerewaakhululukella machimwiiwa ni ovullusa ellapwiiwa.

¹⁵ Vano miitthwaaka eneerewoona nave kineerewaapella maaru o mavekellwiiwa vanipuronimva.

¹⁶ Vawi vano kootthoolla ni opatula enyumbeella wi nnddina naka nititimihiwekemo wa enthawi yoohimalla. Miitthwaaka ni murimaaka ddinaakhalleke mwemmo enthawi ddittheddene.

¹⁷ Nave we, waaweetaka vamiitthoni vaka wonanko mmo attiittho Davide yeetelliiwa nave waaweeraka ddittheddene kuulamulalleemi ni osunga mawaaka ni malangizwaaka,

¹⁸ vaavo kineerokeraatthiha mpandwaawo woomwene wa enthawi yoohimalla monga kalonjezilleemi wa Davide attiittho wi, ‘Khaviwa virama muthu a mu nibanja nawo oyo anaalamulelleke Israele.’

¹⁹ “Koma we apaalle anaawo, mwahokollweella mutulli ohiya okithwara, ohisunga malamulwaaka ni malangizwaaka ayo kuuvahilleemini nave mwaamba orumeyella ni oddillapella milluku ddimodda,

²⁰ sika kineerewaavenyihamo Aisraelaayo mu ellapo kaavahilleemi. Nave enyumba eyo kayipatulalleemi wi nnddina naka nillapellelliwekemo kineeroyikhoota nave kineeroyitthattusa yoottheyiha ni yoonyemulliwa variyari va athu attheene.

²¹ Nave va enyumbeella eyo enavahiwa olemu, vano arive muthu oovira vaavo aneerekottikhina ni woopa musoonyo vookohani wi, ‘Kaambiiwa tini Apwiya yenriiwa ddenndda va enyumbeella?’

²² Vano athu eneerekowaakhulla wi, ‘Ekaambiiwa tti yawi athwaayo yahaahiya Apwiya Mullukwiiwa ayo yaakhumihalle makhollwiiwa mu Iguputo nave yaallapella ni orumeyella milluku ddimodda. Elle sika ekaambiiwa Apwiya eweerelliiwa yoonanareella.’ ”