2 Epilli 6 - Mawu a Mulluku

Solomoni anaadalisa athu

¹ Vano Solomoni aavekella wi, “Nyu Apwiya munakhalla mu epiphi yoottikana.

² Koma kohuumakellani enyumba yooriiheya, nipuro nno munaakhallekeenyumo enthawi yoohimalla.”

³ Vano mwene aarukunuwa adalisa mutthukumano muttheene wa Aisraele, attheenaayo yiimenlle.

⁴ Nave aallota wi, “Etitimihiwe Apwiya Mulluku a Aisraele, ayo ekwakhwanihalle ni masiviiwa nnddo yalonjezilliiwa wa Davide attiitthaaka yaallota wi,

⁵ ‘Ovenyera nllapo nno kaakhumihalleemi Aisraele, athwaaka mu Iguputo, nguutthoonlle orive muzinda variyari va malloko mattheene a Aisraele wi mumakiwe enyumba yoollapellamo nnddina naka. Nave ngaamutthoollille muthu okhalla mwene owaalamulella Aisraele athwaaka.

⁶ Koma vano kimutthoollille Yerusalemu okhalla nipuro nawi ekillapellekemo nave kimutthoollille Davide wi aalamulelle Aisraele athwaaka.’ ”

⁷ Nave Solomoni aavirellella wi, “Attiitthaaka Davide yaaganiza ddoomaka enyumba ya Apwiya mowaallapellellamo Apwiya Mulluku a Aisraele.

⁸ Koma Apwiya yahaalleella attiitthaaka Davide wi, ‘Waaganiza phaama voomakellani enyumba nnddina naka.

⁹ Vano weyaano khomaka enyumbeeyo koma mwanawo sika anaamake enyumbaakeeyo.’ ”

¹⁰ Solomoni aallota wi, “Vano Apwiya aakwakhwaniha nnddo yalonjezilliiwa vawi koovollowa omwene wa attiitthaaka Davide nave kiri mwene a Aisraele. Nave koomaka enyumba yoollapellellamo nnddina na Apwiya Mulluku a Aisraele.

¹¹ Nave kookhoza nipuro noohiyavo nibokosi na echipangano mmo muri mabukhu a mawu a echipangano eyo Apwiya yakeraatthihalliiwa ni Aisraele.”

Nivekello na Solomoni

¹² Vano Solomoni ahiimella vahoollo va nikuwa na Apwiya, mutthukumano wa Aisraele attheene woonaka nave aatukhullella mattaaye muddullu.

¹³ Solomoni aamaka nttattha namukuwa, mamita meelli orekama ni okhuveya wiwa ni mita emodda ni hafu oya muddullu nave aanihiya variyaririyari va nthatonno nave aawellavo, akokhora mutthukumano muttheene wa Aisraele woonaka nave aatukhullella mattaaye muddullu.

¹⁴ Aavekella wi, “Nyu Apwiya Mulluku a Israele, khaavo Mulluku oophwanaphwana ni nyuwaano, oddullu apaalle va ellapo yavatthi. Munnasunga echipangano ni wooniha echikondi yoohisintheya wa oorumeyellaanyu ayo eneeta vamiitthoni vanyu ni murimiiwa muttheene

¹⁵ Moosunga lonjezo mweerilleenyu ni attiitthaaka Davide. Ollello mookwakhwaniha echipangano mweerilleenyu ni alliwa.

¹⁶ Sika vano nyu Apwiya Mulluku a Aisraele, upuwellani nndde mwalonjezilleenyu wa Davide oorumeyellaanyu voollotani wi, ‘Khaviwa virama edduullu va nibanja nawo ookhalla vamiitthoni vaka va mpando woomwene wa Israele, vaavove anaawo yaapwathaka makhallellwiiwa ni weeta vamiitthoni vaka monga weyaano weetelleewe.’

¹⁷ Sika vano, nyu Apwiya Mulluku a Israele, akhullellani wi nnddo mwaalonjezilleenyu attiitthaaka Davide oorumeyellaayu, ddikwakhwanihelliwe.

¹⁸ “Koma nyu Apwiya, ttuukhalla ni athu veellaponi yavatthimva? Vawi oddullu khonuukwanellani, ddinaaworeye mwawiidde wi mukhalle mu enyumba kimakilleemeella?

¹⁹ Nyu Apwiya Mullukwaaka, mi tti oorumeyellaanyu, iwani nivekello naka ni okhuwa waka vamiitthoni vanyu ollello.

²⁰ Weherakani enyumbeella otthaana ni mahiiyu, nipuro nno mwaanithoollilleenyu wi nnddina nanyu nikhalleke mwemmo wi mwiiwe nivekello nno anaavekelle oorumeyellaanyu onipuroni wuno.

²¹ Iwani nivekello na oorumeyellaanyu ni na athwaanyu Aisraele yaavekellaka va nipuro nenna. Ddawoona, mwiiwe oddullunko munakhalleenyu nave mwiiwa mukhululuke.

²² “Vano muthu amuchimwella mukhwaaye, yamullupelliha, allupelle vahoollo va nikuwani nanyu mu enyumbeella,

²³ vaavo nyu mwiiwe oddullunko nave mweerevo ello ni oweeruza oorumeyellaanywaayo. Oochimwa mukamulle wi tti oolakwa nave mumullake moollikana ni ddoolakwa ddaye. Koma oohichimooyo mukamulle wi khanna mullatu nave mumuvahe oolungama moollikana ni echilungamwaaye.

²⁴ “Athwaanyu Aisraele yagonjihiwa ni adaniiwa ekaamba yawi ahuuchimwellani nave yarukunuwa murima, yalapa mu nnddina nanyu, yavekella ni wuullapellani nyuwaano mu enyumbeella,

²⁵ mwiiwe oddullunko ni waakhululukella machimo athwaanyu Aisraele. Vatulli viwa, mwaahokolloselle o ellapo eyo mwaavahilleenyu makhollwiiwa.

²⁶ “Oddullu wawalleya, murimu ahirupa kaambiiwa athwaanyu ahuuchimwellani nave yavekella va enyumbaanyu, elapa mu nnddina nanyu ni orukunuwa murima vawaallakani nyuwaano,

²⁷ vano mwiiweke oddullunko ni okhululukella machimo a oorumeyellaanyu, Aisraele attheene. Nyuwaano mwaahuddiheke makhallello aphaama awi yeereke nave mumurupihe murimu mu ellapo eyo mwaavahilleenyu wi ekhalle yoohallaniiwa.

²⁸ “Mu ellapweeyo mwakhalla ettalla, mullilli, enkhuwawe, nazombe, miingu, athwaanyu yaapheelliiwa ni adaniiwa apaalle vakhalla ereta ni orive ovoriiwa,

²⁹ mwiiwe mavekellwiiwa. Arive muthu apaalle athwaanyu a Israele yadduwella ddookatamiha m'murimani mwiwa nave yavekella wa nyuwaano mootukhullella mattiiwa muddullu o enyumbeella,

³⁰ mwiiwe mavekellwiiwa oddullu munakhalleenyuwo, mwaakhululukelle. Mumweerelleke arive muthu moollikana ni makhallellwaaye vawi nyuwaano munnadduwella murima wa arive muthu.

³¹ Mwawi ddiidda athwaanyu eneerekowoovani, eneerekowiiwellellani mallapo mattheene enaakhalliiwa mu ellapo eyo mwaavahilleenyu makhollwaahu.

³² “Emoddamoddave yeeyo alleto ayo ehiri a athwaanyu o Israele ttuuwa ovenyera o ellapo ddimodda ddawuuteete ekaamba ya nnddina nanyu ni nnatta nanyu namasiva ni naweera dduullupalli yawa ovekella mu enyumbeella,

³³ nyu mwiiwe oddullu munakhalleenyuwo nave mweere nnddo mulletooyo uuvekilleeyeni. Mweere ddenndda wi athu attheene a va ellapo yavatthi edduwelle nnddina nanyu nave ewoovekeni monga eneerella Aisraele athwaanyu nave edduwelle wi enyumba ella kiyimankeemi enadduwanyeya ni nnddina nanyu.

³⁴ “Athwaanyu yaayaaka okhotoni woowana ni adaniiwa orive weko munaarumiheenyuwo nave yavekella wa nyu, Apwiya, ewehaka o muzinda oyo muwutthoonlleenyu navettho onyumbani eyo kimakenlleemi nnddina nanyu.

³⁵ Mwiiwe oddullunko nivekello niwa ni okhuwa wiwa nave mwaapambanihe.

³⁶ “Athwaanyu ttuuwuuchimwellani vawi khaavo muthu oohichimwa, sika ttuuwaashella murima ni waavelleella wa adaniiwa wi yaaphare okaporo waayaana o ellapo yawoorekama apaalle yavakhuviru.

³⁷ Vano eri wuukaporoninko yaadduwella ochimwa wiwa erukunuwa murima ni oveka wa nyuwaano mwawiiyeviha mu ellapo ya athu ayo yaaphanre okaporo, voollotani wi, ‘Noochimwa, noohollowa, noheera ddoonanara.’

³⁸ Athwaayo yaahokollweella wa nyuwaano ni murimiiwa muttheene ni okumiiwa muttheene mu ellapo nko yapharelliwiiwawo okaporo, yavekella wa nyuwaano moowehani o ellapwiiwa eyo mwaavahilleenyu makhollwiiwa, o muzinda oyo mwawutthoollilleenyu navettho onyumbani eyo kimakenlleemi nnddina nanyu

³⁹ mwiiwe oddullunko munakhalleenyu nivekello niwa ni okhuwa wiwa nave muweerelle ddoolungama nave mwaakhululukelle machimwiiwa mattheene.

⁴⁰ Vano nyu Mullukwaaka, khunuullani miitthwaanyu nave apellani maaru o mavekello eneeriiwa vanipuronimva.

⁴¹ Vano nyu Apwiya Mulluku, venyani, muwe onipuroni nanyu nawiithuuwellawo, nyuwaano ni nibokosi na masivaanyu. Nyu Apwiya, allupa mukuthwaanyu eware echilungamo athu oororomelleyaanyu ehakallallena ddaphaama ddanyu.

⁴² Nyu Apwiya Mulluku, muhimureye etulli oozoziwaanyu!* Upuwellani echikondaanyu yoohisintheya wa Davide oorumeyellaanyu.”