2 Epilli 5 - Mawu a Mulluku

¹ Vano Solomoni amallihalleeye mutteko muttheene va enyumba ya Apwiya, aahiyamo ddeko nnddo attiitthinnya Davide yaddipatulelliiwa wa Apwiya monga siliva, golide ni eziwiya. Yaaddihiya mu ddoosungellamo eyuuma mu enyumba ya Mulluku.

Nibokosi na echipangano ninakuselliwa mu enyumba ya Apwiya

² Vano mwene Solomoni aawiithana attekweene a o Israele, oohoollella attheene a malloko ni attekweene a mabanja Aisraele wi ewe wa olliye o Yerusalemu wi yakuse nibokosi na echipangano na Apwiya mu Ziyoni, muzinda wa Davide.

³ Nave attheene yaatthukumana vamiitthoni va Solomoni vamachellelloni mu mweeri wa Etaimu, mweeri waneetthanu ni piilli.

⁴ Vano attekweene attheene a o Israele yaawa nave Alevi yaatukhulla nibokosi na echipangano.

⁵ Allupa mukutho ni Alevi sika yawiillena nibokosi na echipangano na Apwiya vamodda ni musasa wamutthukumano ni eziwiya ddittheddene ddoopatuleya nnddo ddaari m'musasanimmo.

⁶ Nave mwene Solomoni ni Aisraele attheene ayo yatthukumanne vamiitthoni vaye, yiimenlle vahoollo va nibokosi na echipanganonno yaanavelleella mikutho dda enkhosa ni dda eng'ombe ddooheerengeya.

⁷ Vano allupa mukutho yaatukhulla nibokosi na echipanganonno eyaana mu enyumba ya Apwiya enihiya mu echipinda yoopatuleyesesa, vatthi va muuphello a akerubi.*

⁸ Sika akerubaayo yaanattaphurusa muuphellwiiwa vaddullu va nibokosi na echipanganonno mwawi yaanakhuneella ni ekopo ddiwa ddootukhullella.

⁹ Ekoponnddo ddaari ddoorekama wawi etthoka ddiwa ddaanooneya muthu akhalla mu echipinda yoopatuleya, vahoollo va echipinda ya muwari yoopatuleyesesa. Koma wakhalla otte khaddooneyella nave ddookhallawo ophiyera ollello.

¹⁰ Mu nibokosimmo khamwaari ello koma mallukuve meelli ayo Mose aahiyalleeyemo o Horebu nko Apwiya yakeraatthihalliiwa ni Aisraele attheene yakhumiiwa o Iguputo.

Ntitimiho na Apwiya

¹¹ Vano allupa mukutho yaakhuma mu echipinda yoopatuleya vawi attheene ayo yaarivo yaari eddeellihalle vooheerengella milloko ddiwa.

¹² Nave Alevi attheene awiipa machipo monga Asafu, Hemani ni Yedutuni, aniiwa ni abaliiwa oowara ekuwo ddabafuta aphaama eri ni misangwa, azeze ni magitala, yahiimella o embali ya wookhuma nndduwa wa nikuwa ni allupa mukutho 120 ayo yiipa mapallapata.

¹³ Nave yaaniipa ni mawu oophwanaphwana voollapellani ni voowaatitimihani Apwiya. Ni misangwa, azeze ni magitala, yaaniipa wi, “Ddawoona, Apwiya tti aphaama, echikondiiwa yoohisintheya tti yoohimalla.” Vaavo enyumba ya Apwiya yaaddalliwa ni murapo.

¹⁴ Nave allupa mukutho kheyaawora orumeyella ekaamba ya murapooyo vawi ntitimiho na Apwiya naaddalla mu enyumba Ya Mulluku.