2 Epilli 4 - Mawu a Mulluku

Ezipangizo dda o enyumba ya Apwiya

¹ Mwene Solomoni aapanga nikuwa namukuwa noorekama mamita matthanu ni masese, nooramballalla mamita matthanu ni masese ni oya muddullu vakhuviru mamita masese ni hafu.

² Vatulli viwa aapanga ethanki yamukuwa yanamurukunuwa nave aayiromolla wi enyanja. Owanoni wiwa waari wooramballalla mamita masese ni hafu. Owallamella wiwa waari wookhwaranya mamita meelli nave waapheella wa owanoninko waari wa mamita khumi ni mararu ni hafu.

³ Vatthi va eyano dda ethankeeyo vaari makapu amukuwa waapheella ethanki ettheeneeyo ya mamita khumi ni mararu ni hafu m'mizereni miilli. Makapu yaalla yaapangelliwe nimodda ni ethankeeyo.

⁴ Ethankeeyo yiimesiwe vaddullu va eng'ombe ddamukuwa khumi ni piilli. Ddiraru ddaweha ompoto, ddiraru wookhuma nndduwa, ddiraru omwera ni ddiraru woovollowa nndduwa. Nave meto ddiwa ddamutulli ddaanyinganlle muwari.

⁵ Wiitivalla wa ethankeeyo waari woophwanaphwana ni nnatta nave eyanwiiwa yoopiwe wonanko ya kapu, yookhoromanella otte wonanko malluwa. Ethankeella yaddalla ni malita 60,000 amaaddi.

⁶ Aapangattho mabeseni khumi, matthanu aahiyalle omwera nave matthanu mamodda oompoto. Mwemmottho yaanahuwellamo ezipangizo nnddo yapharihiiwa mutteko voovelleellani mukutho wooshellelliha nave ethankeeyo yaari moonawellamo allupa mukutho.

⁷ Nave aapanga ddoohiyavo enyali khumi ddagolide moollikana ni mmo ddalembelliwiiwa nave yaaddihiya mu enyumba ya Apwiya, dditthanu omwera dditthanu ddimodda ompoto.

⁸ Aapangattho matebulo khumi aahiya mu enyumbeeyo, matthanu omwera matthanu ompoto. Nave aapanga asimabeseni agolide 100.

⁹ Aamaka nthato na allupa mukutho, nthato nuullupalli nootte ni machiwiiwa oohuruwella ni mukuwa.

¹⁰ Aahiya ethankeelle va ekona embali ya omwera wa wookhuma nndduwa wa enyumbeeyo.

¹¹ Huramu aapangattho epalli, mafosholo ni mabeseni manchichi. Sika aamalliha muttekwaaye muttheene woomumakella Solomoni enyumba ya Mulluku.

¹² Ahaamaka apoto eelli, ahoopa migomba ddoohuruwellana miru dda apoto

¹³ nave aamallihattho opanga makangaza 400 va mathavi meelli, mizere miilli ddamakangaza va nirive nthavi ohuruwella miru dda apoto.

¹⁴ Aamallihattho meto khumi ni epalli khumi ddookhalla va metonnddo,

¹⁵ ahoopa ethanki ni eng'ombe khumi ni piilli valle vakeraatthihiwe ethankeeyo.

¹⁶ Epalli, mafosholo ni mabeseni nnddo Huramuabi amoopelleeye Solomoni wi ddikhalle ddoopharihella mutteko mu enyumba ya Apwiya ddaari ddamukuwa woonyezimella.

¹⁷ Mwene aapangiha ddeko ddenndda o nipuro na olloko nno niri variyari va Sukoti ni Zereda mu ntapo na Yordani.

¹⁸ Solomoni khaaddilingalle ddeko ddenndda kaambiiwa ddaari ddinchichi. Sika ollemella wa mukuwooyo khewaadduwanyeye.

¹⁹ Sika Solomoni aapanga ddoopharihella mutteko ddittheddene nnddo ddaari mu enyumba ya Mulluku monga nikuwa nagolide, matebulo agolide mvo vakhalla buledi oovelleelliwa wa Mulluku

²⁰ ddoohiyavo enyali ni enyali ddiwa ddagolide aphaama wi ddikhareke muwariwari mwa nipuro naweellesesa moollikana ni mmo mwalembelliwiiwa,

²¹ malluwa, enyali navettho ddoopanella, ddittheddenennddo dda golide aphaama.

²² Ddoothiimihella enyali, mabeseni, embale ddawoosellamo lubani* navettho eziwaya ddoovallella munllo ddaari ddagolide aphaama. Nave aapangiha ddoomakella machiwi a enyumba ya Apwiya, machiwi a muwari oovollowella o nipuro naweellesesa ni machiwi oovollowella o enyumba ya Apwiya, ddittheddenennddo ddaari ddoohuruwelliwa ni golide.