2 Epilli 36 - Mawu a Mulluku

Omwene wa Yehowahazi

¹ Athu a mwiillaponimmo yaamutthoolla Yehowahazi mwaana a Yosiya nave yaamuvollochiha omwene munipuroni mwa attiitthinnya mu Yerusalemu.

² Yehowahazi aari ni miyakha 23 avolloweeye omwene nave aalamulella miyeri miraru o Yerusalemu.

³ Vatulli viwa mwene a o Iguputo aamuvenyihella omwenaaye o Yerusalemunko nave yaakhomiha ellapweeyo musonkho wa siliva oollemella makilogramu 3,400 ni golide makilogramu 34.

⁴ Vano mwene a o Iguputo aamuvollochiha omwene Eliyakimu, mwanamunne a Yehowahazi, o Yuda ni o Yerusalemu nave aasintha nnddina naye akhalla Yehoyakimu. Koma Neko aamukusa Yehowahazi mwanamunne ayaana o Iguputo.

Mwene Yehoyakimu a o Yuda

⁵ Yehoyakimu aari ni miyakha 25 avolloweeye omwene nave aalamulella miyakha khumi ni mmodda o Yerusalemu. Olliye aheera ddoonanara vamiitthoni va Apwiya Mullukwaaye.

⁶ Vano Nebukadinezara mwene a o Babiloni aawa aahella ekhoto. Nave aamumaka ni onyolo amuyaana o Babiloni.

⁷ Nave Nebukadinezara aakusa eziwiya ddimodda dda mu enyumba ya Apwiya ayaana o Babiloni nave aaddihiya o enyumbaaye yoomwene o Babiloni.

⁸ Vano mitteko ddaye ddittheddene dda Yehoyakimu ni ddoonanara eerilleeye ddoolembiwa mu nibukhu na epilli ya mamwene a o Israele ni Yuda. Vano Yehoyakini mwanaye sika avollowille omwene munipuroni mwaye.

Olamulello wa Yehoyakini

⁹ Yehoyakini aari ni miyakha 18 avolloweeye omwene nave aalamulella miyeri miraru ni mallapo khumi o Yerusalemu. Olliye aheera ddoonanara vamiitthoni va Apwiya.

¹⁰ Voomallani muyakha, mwene Nebukadinezara ahaaruma athu wi yamukuse nave yaawaana o Babiloni ni eziwiya ddoowallamella mutengo dda o enyumba ya Apwiya. Vano aamuvollochiha omwene Zedekiya mwanamunne a Yehoyakini wi akhalle mwene a o Yuda ni o Yerusalemu.

Olamulello wa Zedekiya

¹¹ Zedekiya avollowille omwene ari ni miyakha 21 nave alamulelle miyakha khumi ni mmodda o Yerusalemu.

¹² Nave aheera ddoonanara vamiitthoni va Apwiya Mullukwaaye. Olliye khiiyevihalle vamiitthoni va namallotella Yeremiya oyo allota mawu oovenyera wa Apwiya.

Okumulliwa wa Yerusalemu

¹³ Zedekiya aamuwukilattho mwene Nebukadinezara oyo amullupellihalle vamiitthoni va Apwiya wi aneeromwiiwellella. Koma olliye ahummiha murimaaye ahirukunuwella wa Apwiya Mulluku a Israele.

¹⁴ Oohoollella attheene a allupa mukutho ni athu amodda yaheera ddoohiroromelleya ddinchichi voothwarani ddoonanara dda athu. Nave yaaripiha enyumba ya Apwiya ayo yiipatulelle khalle o Yerusalemu.

¹⁵ Vano Apwiya Mulluku a makhollwiiwa yaanaaruma wiilliwiilli amithenga wa alliwa waachenjeza ekaamba yawi yaanaweerella echifundo athwiiwa ni nipuro.

¹⁶ Koma athwaayo yaanaavevullave amithenga a Mulluku ni mawaaye nave yaanaattheya anamallotellaaye ophiyera Apwiya yahaashella murima nave khaarivo oowaakihera.

¹⁷ Sika ekaambiiwa Apwiya yamweerihalliiwa mwene a Ababiloni wi aahelle ekhoto ayo yawiiphalle asombwiiwa ni anamwalliiwa ni masupada naari mu enyumbiiwa. Kheyaamweerellettho echifundo arive muthu, muullupalli apaalle mung'onong'ono koma yahaavelleella attheene wa mwene a o Babiloni.

¹⁸ Nave eziwiya ddittheddene dduullupalli ni dding'onong'ono ni eyuuma ya enyumba ya Mulluku ni eyuuma ya mwene ni ya enduna ddiwa, ddittheddenenndda aawaana o Babiloni.

¹⁹ Nave yaahella munllo enyumba ya Mulluku ni yoomwene, ekumulla mpanda wa Yerusalemu nave yoononga eziwiya ddittheddene ddoowallamella mutengo.

²⁰ Nave athu attheene yavulluwalle o nsupada ahaapharella wuukaporoni o Babiloni. Wenko yaatthattuwa oorumeyellaaye ni aanaaye ophiyera omwene wa Persiya okeraatthihiwe

²¹ wi mawu a Apwiya oweella mwa Yeremiya awi, “Ellapo eneerewoonongeya wa miyakha 70 wi masabata awiithuuwa ayo yaheereyille ekwakhwanihelliwe.”

Kirusi anaalamula Ayuda wi ehokollowe

²² M'muyakha wawaamba wa olamulello wa Kirusi mwene a o Persiya, mawu a Apwiya yallotiwe oweella mwa Yeremiya wi yaakwakhwanihiwa. Vano Apwiya yaamuvaha maganizo Kirusi wi allalleye mwiillaponi mutthemwene voollotani navettho voolembani wi,

²³ “Nndda sika mwene Kirusi a o Persiya analloteeye wi, ‘Apwiya Mulluku a oddullu aakivaha moomwene mattheene a va ellapo yavatthi nave aakilamula wi kaamakellettho enyumba o Yerusalemu a o Yuda. Sika nyu attheene muri ayiwayiwa, Mullukwaanyu akhalle ni nyuwaano.’ ”