2 Epilli 35 - Mawu a Mulluku

Yosiya anahakallallella Paska

¹ Yosiya aheera Paska a Apwiya o Yerusalemu nave yaamwiipha mwaanaankhosa a Paska va nllapo na 14 na mweeri wawaamba.

² Ahaatthoolla allupa mukutho nave aanaallipiha murima wi erumeyelleke mu enyumba ya Apwiya.

³ Vatulli viwa aallota ni Alevi ayo yaahuddiha Aisraele attheene nave yaari oopatuleya wa Apwiya wi, “Muhiye nibokosi naweella mu enyumba eyo Solomoni mwaana a Davide mwene a o Israele amakilleeye. Vano khemunireyakattho va mathuri vanyu. Arumeyelleni Apwiya Mullukwaanyu ni Aisraele athwiiwa.

⁴ Mukhalle m'millokoni moollikana ni mabanjaanyu voothwarani malangizo a Davide mwene a o Israele ni a Solomoni mwanaye.

⁵ Nave mwiimelleke o nipuro naweella moollikana ni milloko dda mabanja a makhollwaanyu. Nave moonesese wi nirive nibanja na Alevi nikhalle ni embaliiwa.

⁶ Vano mumwiiphe mwaanaankhosa a Paska nave muddeellihe. Mwaakavihere abalaanyu wi ddeereye moollikana ni mawu a Apwiya oweella mwa Mose.”

⁷ Vano Yosiya aavelleella wa athu shisha attheene ayo yaphiyalle monga mikutho dda Paska, asaanaankhosa, asaanaapuri 30,000 ni anankhoro eeng'ombe 3,000. Ddenndda addikusalle ovenyera o eyuuma yoomwene.

⁸ Nave enduna ddaye ddaavelleella mwa opaalla wiwa wa athu shisha, allupa mukutho ni Alevi. Hilikiya, Zekariya ni Yehiyele oohoollella uullupalli a o enyumba ya Mulluku yaavelleella wa allupa mukutho monga mikutho dda Paska, asaanaankhosa, asaanaapuri 2,600 ni anankhoro eeng'ombe 300.

⁹ Ni olliyettho Konaniya, Shemaya ni Netanele asinne, Hashabiya, Yeiyele ni Yozabadi oohoollella a Alevi yaavelleella wa Alevi monga ddoovelleella dda Paska, asaanaankhosa, asaanaapuri 5,000 ni anankhoro eeng'ombe 500.

¹⁰ Vano ddittheddene ddikhoziwe dda Paska, allupa mukutho yahiimella va nipuro niwa nave Alevi yaakhalla m'millokoni mwiwa moollikana ni mmo mwene aalamulelleeye.

¹¹ Nave yaamwiipha mwaanaankhosa a Paska nave allupa mukutho yahiitha nikhame yaakhenlliiwa ovenyera wa Alevi, alliwa yaattaka enamannddo.

¹² Nave yaapatula mikutho ddooshellelliha wi eddikawe wa athu moollikana ni mabanja a makhollo wi eddivelleelle wa Apwiya wonanko mmo ddilembelliwiiwa mu nibukhu na Mose. Nave yaheera emoddamoddave ni anankhoro eeng'ombe.

¹³ Vano yaamoosa mwaanaankhosa moothwara mutethwiiwa nave yahaapeya ddoovelleella ddaweella mwiipallini, muminoni ni muziwayani nave yaaddikawa mwawaakuva wa athu attheene.

¹⁴ Vatulli viwa yaakhoza ddayiwa ni dda allupa mukutho ekaamba yawi allupa mukutho, edduullu dda Aroni yaari yaatelliwe ni ovelleella mikutho ddooshellelliha ni makhura ophiyera mahiiyu. Sika Alevi yakhoza ddayiwa navettho dda allupa mukutho.

¹⁵ Athu awiipa machipo, anamwani a Asafu, yaari munipuroni mwiwa moollikana ni lamulo na Davide, Asafu, Hemani ni Yedutuni, oollohella a mwene. Vano alonda a va mullako yaari va orive mullako nave kheyaavenyillevo vamuttekoni viwa vawi abaliiwa, Alevi, yahaakhozella mikutho.

¹⁶ Sika mutteko muttheene wa Apwiya waakhoziwa nllapo nenno wi athu yeere Paska ni ovelleella mikutho ddooshellelliha va nikuwa na Apwiya moollikana ni lamulo na mwene Yosiya.

¹⁷ Vano Aisraele ayo yaphiyalle yaheera Paska enthawi yeeyo nave yaakhalla ni Ehakallallo ya Buledi Oohikhalla ni Yisiti wa mallapo matthanu ni meelli.

¹⁸ Nave Paska wonanko yoolla aari ahineereyeke o Israele ovenyera mu enthawi ya namallotella Samuele. Khaarivo naari mwene mmodda o Israele amweerilleke Paska wonanko oyo eeriwe ni Yosiya, allupa mukutho ni Alevi, Ayuda ni Aisraele attheene yaphwanyeye owaakattho athu a mu Yerusalemu.

¹⁹ Yamweera Paskoolla mu muyakha wa 18 wa omwene wa Yosiya.

Yosiya anawana ekhoto ni mwene Neko a o Iguputo

²⁰ Ddimanlle ddenndda, Yosiya akhozille musasa, Neko, mwene a o Iguputo aya wi awane ekhoto o Karikemishi, o muhinje wa Yufurate nave Yosiya aayattho wi awanena.

²¹ Koma Neko ahaaruma amithenga wa olliye wi yamukohe wi, “We mwene a o Yuda, ethiyo onapaalla wi neerellane tini? Mi ngiwa wenko wi killipane ni we ollello koma kinaallipane ni nibanja nno kinaawaneemina ekhoto. Nave Mulluku ookilamula wi kaakuve. Hiya okangana ni Mulluku oyo ari ni miyaano woova wi anaawoononge.”

²² Koma Yosiya khaavenyillevo koma ahiipittha wi awanena ekhoto. Khaapwathille mawu a Neko ayo allotille Mulluku koma aaya awanana ekhoto o ntapo na Megido.

²³ Nave athu oovokha miira yaamuhoma mwene Yosiya nave amwene yahaalleella allupa muttekwiiwa wi, “Kivenyihenivoni vawi koophoreyesesa.”

²⁴ Sika allupa muttekwaaye yaamutukhulla mu nigareta naye emuhiya mu nigareta nimodda yaayaana o Yerusalemu. Nave aakhwa avitthiwa mu mahame a makhollwaaye. Vano athu attheene a o Yuda ni Yerusalemu yaamwinllella Yosiya.

²⁵ Yeremiyattho aamwinllella Yosiya nave athu awiipa machipo allopwana ni atthiyaneene yoollota dda Yosiya mu winlla wiwa ophiyera ollello. Ddenndda yaaddikeraatthiha wonanko mutetho mu Israele nave ddoolembiwa mu nibukhu na Maliro.

²⁶ Nave mitteko ddimodda Yosiya ni ddaweera ddaye ddaphaama moollikana ni nnddo ddilembiwe m'malamuloni a Apwiya,

²⁷ mitteko ddaye ddittheddene, ovenyera vawaamba ophiyera vamamallihello, ddoolembiwa mu nibukhu na epilli ya mamwene a o Israele ni Yuda.