2 Epilli 34 - Mawu a Mulluku

Yosiya mwene a o Yuda

¹ Yosiya aari ni miyakha mitthanu ni miraru avolloweeye omwene nave aalamulella miyakha 31 o Yerusalemu.

² Olliye aheera ddoolungama vamiitthoni va Apwiya, aanathwara echisanzo ya Davide nikhollo naye mu ddittheddene, oohirukunuwella onnattanatta apaalle wuunyotthoni.

Yosiya anavenyihavo ollapella wa athu oohiroromella

³ M'muyakha waneetthanu ni raru wa omwenaaye, ari musombwe ahaamba omullapella Mulluku a Davide nikhollo naye. M'muyakha waneekhumi ni piilli ahaamba ovenyihamo mapuro oollapellamo mafano ni mafano a Asherimu o Yuda ni o Yerusalemu. Aavenyihamottho mafano oosema ni amikoko.

⁴ Sika yaakumulla makuwa a Abaala olliye oonaka, yaakumullattho makuwa awoosellavo lubani* ayo yaari vaddullu viwa. Yaapwesa mafano a Asherimu ni amikoko nave yahaasilla ni waatthattusa nthupi nave yaahella nthupinno va mahame a athu yavelleella mikutho wa mafano.

⁵ Yahoosattho makhuva a allupa mukutho va makuwiiwa nave yaheelliha ellapo ya Yuda ni muzinda wa Yerusalemu.

⁶ Yaheera emoddamoddave m'mizindani dda Manase, Efuremu ni Simeoni ophiya o Nafutali owaakattho matepe owaapheella.

⁷ Nave yaakumullattho makuwa epwesa mafano a Asherimu ni mafano ophiyera odditthattusa nthupi nave yaakumulla makuwa mattheene awoosellavo lubani mu Israele mutthemwene. Sika mwene aahokollweella o Yerusalemu.

Nibukhu na malamulo

⁸ Vano m'muyakha wa 18 wa omwenaaye, eellihalle ellapweeyo ni enyumba aamuruma Shafani mwaana a Azaliya, Maaseiya enduna ya muzinda ni Yowa mwaana a Yowahazi namalembella wi apotokose enyumba ya Apwiya Mullukwaaye.

⁹ Nave yaaya wa Hilikiya mullupa mukutho muullupalli evelleella makobiri ayo athu yawiilliiwana o enyumba ya Mulluku ayo Alevi ni alonda a va mullako yatotenlliiwa ovenyera o ellapo dda Manase ni Efuremu, wa athu attheene oohalla a o Israele, Yuda ni Benjamini ni a o Yerusalemu.

¹⁰ Makobiri yaayo awinnye akapitawo oopotokosiha enyumba ya Apwiya wi yaallivelle oopotokosa enyumbeeyo.

¹¹ Nave yahaavaha eeruso ya matabwa ni yoomaka enyumba wi ekullelle malluku oosema, matabwa a migomba dda vaddullu va enyumba nnddo mamwene a o Yuda yahiddipwanthiiwa ophiyera ddahoonongeya.

¹² Vano athwaayo yaaphara mutteko moororomelleya. Akapitawiiwa yaari Alevi, Yahati ni Obadiya edduullu dda Merari, Zekariya ni Meshulamu edduullu dda Kohati. Alevi attheene eeruso yawiipa ezida ddawiipella machipo

¹³ yaawehera athu ootukhulla katundu nave enaahoollella attheene yaphara orive mutteko woorumeyella. Nave Alevi amodda yaari anamalemba ni akapitawo navettho alonda.

Hilikiya anaphwanya nibukhu na malamulo

¹⁴ Vano yakhumihiiwa makobiri ayo yawiilliiwana o enyumba ya Apwiya, Hilikiya mullupa mukutho aaniphwanya nibukhu na malamulo a Apwiya ayo yinnyiwe oweella mwa Mose.

¹⁵ Vaavo Hilikiya aamulleella Shafani namalembella wi, “Kooniphwanya nibukhu na malamulo mu enyumba ya Apwiya.” Nave Hilikiya aanivelleella nibukhunno wa Shafani.

¹⁶ Nave Shafani aawaana nibukhunno wa mwene amulleella wi, “Ddittheddene yalleelliwe allupa muttekwaanyu wi eddeere, ennaddeera.

¹⁷ Aakusamo makobiri yaari mu enyumba ya Apwiya nave aawinnya akapitawo ni athu oophara mutteko.”

¹⁸ Vano Shafani namalembella aamulleella mwene wi, “Hilikiya mullupa mukutho ookinnya nibukhu.” Nave Shafani aaneerenga vamiitthoni va mwene.

¹⁹ Vano mwene iiwalle mawu a malamulo ahaahulla ddoowara ddiwa mweethakaraka.

²⁰ Vano mwene ahaalamula Hilikiya, Ahikamu mwaana a Shafani, Abidoni mwaana a Mika, Shafani namalembella ni Asaiya oorumeyella a mwene wi,

²¹ “Khaweni mwaakohe Apwiya munipuroni mwaka ni mwa athu oohalla o Israele ni o Yuda dda mawu a mu nibukhunna. Vawi osha murima wuullupalli wa Apwiya wookharihiwa va hiyaano ekaamba yawi makhollwaahu kheyaawiiwellelle mawu a mu nibukhunna nave kheyaathwanre ddittheddene nnddo ddalembiwe mwemmo.”

²² Sika Hilikiya ni oorumeyella a mwene yaaya wa Hulida namallotella navettho mwaariye a Shalumu, mwaana a Tokati, mwaana a Hasira, oosunga ddoowara ddoomwene oyo akhalla mu Yerusalemu mu echigawo yanaanweene amutthopoollella ddeereyillennddo.

²³ Olliye ahaalleella wi, “Apwiya Mulluku a Israele enallota wi mwamulleelle mwene oyo uurumalleni wa miyaano wi,

²⁴ ‘Mi Apwiya kinallota wi kineeromoriha ddoonanara va muzindoolla ni va athu attheene a mwemmo monga mwa matembelelo mattheene a mu nibukhu nno neerengiwe vamiitthoni va mwene a o Yuda.

²⁵ Athwaayo aakihiya, enavelleella mikutho wa milluku ddimodda ni okichimwella ni mafanwiiwa, mitteko ddittheddene dda mattiiwa. Sika osha murima waka wookharella muzindoolla nave khowa othiima.’

²⁶ Koma mwene a o Yuda oyo uurumalleni wi mwaakohe Apwiya, mwamulleelle wi mi Apwiya Mulluku a Israele kinallota wi wiiwalleewe,

²⁷ vawi murimaawo woolapa nave wohiiyeviha vamiitthoni va Mulluku, wiiwalleewe mawaaye oohumullulla nipuronna ni athwiiwa enakhallamo nave wohiiyeviha, wohaahulla ddoowara ddawo, wohinlla vamiitthoni vaka, sika kohiiwa ovekella wawo. Mi Apwiya koollota.

²⁸ ‘Sika kineerowaakhullella wi okhwe mwamurendelle ni ovitthiwa vamodda ni makhollwaawo. Mwawi miitthwaawo khewa yoonaka ddoonanara nnddo kinaaweemina va muzindoolla ni athwiiwa.’ ” Sika athwaalle yaahokollowa eya yallota mawu yaayo wa mwene.

Yosiya anakeraatthiha echipangano yoowiiwellella Apwiya

²⁹ Vano mwene Yosiya ahaatthukumaniha attekweene attheene a o Yuda ni a o Yerusalemu.

³⁰ Nave mwenooyo aaya o enyumba ya Apwiya ni athu attheene a o Yuda ni a mu Yerusalemu, allupa mukutho ni alevi navettho athu attheene uullupupalli ni ang'onong'ono. Vano olliye aheerenga vamiitthoni viwa mawu mattheene a mu nibukhu na echipangano naphwanyeye mu enyumba ya Apwiya.

³¹ Vano mwenooyo ahiimella va nipuro naye noomwene nave aakeraatthiha echipangano vamiitthoni va Apwiya wi aneerothwara ettilla dda Apwiya nave wi aneerewiiwellella malamulwiiwa ni malangizwiiwa ni murimaaye muttheene navettho ni okumaaye mutthewene nave wi aneereweera mawu a mu echipangano ayo elembiwe mu nibukhunna.

³² Aaweeriha athu attheene ayo yaphiyalle o Yerusalemu ni o Benjamini wi esungeke echipanganweeyo. Nave athu a mu Yerusalemu yaheera moollikana ni echipangano ya Mulluku, Mulluku a makhollwiiwa.

³³ Yosiya aavenyiha ddeko ddoonanara ddittheddene o ellapo ddittheddene dda Israele nave aaweeriha athu attheene a o Israele wi yaarumeyelleke Apwiya Mullukwiiwa. Mwawi athwaayo kheyaahiyalle waarumeyella Apwiya Mulluku a makhollwiiwa.