2 Epilli 33 - Mawu a Mulluku

Manase mwene a o Yuda

¹ Manase aari ni miyakha khumi ni miilli avolloweeye omwene nave aalamulella miyakha 55 o Yerusalemu.

² Olliye aheera ddoonanara vamiitthoni va Apwiya voothwarani mitteko ddoonanara dda athu a mitundu ddimodda ayo Apwiya yawiikarilliiwa ehinaphiye Aisraele.

³ Manase aamakattho mapuro oollapellamo mafano, ayo attiitthinnya Hezekiya yawoonongelliiwa. Aammakella Baala makuwa, aapanga mafano a Asherimu. Nave aanallapella ni orumeyella etheneeri.

⁴ Aamaka makuwa mu enyumba ya Apwiya eyo alliwa yallotilleewe wi, “Nnddina naka nineerokhalla mu Yerusalemu wa enthawi yoohimalla.”

⁵ Nave aamaka makuwa oollapellavo ddeko ddamuddullu m'mathatoni meelli a enyumba ya Apwiya.

⁶ Nave ahaavelleella anaaye aallopwana wi ekhalle mukutho wooshellelliha va ntapo na Mwaana a Hinomu nave aaneera dda masenga ni woombesa makhanga ni wiiwanana ni athu oollota ni minepa navettho ni akhwiri. Aheera ddoonanara ddinchichi vamiitthoni va Apwiya nnddo aashihalleeyena murima.

⁷ Aahiya mu enyumba ya Mulluku nifano noosema. Enyumba eyo Apwiya yamulleelliiwa Davide ni mwanaye Solomoni wi, “Mu enyumba yeella ni mu Yerusalemu sika kitthoonlleemi variyari va malloko mattheene a Israele wi ekillapellekemo wa enthawi yoohimalla.

⁸ Sika ngaakhullellattho wi Aisraele evenyihiwemo mu ellapo eyo kaavahilleemi makhollwaanyu alliwa yaawiiwellellaka moororomelleya ddittheddene kaalamulalleemi navettho yaathwaraka malamulo ayo Mose oorumeyellaaka aalamulalleeye.”

⁹ Nave Manase ahaahollosa Ayuda ni athu a mu Yerusalemu mwawi yaheera ddoonanara ddinchichi waakhwaranya athu a mitundu ddimodda ayo Apwiya yawiikarihalliiwa Aisraele ehinaphiye.

Olapa wa Manase

¹⁰ Nave Apwiya yaallota ni Manase navettho athwiiwa koma alliwa kheyaapwathille.

¹¹ Sika ekaambiiwa Apwiya yaarumalliiwa oohoollella akhoto a mwene a o Asiriya ayo yamphanre Manase emukola mphunani, emmaka ni onyolo, emuyaana o Babiloni.

¹² Vano aariiye mu ddookatamiha, ahaaveka Apwiya Mullukwaaye wi emweerelle echifundo nave ahiiyeviha wunchichi vamiitthoni va Mulluku a makhollwaaye.

¹³ Aavekella nave Mulluku ahiiwa oveka waye amuhokollosellattho o Yerusalemu mu omwenaaye. Vano Manase aadduwella wi Apwiya tti Mulluku.

¹⁴ Vatulli viwa aamaka esiri otte wa muzinda wa Davide woovollowa nndduwa wa Gihoni ovenyera o ntapo ophiyera voovollowella o mullako wa Ehomba. Nave aamaka esireeyo waapheella Ofele ayiwelliha muddullu wunchichi. Ahaahiyamottho oohoollella a akhoto o mizinda ddamipanda ddittheddene dda o Yuda.

¹⁵ Nave aavenyihamo milluku ddeelleto, nifano mu enyumba ya Apwiya ni makuwa mattheene aamakilleeye va mwaango wa Apwiya o Yerusalemu atathillella otte wa muzindooyo.

¹⁶ Aapotokosattho nikuwa na Apwiya nave aavelleellavo mikutho ddeeyaattano ni ddoothokoza. Vano ahaalamula athu a o Yuda wi yaarumeyelleke Apwiya, Mulluku a Israele.

¹⁷ Athu yaanavelleellave mikutho o mapuro oollapellamo mafano koma wa Apwiya Mullukuve.

Omalla wa omwene wa Manase

¹⁸ Vano mitteko ddittheddene dda Manase, ovekella wa Mullukwaaye navettho mawu a anamallotella ayo allotilleeyena mu nnddina na Apwiya Mulluku a Israele, ddoolembiwa mu nibukhu na epilli ya mamwene a o Israele.

¹⁹ Nave ovekella waye ni mmottho Mulluku iiwelleeye, machimwaaye mattheene, ohiroromelleya waye ni mapuro amakilleeye oollapellamo mafano nko iimenseeye mafano a Asherimu ni mafano mamodda ahiniiyevihe, ddittheddenenndda ddoolembiwa mu nibukhu na epilli ya anamallotella.

²⁰ Vano Manase aakhwa nave yaamuvittha mu enyumbaaye. Vano Amoni mwanaye sika avollowille munipuroni mwaye.

Amoni mwene a o Yuda

²¹ Amoni aari ni miyakha 22 mvo avolloweeye omwene nave aalamulella miyakha miilli o Yerusalemu.

²² Olliye aheera ddoonanara vamiitthoni va Apwiya wonanko mmo Manase ttiitthinnya eerelleeye. Amoni aanavelleella mikutho wa mafano mattheene ayo Manase attiitthinnya yapangilliiwa nave aanaarumeyella.

²³ Vano olliye khiiyevihalle vamiitthoni va Apwiya wonanko Manase ttiitthinnya iiyevihelleeye nave aari oochimwa wunchichi waakhwaranya attiitthinnya.

²⁴ Sika allupa muttekwaaye yaamweerella echiwembu, emwiipha mu enyumbaaye.

²⁵ Koma athu amwiillaponimmo yaawiipha attheene yamweerelle echiwembu mwene Amoni nave yaamuvollochiha mwanaye Yosiya omwene munipuroni mwaye.