2 Epilli 31 - Mawu a Mulluku

Hezekiya anahokollosella mallapello

¹ Ddittheddene ddimanlle, Aisraele attheene yaphwanyeyevo yaaya o mizinda dda Yuda yaakumulla apoto oopatuleya, yinttaka mafano a Asherimu ni woononga mapuro oollapellamo mafano ni makuwa o ellapo ddittheddene dda Yuda, Benjamini, Efuremu ni Manase ophiyera yaadditthollosa ddittheddene. Vatulli viwa Aisraele attheene yaahokollweella o mizinda ddiwa, arive muthu owaniwa.

² Hezekiya aakeraatthihattho milloko dda allupa mukutho ni Alevi wi ephareke mitteko dda mikutho ddooshellelliha, mikutho ddeeyaattano, ollalleya m'millako dda enyumba ya Apwiya ni waathokoza ni waatitimiha Apwiya.

³ Nave ddoovelleella dda mwene ovenyera o eyuumaaye ddaari mikutho ddooshellelliha dda ohinase dda misikuwa, dda masabata ni dda Ehakallallo ya Wooneya wa Mweeri ni dda ehakallallo ddimodda moollikana ni mmo ddalembelliwiiwa m'malamuloni a Apwiya.

⁴ Mwene ahaalamula athu a o Yerusalemu wi evelleelleke ddeko ddawaaphwanella allupa mukutho ni Alevi wi vaweerani ddiiddo alliwattho yiivelleelleke o lamulo na Apwiya.

⁵ Othenga wa mwene ollalleyiwe virive veko, Aisraele yaavelleella ddeko ddinchichi ddawaamba ohatiwa dda tirigu, vinyo, makhura enwi ni ddittheddene dda m'matani. Nave yaawaanattho ddaneekhumi ddawaata dda erive ello.

⁶ Sika Aisraele ni Ayuda ayo yakhalla m'mizindani dda Yuda yaawaanattho ddaneekhumi dda eng'ombe ni enkhosa navettho dda ddeko ddoopatuleya ddaavelleelliwa wa Apwiya Mullukwiiwa nave yaadduukella m'mapwiddini.

⁷ Vano mu mweeri waneeraru yahaamba odduukella nave yaamallihalle mu mweeri waneetthanu ni piilli.

⁸ Vano mwene Hezekiya ni enduna ddaye yoonilliiwa mapwiddaalle, yahaatitimiha Apwiya nave yahaathokoza Aisraele athwiiwa.

⁹ Vano Hezekiya ahaakoha allupa mukutho ni Alevi dda mapwiddaayo.

¹⁰ Azariya, muullupalli a allupa mukutho oyo aari a nibanja na Zadoki, aamwaakhulla wi, “Ovenyera mvo yaambilliiwa owaana ddoovelleella ddiwa o enyumba ya Apwiya nookhalla ni ddoocha ddinchichi nave ddoohallattho ddinchichi. Vawi Apwiya yohaadalisa athwaayo sika ekaambiiwa nihanlleehu ni ddinchichi ddiidda.”

¹¹ Vano Hezekiya ahaalamula wi ekhoze ezipinda dda mu enyumba ya Apwiya nave yaaddikhoza.

¹² Vatulli viwa yaawaana moororomelleya ddoovelleellannddo, ddaneekhumi ni ddeko ddoopatuleya. Nave oohoollelliiwa muullupalli aari Konaniya Mulevi ni Shimei mwanamunne, oomuthwarellella.

¹³ Vano Yehiyele, Azaziya, Nahati, Asahele, Yerimoti, Yozabadi, Eliyele, Isimakiya, Mahati ni Benaya sika yaari akapitawo owaakavihera Konaniya ni Shimei mwanamunne. Mwene Hezekiya ni Azariya oohoollella muullupalli a o enyumba ya Mulluku sika yaatthoonlle.

¹⁴ Kore mwaana a Imina Mulevi, mulonda a va mullako wa wookhuma nndduwa sika awehera ddoovelleella ddoohiwatiheriwa wi addikaweke ddawaaphwanella Apwiya ni mikutho ddaweellesesa.

¹⁵ Nave Edeni, Miniyamini, Yeshuwa, Shemaya, Amariya ni Shekaniya sika yamukavihera moororomelleya m'mizindani dda allupa mukutho. Yaanakawa ddeko ddoovelleelliwa wa abaliiwa, attekweene ni ang'onong'ono moollikana ni milloko ddiwa,

¹⁶ ayo yalembiwe moollikana ni mabanja sika wi allopwana waambeella a miyakha 30 oya muhoollo ayo yavollowa mu enyumba ya Apwiya wi ephareke mutteko wa va nirive nllapo moollikana ni enthawiiwa ni milloko ddiwa.

¹⁷ Allupa mukutho yaalembiwa moollikana ni mabanja a makhollwiiwa. Alevi yalembiwa waambeella a miyakha 20 oya muhoollo moollikana ni muttekwiiwa ni milloko ddiwa.

¹⁸ Allupa mukutho yaalembiwa ni aniiwa ang'onong'ono, awariwa, aniiwa aallopwana ni aatthiyana sika wi athu attheene a mu nibanja mwiwa vawi yaari oororomelleya vooddeellihani.

¹⁹ Ollota dda edduullu dda Aaroni, allupa mukutho ayo yakhalla m'mizindani ni mizi ddiwa vaakhalla yatthoolliwe wi ekaweke ddoocha wa arive mullopwana variyari va allupa mukuthwaayo navettho wa arive muthu variyari va Alevi ayo yalembiwe.

²⁰ Hezekiya aheera ddenndda mu ellapo ettheene ya Yuda, aheera ddaphaama ni murimaaye muttheene, moororomelleya vamiitthoni va Apwiya Mullukwaaye.

²¹ Nave mitteko ddittheddene voorumeyellani o enyumba ya Mulluku moollikana ni malangizo ni malamulo omullapella Mullukwaaye, aaddeera ni murimaaye muttheene nave ddaamweetella phaama.