2 Epilli 30 - Mawu a Mulluku

Omukhozekella Paska

¹ Hezekiya aarumiha othenga o Israele otthewene ni o Yuda nave aalembattho makalata wa Efuremu ni o Manase wi ewe o enyumba ya Apwiya o Yerusalemu wi yeere mutetho wa Paska wa Apwiya Mulluku a Israele.

² Mwene, enduna ddaye ni athu attheene a va mutthukumano o Yerusalemu yahiiwanana wi eneereweera Paska mweeri waneepiilli.

³ Alliwa kheyaakhanlle ni ehakallallo ya Paska mu enthawi yakeraatthihiwe, mweeri wawaamba, ekaamba yawi allupa mukutho aweellihiwa yaarivo ooyeva navettho athu yaari ehinatthukumane o Yerusalemu.

⁴ Nave ddenndda ddaamuddivella mwene ni mutthukumano muttheene.

⁵ Vano athu yaasimikiza wi ellalleye mu Israele mutthemwene waambeella o Beeresheba omwera ophiya o Dani ompoto wi athu ewe yeere Paska a Apwiya Mulluku a Israele o Yerusalemu vawi khe athu anchichi yeera moollikana ni mmo ddalembelliwiiwa.

⁶ Vano amithenga yaaya o Israele otthewene ni o Yuda ni makalata oovenyera wa mwene ni enduna ddaye. Mwene aalamula wi, “Nyu athu a mu Israele, hokollweellani wa Apwiya Mulluku a Abrahamu, Isaki ni Yakobo wi alliwa ehokollweelle wa athu muhanlle, nyu mwavulluwalle m'mattani mwa mamwene a o Asiriya.

⁷ Muhikhalle wonanko makhollwaanyu ni abalaanyu ayo yaari oohiroromelleya wa Apwiya Mulluku a makhollwiiwa ayo yaatthattusalle ello yawoopiha monga munoonellaanyummu.

⁸ Vano muhummihe makohaanyu wonanko makhollwaanyu koma mwiivelleelle wa Apwiya nave muweeke o enyumbiiwa eyo eyeellihalliiwa wa enthawi yoohimalla. Nave mwaarumeyelle Apwiya Mullukwaanyu wi osha murima waye wawoopiha ovenyihiwe va nyu.

⁹ Mwaahokollweella wa Apwiya, abalaanyu ni aniinyu eneereweerelliwa echifundo ni ayo yaaphanre okaporo wawi eneerohokollweella o ellapwiiwa. Valle Apwiya Mullukwaanyu tti ooreera murima ni eechifundo nave kheyuureyani etulli mwaahokollweella wa alliwa.”

¹⁰ Vano amithenga yaheeta muzinda ni muzinda mu ellapo ya Efuremu ni Manase ophiyera yaaphiya o Zebuloni koma athu yahaattheya mowaanyemulla ni mooruwana.

¹¹ Athu vang'ono a o Ashere, Manase ni a o Zebuloni yahiiyeviha eya o Yerusalemu.

¹² Nnatta na Mulluku naari va athu a o Yuda wi aavahe murima mmodda wi yeere nnddo mwene ni enduna ddaye alamulelleeye moollikana ni mawu a Apwiya.

Weereya wa Paska

¹³ Vano athu anchichi yaaphiya o Yerusalemu wi yeerena Ehakallallo ya Buledi Oohikhalla ni Yisiti va mweeri waneepiilli, waari mutthukumano muullupalli wunchichi.

¹⁴ Yahaamba ophara mutteko nave yaavenyihavo makuwa a mafano ayo yaari mu Yerusalemu ni makuwa mattheene awoosellavo lubani* yaatathillella mu ntapo na Kidroni.

¹⁵ Nave yaamwiipha mwaanaankhosa a Paska va nllapo na 14 na mweeri waneepiilli. Vano allupa mukutho ni Alevi yaawulliwa muru mwawi yaaddeelliha nave yaawaana mikutho ddooshellelliha mu enyumba ya Apwiya.

¹⁶ Yaakhalla m'mapuroni mwiwa moollikana ni malamulo a Mose muthu a Mulluku. Nave allupa mukutho yaamidda vanikuwani nikhame yinnyiwiiwa ni Alevi.

¹⁷ Vawi va mutthukumanomvo vaakhalla athu anchichi ayo yahiddeellihalle, Alevi sika yaphwanelle omwiipha mwaanaankhosa a Paska a arive muthu oyo aheellihiwe wi musaanooyo eellihiwe vamiitthoni va Apwiya.

¹⁸ Sika athu awaata ayo anchichi yavenyenre o Efuremu, Manase, Isakara ni Zebuloni yaari ooheellihiwa komave yaachana Paska moohipwatha malamulo. Koma Hezekiya aavekella wi, “Nyu Apwiya aphaama, mumukhululukelle arive muthu

¹⁹ oyo ni murimaaye muttheene, anamwaasha Mulluku, Apwiya Mulluku a makhollwaaye naari ahithwanre malamulo a weellihiwa woophwanella enyumba ya Apwiya.”

²⁰ Nave Apwiya yaamwiiwa Hezekiya, yaachiriha athwaayo.

²¹ Vano athu a o Israele ayo yaphiyalle o Yerusalemu yaheera Ehakallallo ya Buledi Oohikhalla ni Yisiti mallapo matthanu ni piilli nave yaahakallalla wunchichi. Nave Alevi ni allupa mukutho yaatitimiha Apwiya nllapo ni nllapo ewiipellaka ni masiviiwa mattheene.

²² Vano Hezekiya aallota moowaallipiha murima Alevi attheene yaphanre mutteko wa Apwiya mweeruso. Sika athu yaacha va machellello wa mallapo matthanu ni meelli, ovelleella mikutho ddeeyaattano ni waathokoza Apwiya Mulluku a makhollwiiwa.

Ehakallallo yaneepiilli ya Paska

²³ Vatulli viwa mutthukumano muttheene wahiiwanana ddoovirellella ni ehakallallweeyo wa mallapo mamodda matthanu ni meelli. Sika yaavirellella ohakallalla wa mallapo mamodda matthanu ni piilli.

²⁴ Hezekiya mwene a o Yuda aavelleella anankhoro eeng'ombe 1,000 ni eenkhosa 7,000 nave enduna ddaye ddaavelleella anankhoro 1,000 eeng'ombe ni eenkhosa 10,000 o mutthukumanonko. Nave allupa mukutho anchichi yaaddeelliha.

²⁵ Mutthukumano muttheene wa o Yuda, allupa mukutho ni Alevi, athu attheene yatthukumanille ovenyera o Israele, alleto attheene oovenyera o Israele ni Yuda yaahakallalla.

²⁶ Sika waakhalla ehakallallo yuullupalli eyo ehineereyeke o Yerusalemu waambeella enthawi ya Solomoni mwaana a Davide mwene a o Israele.

²⁷ Vano allupa mukutho ni Alevi yahiimella yahaadalisa athu nave mawiiwa yahiiweya, mavekellwiiwa yaaphiya o nipuro naweella na Mulluku oddullu.