2 Epilli 3 - Mawu a Mulluku

Mamakello a enyumba ya Apwiya

¹ Vano Solomoni ahaamba otthipella musasa wa Apwiya o Yerusalemu va mwaango wa Moriya mvo Apwiya yamooneyelliiwa Davide attiitthinnya, va nipuro nno Davide aatthoollilleeye, nipuro nawuuputhellavo tirigu na Orinani Muyebusi.

² Solomoni ahaamba omaka mweeri waneepiilli wa muyakha waneesese wa omwenaaye.

³ Enyumbeeyo yaari yoorekama mamita 27 nave yooramballalla mamita matthanu ni masese.

⁴ Echipinda yoovollowella yaari mamita matthanu ni masese yoorekama moophwanaphwana ni oramballalla wa enyumbeeyo nave yooya muddullu mamita 54. Muwari mwiwa mwahuruwelliwe ni golide aphaama.

⁵ Esiri ddamuwari mwa echipinda yuullupalli addichingalle ni matabwa amurompwa nave addihuruwellattho ni golide aphaama nave vasirinimvo aareerihavo ni ezithuzi dda kanjeza ni onyolo.

⁶ Mwene aayireeriha enyumbeeyo ni malluku oowallamella mutengo nave golidiiwa aari a o Paravaimu.

⁷ Aawuhuruwella musasa muttheene ni golide monga esiri, migomba, machiwi ni maferemwiiwa. Nave aagoba ezithuzi dda akerubi* vasirini.

⁸ Aapanga nipuro naweellesesa, orekama wiwa woophwanaphwana ni oramballalla wa enyumbeeyo, mamita matthanu ni masese. Aahuruwella nipuronno ni golide aphaama mataani 20.

⁹ Apharihalle mutteko magaramu 570 a golide apangella misomali. Nave ezipinda ddavaddullu aaddihuruwellattho ni golide.

¹⁰ O nipuro naweellesesa aapangellawo akerubi eelli amukoko, aahuruwella ni golide.

¹¹ Muuphello yaattaphurusiwa mattheene yaanakwakhwana mamita matthanu ni sese. Nuuphello nimodda na kerubi mmodda nookhwaranya mamita meelli naanattannya osirini wa enyumba. Nuuphello niwa nimoddattho nookhwaranya mamita meelli naanattannyana ni nuuphello na kerubi mmodda.

¹² Nave nuuphello nimodda na kerubi mmodda na mamita meelli ni okhwaranya naattannyana ni nuuphello na kerubi mmodda.

¹³ Muuphellwaalla yaattaphurusiwa yaanakwakhwana mamita matthanu ni masese. Akerubaayo yahiimella va manyallwiiwa oweha muwari mwa enyumbeeyo.

¹⁴ Nave aapanga ekatani yabululu, yoofiira moohiyanahiyana ni ya bafuta aphaama nave aapetavo ezithuzi dda akerubi.

Apoto eelli amukuwa

¹⁵ Vahoollo va enyumbeeyo aapanga apoto eelli a mamita 15 ni hafu oya muddullu nave miru ddiwa ddaari ddookhwaranya mamita meelli oya muddullu.

¹⁶ Aapanga maunyolo ooreerihana nave ahaahiya vaddullu va apotwaayo. Aapangattho makangaza 100 aahiya m'maunyolonimmo.

¹⁷ Ahaahiya apotwaayo vahoollo va enyumbeeyo, mmodda omwera ni mmodda ompoto. Oomwera aamuromolla wi Yakini nave oompotooyo Bowazi.