2 Epilli 29 - Mawu a Mulluku

Hezekiya mwene a o Yuda

¹ Hezekiya ahaamba olamulella ari ni miyakha 25 nave aalamulella miyakha 29 o Yerusalemu. Amennya yaari Abiya mwaana a Zekariya.

² Nave aheera ddoolungama vamiitthoni va Apwiya wonanko eerelle Davide nikhollo naye.

Hezekiya aneelliha enyumba ya Apwiya

³ Va muyakha wawaamba wa omwenaaye va mweeri wawaamba, Hezekiya aahulla millako dda enyumba ya Apwiya nave aaddipotokosa.

⁴ Vano aamwiithana vamodda allupa mukutho ni Alevi o nthato na wookhuma nndduwa.

⁵ Sika ahaalleella wi, “Nyu Alevi, kaapelleni maaru. Muddeellihe, mweellihettho enyumba ya Apwiya Mulluku a makhollwaanyu ni ovenyihawo ddoonanara o nipuro naweella.

⁶ Vawi makhollwaahu yaari oohiroromelleya nave yaheera ddoonanara vamiitthoni va Apwiya Mullukwaahu. Yahaahiya Apwiya, yaareya ekotho nko wakhalla Apwiya, yahaareya etulli.

⁷ Yaawalla machiwi a nikhote ethiimiha enyali nave kheyaawoosille lubani* apaalle ovelleella mikutho ddooshellelliha mu nipuro naweella wa Mulluku a Israele.

⁸ Sika ekaambiiwa osha murima wa Apwiya waphiyalliiwa va Yuda ni Yerusalemu. Ahaatthattusa ello yawoopiha ni yoosonyiwa vawaanyemullani wonanko munooneellaanyu.

⁹ Makhollwaahu yahiiphiwa ni nsupada nave aniihu aallopwana, aatthiyana ni awarihu eri mu okaporo ekaamba ya yeella.

¹⁰ Vano kooganiza ddookeraatthiha echipangano ni Apwiya Mulluku a Israele wi osha murima wiwa ovenyevo va hi.

¹¹ Anaaka, muhisellihe vawi Apwiya ahuutthoollani wi mwiimelle vamiitthoni viwa mwaarumeyelle wi mukhalle oorumeyelliiwa navettho wi muwooselle lubani.”

Alevi eneelliha enyumba ya Apwiya

¹² Alevi ayo yiimenlle yaari Mahati mwaana a Amasai ni Yowele mwaana a Azariya a mu nibanja na Kohati. A mu nibanja na Merari yaari Kishi mwaana a Abidi ni Azariya mwaana a Yehalelele. A mu nibanja na Gereshoni yaari Yowa mwaana a Zima ni Edeni mwaana a Yowa.

¹³ A mu nibanja na Elizafani yaari Shimiri ni Yeuwele. A mu nibanja na Asafu yaari Zekariya ni Mataniya.

¹⁴ A mu nibanja na Hemani yaari Yehuwele ni Shimei. A mu nibanja na Yedutuni yaari Shemaya ni Uziyele.

¹⁵ Alliwa yahaatthukumaniha abaliiwa nave yaaddeelliha weekhiiwa nave yaavollowa mu enyumba ya Apwiya moollikana ni mmo mwene alamulelleeye voothwarani mawu a Apwiya weelliha enyumbiiwa.

¹⁶ Allupa mukutho yaavollowa muwariwari mwa enyumba ya Apwiya wi yeellihemo nave yaakhumihamo ddeko ddittheddene ddoonanara yaddiphwanyilliiwa ni dda va nthato na enyumba ya Apwiya. Alevi yaaddikusa yadditathithellella o ntapo na muhinje wa Kidroni.

¹⁷ Yahaamba mutteko waweelliha va nllapo nawaamba na mweeri wawaamba nave voophiyani va nllapo naneetthanu ni raru na mweeri, yaaphiya mukhote mwa vamullakoni wa enyumba ya Apwiya. Vano yaaphara mutteko waweelliha enyumba ya Apwiya va mallapo matthanu ni raru nave yaamalliha va nllapo na 16 na mweeri wawaamba.

Enavelleella enyumba ya Apwiya

¹⁸ Emallihalle yaaya wa mwene Hezekiya nave yaamulleella wi, “Nooheelliha enyumba ettheene ya Apwiya, nikuwa na mikutho ddooshellelliha ni ezipangizo ddiwa ddittheddene navettho tebulo a buledi oovelleelliwa vamiitthoni va Apwiya ni ezipangizo ddiwa ddittheddene.

¹⁹ Ezipangizo ddittheddene nnddo mwene Ahazi addivenyihalleeye mvo aariiye mwene oohiroromelleya nooddihokollosellamo nave nooddeelliha. Vano niddihiyalle vahoollo va nikuwa na Apwiya.”

Hezekiya anahokollosella mallapello

²⁰ Vatulli viwa mwene Hezekiya aatimulla ohinase nave ahaatthukumaniha attekweene a m'muzindani nave yaaya o enyumba ya Apwiya.

²¹ Nave yaawa ni anankhoro eeng'ombe atthanu ni eelli, anankhoro eenkhosa atthanu ni eelli ni anankhoro eepuri atthanu ni eelli wi evelleelle mukutho woopepesellana machimo a nibanja na mwene, enyumba ya Apwiya ni Yuda. Nave olliye ahaalamula allupa mukutho, edduullu dda Aaroni, wi eddivelleelle va nikuwa na Apwiya.

²² Sika athwaayo yaawiipha anankhoro eeng'ombe nave allupa mukutho yaakusa nikhame yiithella va nikuwa valle. Yaawiiphattho anankhoro eenkhosa yiithella nikhame niwa va nikuwa.

²³ Nave anankhoro a epuri oopepesellana machimo yaayaana wa mwene ni wa athu yatthukumanille yiiyaatthi mattiiwa va anankhorwaayo.

²⁴ Vano allupa mukutho yaawiipha anankhorwaayo evelleella nikhame niwa va nikuwa monga mukutho woopepesella machimo a Aisraele attheene. Vawi mwene aalamula wi mukutho wooshellelliha ni woopepesella machimo ddeereye ekaamba ya Aisraele attheene.

²⁵ Vano ahaahiya Alevi o enyumba ya Apwiya ni ezida ddawiipella machipo moollikana ni lamulo na Davide ni namallotella Gadi, oollohella a mwene, ni namallotella Natani. Vawi lamulo nenno tti na Apwiya oyeella mwa anamallotelliiwa.

²⁶ Alevi yahiimella ekusalle ezida ddawiipella machipo dda Davide nave allupa mukutho yakusalle mapallapata.

²⁷ Vaavo Hezekiya aalamula wi mukutho wooshellelliha ovelleelliwe va nikuwa. Nave mukutho wooshellelliha waambille ovelleelliwa, yahaambattho owiipella machipo Apwiya. Nave mapallapata ni ezida ddimodda dda Davide mwene a o Israele ddahiipiwattho.

²⁸ Mutthukumano muttheene waallapella, amachipo ni amapallapata yiipaka. Ddittheddenenndda ddaavirellella ophiyera mukutho wooshellelliha omanlle.

²⁹ Vano mukutho omanlle, mwene ni athu attheene yaakokhora ni enaallapella Apwiya.

³⁰ Vano mwene Hezekiya ni enduna ddaye yahaalamula Alevi wi yiipe machipo owaatitimiha Apwiya moollikana ni mawu a Davide ni namallotella Asafu. Vano yahiipa moohakallalla nave yaakokhora ellapella.

³¹ Hezekiya aallota wi, “Vawi mooddeelliha wa Apwiya atamellani wuno muweena mikutho ddanyu ni ddoovelleella ddanyu ddoothokoza o enyumba ya Apwiya.”

³² Nave echiwerengero ya mikutho ddooshellelliha nnddo yawiilliiwana yaari anankhoro eeng'ombe 70, anankhoro eenkhosa 100 ni asaana eenkhosa 200. Ddittheddenenndda yaaddivelleella wa Apwiya monga mukutho wooshellelliha.

³³ Nave mikutho ddoopatuleya ddaari anankhoro eeng'ombe 600 ni enkhosa 3,000.

³⁴ Koma allupa mukutho yaarivo vang'ono mwawi kheyaawonre waatta enama ddittheddene dda mukutho wooshellelliha. Sika vootiyerellani wi allupa mukutho amodda eddeellihe, abale a Alevi yahaakavihera ophiyera mutteko muttheene waamalla vawi alliwa yaanathwara phaama mutetho wooddeelliha waakhwaranya allupa mukutho.

³⁵ Waanjerera va echiwerengero ya mikutho ddooshellelliha, vaakhallattho makhura a mikutho ddeeyaattano navettho ddoowirya dda va mukutho wooshellelliha. Sika mitteko ddittheddene dda o enyumba ya Apwiya ddaahokolloselliwa.

³⁶ Hezekiya ni athu attheene yaahakallalla ekaamba yawi nnddo Mulluku aweerelleeye ddaheeta phaama.