2 Epilli 28 - Mawu a Mulluku

Ahazi mwene a o Yuda

¹ Ahazi aari ni miyakha 20 avollowaaye omwene nave aalamulella o Yerusalemu miyakha 16. Olliye kheerille ddoolungama vamiitthoni va Apwiya wonanko eerella Davide nikhollo naye.

² Koma athwarille ezisanzo ddoonanara dda mamwene a o Israele. Aapanga mafano amikoko a Baala

³ nave aanoosa lubani* vantaponi na mwaana a Hinomu nave ahaavelleella anaaye aallopwana wonanko mukutho wooshellelliha voothwarani mitetho ddoonanara dda athu a mitundu ddimodda nnddo Apwiya yaddiikarihalliiwa mwiillaponimmo Aisraele yaphiyiiwa.

⁴ Nave aavelleella mikutho ni woosa lubani mapuro oollapellamo mafano omiyaangoni ni vatthi va orive muteekho woorapa.

Owana ni Siriya ni Israele

⁵ Sika ekaambiiwa Apwiya Mullukwaaye yamuvelleelliiwa Ahazi wa mwene a o Siriya oyo amugonjihalle nave athu anchichi yaaphariwa okaporo oya o Damasiko. Aavelleelliwattho m'mattani mwa mwene a o Israele oyo amugonjihalle voomwiiphani.

⁶ Vawi Peka mwaana a Remaliya aawiipha athu 120,000 a o Yuda va nllapo nimodda, attheenaayo amasiva ni oollipa murima ekaamba yawi yahaahiya Apwiya Mulluku a makhollwiiwa.

⁷ Nave Zikiri muthu amasiva a o Efuremu aamwiipha Maaseiya mwaana a mwene ni Azirikamu enduna ya o enyumba yoomwene navettho Elikana aneepiilli mu omwene.

⁸ Vano athu a o Israele yahaaphara okaporo abaliiwa 200,000, atthiyana nave anamwani aallopwana ni aatthiyana. Yaawaakhattho ddeko ddinchichi ewaana o Samariya.

Namallotella Odedi

⁹ Koma waari namallotella a Mulluku nnddina naye Odedi. Olliye aaya wi akumane ni mulloko wakhoto wawiille o Samariya nave ahaalleella wi, “Apwiya Mulluku a makhollwaanyu yahaashella murima athu a o Yuda nave yahaavelleella m'mattani mwanyu koma moowiipha mwa owalli oyo ophiyalle oddullu.

¹⁰ Vano munapaalla wi muweerihe athu a o Yuda ni a o Yerusalemu okhalla akaporwaanyu. Ethiyo nyuwaano khemunna machimo aweekhiinyu vamiitthoni va Apwiya Mullukwaanyu?

¹¹ Vano ngakiiweni, mwaahokollose abalaanyu ayo mwaapharilleenyu okaporo vawi osha murima wawoopiha wa Apwiya ori va nyuwaano.”

¹² Oohoollella amoddattho a o Efuremu monga Azariya mwaana a Yohanani, Berekiya mwaana a Mashilemoti, Yehizikiya mwaana a Shalumu ni Amasa mwaana a Hadilayi yaawukila ayo yavenyera okhotoni

¹³ nave yahaalleella wi, “Khemwaaheye owaana wuno akaporwaayo vawi nyu munapaalla wi hi naachimwelle Apwiya waanjerera va machimwaahu ni va ddoolakwa ddahu. Vawi olakwa wahu tti wuullupalli nave osha murima wawoopiha wa Apwiya ori va Israele.”

¹⁴ Vano akhoto yahaahiya akaporwaayo ni ddeko ddawaakhannddo vamiitthoni va oohoollella ni mutthukumano.

¹⁵ Vatulli viwa athu yatthoolliwe yaavenya nave yahaakusa akaporwaayo. Yahaawariha ddeko yaakhilliiwanndde ayo yaari epwillimwinddive, yaavaha esapato, ddoocha ni ddoowirya nave yahaazoza. Yahaatukhullella va abulu athu attheene yafookille, yaawana wa abaliiwa o Yeriko muzinda wa mikwarangwa. Nave yaahokollweella o Samariya.

Ahazi anaveka nikavihero o Asiriya

¹⁶ Va enthawi yeeyo mwene Ahazi aarumiha othenga wa mwene a o Asiriya oveka nikavihero.

¹⁷ Valle Aedomu yaahellattho ekhoto ni waagonjiha Ayuda nave yahaaphara athu okaporo.

¹⁸ Afilisti yaahellattho ekhoto va mizinda dda o Shefela ni omwera wa Yuda. Yahaakha Beteshemeshi, Ayaloni, Gederoti, Soko ni mizi ddaye, Timna ni mizi ddaye navettho Gimizo ni mizi ddaye, ekeraattheya wenko.

¹⁹ Vawi Apwiya yaayeviha masiva a ellapo ya Yuda ekaamba ya Ahazi mwene a o Israele amunanariha Yuda nave khaari oororomelleya wa Apwiya.

²⁰ Sika Tiligati Pilesere mwene a o Asiriya aawanana ekhoto nave yaamuhoosa wunchichi munipuroni moomullipiha.

²¹ Vawi Ahazi aakusa katundu ovenyera o enyumba ya Apwiya ni o enyumba yoomwene ni o enyumba dda enduna amuvelleella wa mwene a o Asiriya koma kheddaaphunre ello.

²² Va enthawi ya ddookatamiha ddaye, Ahazi aavirellella ohiroromelleya wa Apwiya.

²³ Vawi aavelleella mikutho wa milluku dda o Damasiko nnddo ddamugonjihalle nave aallota wi, “Ekaamba yawi milluku dda mamwene a o Siriya ddahaakavihera, mi kineeroddivelleellella mikutho wi ddikikaviherettho.” Koma millukunnddo ddaamoononga ni athwaaye attheene a mu Israele.

²⁴ Vano Ahazi aatthukumaniha eziwiya ddittheddene dda o enyumba ya Mulluku addipwesa nave aawalla machiwi a enyumbeeyo. Vatulli viwa aamaka makuwa m'mapuroni manchichi mu Yerusalemu.

²⁵ Aamakattho mapuro oollapellamo milluku ddimodda mu orive muzinda wa Yuda waattatthamulla ni waashiha murima Apwiya Mulluku a makhollwaaye.

²⁶ Vano mitteko ddaye ddimodda mu olamulellwaaye muttheene, ovenyera vawaamba ophiyera omamallihello, ddoolembiwa mu nibukhu na epilli ya mamwene a o Yuda ni Israele.

²⁷ Vano Ahazi aakhwa nave aavitthiwa mu muzinda wa Yerusalemu koma ohiri mu mahame a mamwene a o Israele. Vano Hezekiya mwanaye aavollowa omwene munipuroni mwaye.