2 Epilli 27 - Mawu a Mulluku

Yotamu mwene a o Yuda

¹ Yotamu aari ni miyakha 25 avolloweeye omwene nave aalamulella o Yerusalemu miyakha 16. Amennya yaari Yerusha mwaana a Zadoki.

² Olliye aheera ddoolungama vamiitthoni va Apwiya moollikana ni mmo eerella Uziya attiitthinnya nave khaachimwalle vawoosani lubani mu enyumba ya Apwiya. Nave athu yaanavirellellave weera machimo.

³ Aamaka mullako wa Omwaako wa enyumba ya Apwiya nave aaphara mutteko muullupalli woomaka mpanda wa Ofele.

⁴ Aamakattho mizinda o ellapo ettheene yamiyaango ya Yuda, mipanda ni mattattha mu otthako wa miyaango.

⁵ Aawana ni mwene Aamoni nave ahaagonjiha. Nave muyakha yooyo Aamoni yaamuvaha makobiri 100 a siliva, mataani 10,000 a tirigu ni mataani 10,000 a barele. Yahaakullella weera ddenndda wa muyakha waneepiilli ni waneeraru.

⁶ Sika Yotamu aakhalla amasiva ekaamba yawi aaniivelleella ni murimaaye muttheene vamiitthoni va Apwiya Mullukwaaye.

⁷ Vano mitteko ddimodda dda Yotamu, ekhoto ddaye ddittheddene ni makhallellwaaye ddoolembiwa mu nibukhu na epilli ya mamwene a o Israele ni a o Yuda.

⁸ Avollowille omwene ari ni miyakha 25 nave aalamulella o Yerusalemu miyakha 16.

⁹ Yotamu aakhwa nave aavitthiwa ni makhollwaaye mu muzinda wa Davide. Nave Ahazi mwanaye aavollowa omwene munipuroni mwaye.