2 Epilli 26 - Mawu a Mulluku

Olamulello wa Uziya

¹ Vatulli viwa athu attheene a o Yuda yaamukusa Uziya oyo aari ni miyakha 16 akhalla mwene ovollowa munipuroni mwa Amaziya attiitthinnya.

² Aamaka muzinda wa Eloti awuhokollosella o Yuda attiitthinnya ekhwille.

³ Uziya aari ni miyakha 16 avolloweeye omwene nave aalamulella miyakha 52 o Yerusalemu. Amennya yaari Yekoliya a o Yerusalemu.

⁴ Nave aheera ddoolungama vamiitthoni va Apwiya wonanko mmo yeerella attiitthinnya Amaziya.

⁵ Ahiivelleella wa Mulluku m'mallapo a Zekariya oyo amulangiza ddawaatitimiha Apwiya. Vawi aanaallapella Apwiya Mulluku, yaanamudalisa.

⁶ Aaya awana ni Afilisti nave aakumulla mpanda wa Gati, wa Yabine ni wa Ashidodi. Nave aamaka mizinda mu echigawo ya Ashidodi navettho mu echigawo emodda variyari va Afilisti.

⁷ Mulluku aamukavihera voowanani ni Afilisti, Aarabu ayo yakhalla o Guribaala ni Ameuni.

⁸ Athu yaanakhoma musonkho wa Uziya nave aavuwa ophiyera omalireni a Iguputo vawi aari amasiva wunchichi.

⁹ Aamaka mattattha mu Yerusalemu o mullako wa Vakona, mullako wa Ntapo ni va Ekona nave aaddillipiha.

¹⁰ Nave aamaka mattattha muchipululuni nave aakata ehime ddinchichi vawi aakhalla ni eziweto ddinchichi omapuroni oochihellawo eziweto ni omataponi. Aakhallattho ni athu oollima m'matani ni athu oowehera mpesa omiyaangoni navettho o ellapo dda ethaya yaphaama vawi aanakonda ollima.

¹¹ Komattho Uziya aakhalla ni mulloko wa akhoto. Yaari milloko milloko moollikana ni ntthopoollo na Yeiyele namalembella ni Maaseiya oohoollella a ekhoto vatthi va olamulello wa Hananiya, akhoto muullupalli mmodda a enduna dda mwene.

¹² Echiwerengero ya oohoollella mabanja a akhoto amasiva yaari 2,600.

¹³ Vatthi va olamulellwiiwa vaakhalla mulloko wa akhoto 307,500 ayo yawora owana ekhoto mwamasiva voomukaviherani mwene owana ni adaniiwa.

¹⁴ Vano Uziya aatthukumaniha ddittheddene ddawiitetezellana dda mulloko wakhoto monga mavaka, ezipewa ddakhoto, malaya akhoto amikoko, miira ni malluku oovokhella.

¹⁵ O Yerusalemu aapanga mitthipo oweella mwa athu eeruso, nnddo ddahiyiwa va mattattha ni va mapuro mattheene vasirini wi athu evokheke phaama mavaka navettho malluku muullupalli. Sika aavuwa nave epillaaye yahiiweya vuutete vawi Mulluku aamukavihera moottikhiniha ophiyera aakhalla amasiva.

Uziya anallakiwa ekaamba ya wiitukhulla waye

¹⁶ Koma masiva a Uziya yunnuwalle ahaamba wiitukhulla nave aallakiwa. Khaawiiwellelle wa Apwiya Mullukwaaye voovollowani m'musasani wa Apwiya wi oose lubani* vanikuwani nawoosellavo.

¹⁷ Koma Azariya mullupa mukutho ni allupa mukutho oollipa murima 80 yaamuthwara mwemmo.

¹⁸ Vano allupa mukuthwaayo yaamuhiyiha mwene Uziya emulleella wi, “Pepaani amwene Uziya, nyuwaano khemunaphwanella woosa lubani wa Apwiya koma allupa mukutho, edduullu dda Aroni ayo epatuliwe wi yooseke lubani. Khumani mu nipuro naweellanna vawi khamuwiiwellelle Apwiya nave kheyuuriihani.”

¹⁹ Vano Uziya aasha murima m'mattani mwaye muri yawoosella lubani. Nave aashenlle murima ddiiddo makate yaakhuma vayuuchini vaye vamiitthoni va allupa mukutho mu enyumba ya Apwiya vakhuviru ni nikuwa nawoosellavo lubani.

²⁰ Vano Azariya mullupa mukutho muullupalli ni allupa mukutho amodda yaamoona wi okhalla ni makate vayuuchini vaye emukakhella vaatte nave olliye mwaneena aakhuma mwawaakuva ekaamba yawi Apwiya yaamullaka.

²¹ Mwene Uziya aakhalla amakate ophiyera okhwa waye nave aavenyihiwamo mu enyumba ya Apwiya anakhalla vayeekhaaye. Mwanaye Yotamu sika awehera nibanja na mwene ni waalamulella athu mwiillaponimmo munipuroni mwaye.

²² Vano mitteko ddittheddene dda Uziya ovenyera vawaamba ophiyera omamallihello ddaalembiwa ni namallotella Yesaya, mwaana a Amozi.

²³ Nave Uziya akhwille aavitthiwa ni makhollwaaye aavollowa omwene munipuroni na mahame a mamwene vawi yaallota wi, “Olliye tti amakate.” Vano Yotamu mwanaye munipuroni mwaye.