2 Epilli 25 - Mawu a Mulluku

Amaziya mwene a o Yuda

¹ Amaziya aari ni miyakha 25 avolloweeye omwene nave aalamulella miyakha 29 o Yerusalemu. Amennya yaari Yehowahadani a o Yerusalemu.

² Vano aheera ddoolungama vamiitthoni va Apwiya koma ohiri ni murima woororomelleya.

³ Aakhenlle masiva mattheene oomwene m'mattani mwaye, Amaziya aawiipha allupa muttekwaaye alle yamwiiphalle mwene, ttiitthinnya.

⁴ Koma khaawiiphalle anamwani a athwaayo moollikana ni nnddo ddalembiwe mu nibukhu na malamulo a Mose mmo Apwiya yalamunliwa wi, “Makhollo ehiiphiweke ekaamba ya aniiwa, emoddamoddave anamwani ehiiphiweke ekaamba ya makhollwiiwa koma arive muthu iiphiweke ekaamba ya nichimo naye.”

Owana ni Edomu

⁵ Vano Amaziya ahaatthukumaniha athu a o Yuda nave ahaahiya moollikana ni mabanjiiwa vatthi va oohoollella a athu anchichi a o Yuda ni o Benjamini wene. Aawiithaniha athu a miyakha 21 oya muhoollo nave aphwanyille wi yaarivo athu 300,000 yatthoolliwe wi ewane ekhoto, oodduwella ophariha mutteko mavaka ni ddawiitetezellana.

⁶ Ahaalembattho akhoto 100,000 amasiva ni oollipa murima ovenyera o Israele va mutengo wa makobiri 3,400 a siliva.

⁷ Koma muthu a Mulluku aaphiya wa olliye allota wi, “Nyu amwene, muhaakhullelle wi mulloko wakhoto wa o Israele othaane ni nyu vawi Apwiya kheri ni Aisraele apaalle Aefuremu.

⁸ Koma mwaaganizaka wi muneerokhalla ni masiva eekhoto, Mulluku aneerewuugonjihani vamiitthoni va adani vawi Mulluku ookhalla ni masiva ookavihera ni oogonjiha.”

⁹ Amaziya aamukoha muthu a Mulluku wi, “Koma vano nineerena tini makobiri 100 a siliva ayo kaavahilleemi akhoto a Israele?” Olliye ahaakhulla wi, “Apwiya ennawora wuuvahani ddinchichi okhwaranya ddenndda.”

¹⁰ Vaavo Amaziya aawuvenyihavo mulloko wa o Efuremu wi ohokollweellettho owaniwa. Sika yahaashella murima athu a o Yuda nave yaahokollowa enanariwalle wunchichi.

¹¹ Koma Amaziya aallipa murima, aahoollella akhotwaaye, aayaana o ntapo na Mwiinyu nko yawiiphalliiwa athu 10,000 a o Seiri.

¹² Athu a o Yuda yahaaphara athu amodda akumi 10,000 nave yaawellana vaddullu Vanllukuni nuullupalli yaavokhella vatthi nave attheenaayo yaanyenyeya.

¹³ Koma mulloko wakhoto awuhokollosille Amaziya, ohithaanana okhotoni wulle waahella ekhoto mizinda dda Yuda ovenyera o Samariya ophiya o Betehoroni. Wenko yaawiiphawo athu 3,000 nave yahaakhawo ddeko ddinchichi.

¹⁴ Amaziya awiillewo woowiipha Aedomu, aakusa milluku dda o Seiri addikeraatthiha okhalla milluku ddaye nave aanaddillapella ni oddivelleellella mikutho.

¹⁵ Sika Apwiya yaamushella murima Amaziya emurumihella namallotella oyo amukohille wi, “Kaambiiwa tini otthoollilleewe milluku nnddo ddahiworille owoopolla athwiiwa m'mattani mwanyu?”

¹⁶ Alloteeye ddennddo mwene aamukoha wi, “Ethiyo we nahuutthoolla wi okhalle oomulangiza mwene? Maalleya! Kaambiiwa tini onapaalleewe wiiphiwa?” Nave namallotellooyo aamaalleya wa enthawi yooyeva nave aallota wi, “Koodduwella wi Mulluku ookhozeka wi awoonongeni ekaamba moheera ddenndda navettho khemwawiiwellelle malangizwaaka.”

Amaziya anawana ekhoto ni Israele

¹⁷ Vano Amaziya mwene a o Yuda ahiiwellella malangizo nave ahaaruma amithenga wa Yowashi, mwaana a Yehowahazi, mwaana a Yehu, mwene a o Israele yallota moomullika wi, “Owe noonane vamiitthoni ni vamiitthoni.”

¹⁸ Yowashi mwene a o Israele aahokollosa mawu wa Amaziya mwene a o Yuda wi, “Vaakhalla muteekho wamiiwa wa o Lebanoni oyo warumihalle mawu wa mukunguza wa o Lebanoni wi, ‘Mwaakhullelle mwanawo aamutthiyana wi atthelliwe ni mwanaka.’ Koma enama yawoopiha ya o Lebanoni yaavira vaavo ewunyingallella muteekho wamiiwooyo.

¹⁹ Ddawoona, we woomugonjiha Edomu nave vano onimiitukhulla. Itthamalleke ni opambana wawonko koma vano okhalle owaninyu wenko. Kaambiiwa tini onapaalleewe ottatthamulla ddookatamiha mwaphudda? Phaamathi oneeromora we ni athu a o Yuda.”

²⁰ Koma Amaziya khaaddipwathille ddenndda vawi tti Mulluku apaallille wi aavelleelle athwaayo m'mattani mwa adaniiwa ekaamba yawi yallapella milluku dda Edomu.

²¹ Vano Yowashi, mwene a o Israele, aaya awanana ni Amaziya, mwene a o Yuda, o Beteshemeshi o Yuda.

²² Yuda aagonjihiwa ni Israele nave arive akhoto aathawella owaniwa.

²³ Vano Yowashi mwene a o Israele aamuphara Amaziya mwene a o Yuda mwaana a Yowashi mwaana a Ahaziya o Beteshemeshi amuyaana o Yerusalemu. Nave Yowashi aakumulla mpanda wa Yerusalemu mamita 200 ovenyera va mullako wa Efuremu ophiyera va mullako wa Vakona.

²⁴ Aamwaakha golide ni siliva muttheene ni eziwiya ddittheddene addiphwanyilleeye mu enyumba ya Mulluku yooweheriwa ni Obedi Edomu ni mu enyumba yoosungellamo eyuuma ya mwene. Ahaapharattho athu amodda wonanko echikole ahokollweella o Samariya.

²⁵ Amaziya mwaana a Yowashi, mwene a o Yuda aakhalla ni okumi miyakha khumi ni mitthanu akhwille Yowashi mwaana a Yehowahazi, mwene a o Israele.

²⁶ Vano mitteko ddimodda eerille Amaziya ddoolembiwa mu nibukhu na epilli ya mamwene a o Yuda ni a o Israele.

²⁷ Waambeella enthawi elle aakhootilleeye Apwiya, athu amodda yahiiwanana ddoomweerella echiwembu Amaziya o Yerusalemu sika aathawella o Lakishi. Koma adanaaye yahaaruma athu ayo yamwiiphenlle wenko.

²⁸ Nave yaamutukhulla va akavalo nave yaamuvittha ni makhollwaaye mu muzinda wa Davide.