2 Epilli 24 - Mawu a Mulluku

Yowashi anamakattho enyumba ya Apwiya

¹ Yowashi aari ni miyakha mitthanu ni miilli mvo avollochihiweeye omwene nave aalamulella miyakha 40 o Yerusalemu. Amennya yaari Zibiya a o Beeresheba.

² Vano Yowashi aheera ddoolungama vamiitthoni va Apwiya mallapo mattheene a okumaaye ekaamba yawi Yehoyada, mullupa mukutho aanamulangiza.

³ Yehoyada aamutthoollella mwenooyo atthiyana eelli okhalla awariye nave yahaayara anamwani aallopwana ni aatthiyana.

⁴ Vatulli viwa Yowashi aaganiza ddoopotokosa enyumba ya Apwiya.

⁵ Nave ahaatthukumaniha allupa mukutho ni Alevi aalleella wi, “Khaweni o mizinda dda Yuda mwatotelle makobiri ovenyera wa Aisraele wi mupotokoselle enyumba ya Mullukwaanyu orive muyakha nave moonesese wi ddenndda ddeereye mwawaakuva.” Koma Alevi Kheyaaweerille nndda mwawaakuva.

⁶ Vano mwene aamwiithana Yehoyada amukoha wi, “Ethiyo kaambiiwa tini wahaalleelleewe Alevi wi etotelle makobiri ovenyera o Yuda ni Yerusalemu ayo alamulalle Mose oorumeyella a Apwiya o mpingo wa Aisraele oopotokosella musasa wa mutthukumano?”

⁷ Vawi anamwani a Ataliya mutthiyana oonanaroolle, yahoononga enyumba ya Mulluku yaakha ddeko ddittheddene ddoopatuleya eya yaddiphariha mutteko voomullapellani Baala.

⁸ Vano mwene aalamula wi epange nibokosi nave yaanihiya otte wa mullako wa enyumba ya Apwiya.

⁹ Nave yaallalleya wa athu attheene a o Yuda ni Yerusalemu wi eweena wa Apwiya makobiri ayo Mose oorumeyella a Mulluku alamulalleeye o echipululu wulle wi Aisraele attheene evelleelleke.

¹⁰ Vano oohoollella ni athu attheene yaahakallalla nave yaawaana makobiriiwa ehiya mu nibokosi mulle ophiyera naaddalla.

¹¹ Nave Alevi yaawaana nibokosi wa enduna a mwene yoona wi mookhalla makobiri manchichi nave namalembella a mwene ni ookavihera mullupa mukutho muullupalli aanaawiithamo makobiraayo ni onihokollosella vanipuroni viwa. Nndda sika yeeriiwa nllapo ni nllapo mwawi yaatotella makobiri manchichi.

¹² Nave mwene ni Yehoyada yaanaddivelleella wa makapitawo a o enyumba ya Apwiya. Vano yahaalemba mutteko athu eeruso ya malluku, matabwa, mukoko ni mukuwa wi epotokose enyumba ya Apwiya.

¹³ Vano athu yalembiwaayo yaaphara mutteko moollipihella sika mutteko woopotokosooyo waavirellella phaama nave yaayihokollosella mwakhalle, eyillipiha.

¹⁴ Emallihalle, yaawaana makobiri oohalla wa mwene ni Yehoyada ayo yaapangenlliiwa eziwiya dda o enyumba ya Apwiya navettho dda mukutho wooshellelliha. Nave yaapangattho embale ddagolide ni ddasiliva. Vano yaavirellella owaana mikutho ddooshellelliha o enyumba ya Apwiya mu enthawi ya Yehoyada.

Athu enahiya othwara ettilla dda Yehoyada

¹⁵ Yehoyada ahuulluvalla, mallapo a okumaaye yahaata nave akhwille ari ni miyakha 130.

¹⁶ Avitthiwe mu muzinda wa Davide vamodda ni mamwene ekaamba yawi aheera ddaphaama mu Israele nave aanamurumeyella Mulluku mu enyumbaaye.

¹⁷ Vano Yehoyada akhwille, enduna dda o Yuda ddaawa ddimuvaha olemu mwene Yowashi nave olliye aawiiwellella.

¹⁸ Vano yaahiya enyumba ya Apwiya, Mulluku a makhollwiiwa enarumeyella mafano a Asherimu. Sika osha murima wa Apwiya waaphiya va athu a o Yuda ni Yerusalemu ekaamba ya ochimwa wiwa.

¹⁹ Naari Mulluku aarumalle anamallotella variyari viwa wi yaahokolloselle wa Apwiya anamallotellaayo yaahumullullalliiwa yaakhoota nave kheyawaapwathille.

²⁰ Vano munepa wa Mulluku waavollowa mwa Zekariya mwaana a Yehoyada mullupa mukutho. Olliye ahiimella variyari va athu allota wi, “Apwiya enakoha wi, ‘Ethiyo kaambiiwa tini muhiniiwellelleenyu malamulo a mi Apwiya? Khaddiweetellani phaama. Ekaamba yawi mohaahiya Apwiya, alliwattho ahuuhiyani.’ ”

²¹ Koma yaamweerella echiwembu nave mwene aalamula wi avokhiwe malluku mu nthato na enyumba ya Apwiya.

²² Sika mwene Yowashi khuupuwelle ddaphaama nnddo Yehoyada attiitthinnya a Zekariya amweerelleeye koma aamwiipha mwanaye. Nave vookhwani aallota wi, “Apwiya ennoona nave ehokolloselle!”

Omalla wa olamulello wa Yowashi

²³ Omamallihello, mulloko wakhoto wa Asiriya waawana ni Yowashi. Yaawa o Yuda ni o Yerusalemu ewiipha oohoollella attheene a athu variyari va athwaayo nave erumiha ddeko ddittheddene yaakhilliiwa wa mwene a o Damasiko.

²⁴ Naari mulloko wakhoto wa Asiriya wawiille ni athu ooyeva, Apwiya yaavelleella mulloko wakhoto muullupalli ekaamba yahaahiya Apwiya Mulluku a makhollwiiwa. Mmu sika Asiriya yamullakelliiwa Yowashi.

²⁵ Yamuhiyalliiwa aphoreyille wunchichi, allupa muttekwaaye yaamweerella echiwembu ekaamba ya nikhame na mwaana a Yehoyada mullupa mukutho nave yaamwiipha vabedini vaye. Sika aakhwa nave yaamuvittha mu muzinda wa Davide koma kheyaamuvitthalle o mahame a mamwene.

²⁶ Yamweerelle echiwembu yaari Zabadi mwaana a Shimea Muamoni ni Yozabadi oyo amennya yaari Shimiriti Mmowabu.

²⁷ Dda anaaye aallopwana ni ddinchichi ddoomuvaanyiha navettho ddoomaka enyumba ya Mulluku ddoolembiwa mu nibukhu nootthopoolla dda nibukhu na epilli ya mamwene. Vano Amaziya mwanaye sika avollowille munipuroni mwaye.