2 Epilli 23 - Mawu a Mulluku

Oorumeyella a o enyumba ya Apwiya enamuukila Ataliya

¹ Koma m'muyakha waneetthanu ni piilli Yehoyahada aallipa murima nave aawiithana athu ayo yaari oohoollella a akhoto anchichi, Azariya mwaana a Yerohamu, Ishmaele mwaana a Yehohanani, Azariya mwaana a Obedi, Maaseiya mwaana a Adaya ni Elishafati mwaana a Zikiri.

² Yaheetella ellapo ya Yuda yaatthukumaniha Alevi oovenyera m'mizindani ddittheddene dda o Yuda ni oohoollella a mabanja a Aisraele nave yaawa o Yerusalemu.

³ Nave mutthukumano muttheene waakeraatthiha echipangano ni mwene mu enyumba ya Mulluku. Vano Yehoyada ahaalleella wi, “Ngamooneni mwaana a amwene! Muhiyeni alamulelle moollikana ni mmo Apwiya yallotilliiwa dda anamwani a Davide.

⁴ Nndda sika muneereenyu, mwa nyuwaano allupa mukutho ni Alevi, munaakhalle oorumeyella va nllapo na Sabata, mukawaneye vararu wi mulloko mmodda owehereke m'millako,

⁵ mmodda okhalle o enyumba yoomwene nave waneeraru owehere va mullako wa Matthipello. Nave athu attheene ekhalle m'mathatoni a enyumba ya Apwiya.

⁶ Muhimwaakhullelle arive muthu ovollowa mu enyumba ya Apwiya koma allupa mukutho ni Alevi ayo enarumeyella. Alliwa ttuuvollowa vawi tti aweella koma athu attheene yiiwellelleke malamulo a Apwiya.

⁷ Nave Alevi ekhalleke moomwaapheella mwene, arive muthu ni ezida ddaye m'mattani nave arive muthu anaavollowe mu munyumbanimmo iiphiwe. Mukhalleke ni mwene orive weko anayeeye.”

⁸ Alevi ni athu attheene a o Yuda yaheera ddittheddene moollikana ni mmo mullupa mukutho Yehoyada aalamulelliiwa. Arive muthu aawana athwaaye ayo yaamba muttekwiiwa va nllapo na Sabata vamoddattho ni ayo yaworowa o muttekwiiwa woolonda va nllapo na Sabata vawi Yehoyada khaawaakhullelle wi evenyevo.

⁹ Olliye aawinnya oohoollellaayo mavaka ni ddootetezella dduullupalli ni dding'onong'ono nnddo ddaari dda mwene Davide. Ddenndda ddasungiwa mu enyumba ya Mulluku.

¹⁰ Vano ahaatthattaniha akhoto wi emutetezeke mwene, arive muthu ari ni ezida m'mattani mwaye ovenyera omwera ophiyera ompoto wa enyumba waapheella nikuwa ni enyumba ya Apwiya.

¹¹ Sika ahaakhumihella mwaana a mwene, amuwariha enduwira yoomwene, amwinnya nibukhu na malamulo nave amuzoza amuvollochiha omwene. Athu yaamoopella m'mattani ellota mookhuwa wi, “Mwene akhalle ni okumi woorekama.”

¹² Vano Ataliya iiwalleeye okhuwa wa athu ethamakaka emuhakallallellaka mwenooyo moomuriiha aavollowa mu enyumba ya Apwiya mulle yatthukumanille athu.

¹³ Awehille, aamoona mwene iimenlle vanttatthani naye moothwara mutetho wa omwene, oohoollella ni athu awiipa mapallapata emwaaphenlle. Athu attheene a mu echigawommo yaanahakallalla yiipaka machipo ni ezida ddiwa. Sika Ataliya ahaahulla ddoowara ddaye nave mookhuwa ni moosha murima aallota wi, “Owukila! Owukila!”

¹⁴ Vano mullupa mukutho Yehoyada ahaalamula oohoollella a akhoto wi, “Mukhumiheni yoolla m'mizereni mmo mutthattanneenyu. Nave arive muthu anaamuthware mmwiiphe ni nsupada!” Mullupa mukuthooyo aalamula wi, “Muhimwiiphelle mu enyumba ya Apwiya.”

¹⁵ Nave yaamphara Ataliya emuyaana o enyumba yoomwene va mullako wa Akavalo emwiiphella vaavo.

Mullupa mukutho Yehoyada anakeraatthiha echipangano ni athu

¹⁶ Vano Yehoyada aakeraatthiha echipangano variyari vaye ni athu attheene ni mwene wi ekhalle athu a Apwiya.

¹⁷ Sika athu attheene a mu ellapweeyo yaaya o enyumba ya Baala eyikumulla. Yaakumulla makuwaaye ni mafanwaaye. Vatulli viwa yaamwiipha Matani mullupa mukutho a Baala vahoollo va makuwa. Vano mullupa mukutho Yehoyada ahaahiya alonda o enyumba ya Apwiya.

¹⁸ Vano Yehoyada ahaahiyavo allupa mukutho a nlloko na Levi wi ewehereke enyumba ya Apwiya. Vawi Davide ahaakeraatthiha Alevi wi ewehereke enyumba ya Apwiya ni ovelleella mikutho ddooshellelliha moollikana ni mmo ddalembelliwiiwa m'malamuloni a Mose. Yehoyada ahaalleellattho wi ehakallalleke yiipaka machipo moollikana ni lamulo na Davide.

¹⁹ Olliye ahaahiya alonda va mullako wa enyumba ya Apwiya wi arive muthu ooheellihiwa ahivollowe.

²⁰ Vatulli viwa olliye ahaatthattaniha oohoollella a akhoto, akhoto oomuwehera mwene ni athu attheene a mwiillaponimmo. Attheene yaamuvelleella mwene ovenyera o enyumba ya Apwiya oyeella o mullako wa Alonda ophiya o enyumba yoomwene. Sika Yowashi aakeraatthi va mpando woomwene.

²¹ Sika athu a mwiillaponimmo yaahakallalla nave m'muzindanimmo mwaamaalleya Ataliya iiphiweeye o enyumba yoomwene.