2 Epilli 22 - Mawu a Mulluku

Ahaziya mwene a o Yuda

¹ Vano athu a mu Yerusalemu yaamuvollochiha omwene Ahaziya ethwako munipuroni mwa mwene attiitthinnya vawi athu yawiille ni Arabu omusasanaalle yaawiipha anamwani aallopwana amodda. Sika Ahaziya mwaana a Yehoramu aakhalla mwene a o Yuda.

² Ahaziya aari ni miyakha 22 voovollowani omwene nave aalamulella muyakha mmodda o Yerusalemu. Amennya yaari Ataliya mwaana a Ahabu, edduullu ya Omuri.

³ Olliye aathwara echisanzo ya nibanja na Ahabu wawi amennya sika yamuvaha malangizo aweera ddoonanara.

⁴ Aheera ddoonanara vamiitthoni va Apwiya wonanko neerella nibanja na Ahabu vawi attiitthinnya ekhwille alla sika yaari alangizaaye vaweerani ddoonanara.

⁵ Aathwarattho malangizwiiwa nave aanaya ni Yehoramu mwaana a Ahabu mwene a o Israele woowana ekhoto ni Hazaele mwene a o Siriya o Ramoti Giliyadi nko Asiriya yaamuphoreyihalliiwa Yoramu.

⁶ Vano Yoramu aahokollowa aya o Yezireele wi yamuchirihe makhwataaye ayo Asiriya yaamuphoreyihalliiwa o Rama mvo awaneeye ni Hazaele mwene a o Siriya. Sika Ahaziya mwaana a Yehoramu, mwene a o Yuda aaya o Yezireele woomuzonda Yoramu mwaana a Ahabu ekaamba yawi aamavoriiwa.

⁷ Ogonjihiwa wa Ahaziya weereyille ni Mulluku vooyaani wa Yoramu. Aphiyallewo, olliye ni Yehoramu yaaya wi yakumane ni Yehu mwaana a Nimishi oyo Apwiya yamutthoollille wi oononge nibanja na Ahabu.

⁸ Vano Yehu eeruzeeye nibanja na Ahabu aakumana ni oohoollella a o Yuda ni anamwani a asinne a Ahaziya ayo yamurumeyella nave aawiipha.

⁹ Vatulli viwa aamwaashaasha Ahaziya nave amphwanya iipitthalle mu Samariya. Vano yaamuwaana wa Yehu emwiipha. Yaamuvittha m'mahame mwawi yaallota wi, “Olla tti edduullu ya Yehoshafati olle aarumeyella Apwiya ni murimaaye muttheene.” Vano nibanja na Ahaziya khenaari ni muthu awi ttuukhalla mwene oolamulella.

Wiiphiwa wa Ataliya

¹⁰ Ataliya amennya a Ahaziya oonille wi mwanaye ookhwa, aatimulla awoononga athu attheene a va nibanja noomwene wa Yuda.

¹¹ Koma Yehosheba mwaana aamutthiyana a mwene Yehoramu, aari mwaara mullupa mukutho Yehoyada, murokoriye a Ahaziya, aamukusa Yowashi mwaana a Ahaziya. Aamwiiya variyari va anamwani aallopwana a mwene ayo yaari vakhuviru wiiphiwa. Aamuhiya mu echipinda emodda yookona ya mu enyumba ya Apwiya ni oomullellaaye. Sika aamusunga mwaanooyo, omooviha Ataliya wawi khaawiiphiwe.

¹² Mwaanooyo aakhalla ni oomullellaaye wa miyakha mitthanu ni mmodda iipitthaka mu enyumba ya Mulluku mvo Ataliya alamulelleeye ellapo.